Lûk 9

Jisòs tum ghɨt a tuma wuna njwòsù bà

(Mat 10.5-15; Mâk 6.7-13)

1Jisòs toŋa yûŋtì ghɨt a tuma wuna njwòsù bà fo a jyak à jɨ̀m ha ghɨna shyəma ghɨna nê hi jûmà fihe yohnù wu be nâ wù jɨ̀m, fê chwuka yaftu, 2chinhi ghɨna na ghɨna fwo yen ma ghɨ hi fôktè gha kum Fə̂n wù Fùyènù fê chwuka ghɨt a yablena. 3Wù fî kaha jis ha ghɨna na, “Kə ghàn nè lyê shyə ale, kə wùt nè lyê mbàŋ yì gbèna nâbi nì bàlì, kə wùt nè lyê shyə yəna nâbi nì ka, kə wùt nè lyê nju sùbà. 4Ghàn yen nâbi yìni tèki, lye a ndâ, ghàn hi chyə kə atɨ̂n hi bè tàn a wu tuk afa ghàn bè lô a yi tèk afû. 5Ghàn yen nâbi afa, ghɨt atɨna faŋ hi fye ghàn, ghàn yah wulu wanu shyəma ghɨna nê khɨli na ngə̂k bè bênàlò ha ghɨna.”

6Ghɨt a tuma ghê fwu hì gbê yênà a tu tèk, a tu tèk, fôktè yênà nì tum yi jùŋ, fê chwuka ghɨta nâbi afa te ghɨna yènà.

Gha hì fumhe Helòd kum fêt yì kani ye wù tì ywo

(Mat 14.1-12; Mâk 6.14-29)

7Helòd we wù ndùku saka bâh à Galìlî ale yu nâ gha à jɨ̀m ghe ghɨ ndùku gânà, gha atɨna hì fumhe wûn, beka ghɨt ale ndùku jîsà ha wun na, Jon Fo Mòlû ti kaha lôtì a yi kpû, 8ale jîsà na fòktì Ìlajà ti kaha bên, ale jîsà na à mò fòktì wù chìk wùlè kə te se su ndùku mô ashyə̂ te yì kaha lote a yi kpû. 9Helòd yu gha tɨni, hì kante kə wun a ngɨŋ jîsà na, “Mu tì nî ghɨ kat tô Jon Fo Mòlû. À fè mô nde wuna ghɨ jîsà gha ghɨ̂n kum wûn agha?” A yu mefû wù yîmì hì khɨŋa hi yena Jisòs.

Jisòs yəhi ghɨta ghɨ chyâ kamsù tân

(Mat 14.13-21; Mâk 6.30-44; Jon 6.1-14)

10À ndùku mô te ghɨt a tuma Jisòs kaha kolo bena, ghɨna fôktì nâ gha à jɨ̀m ghe ghɨna tì ne, wù nyamti lyi ghɨna, ghɨna yen lumu yi tèk yile, ghɨ toŋte na Bèsadà. 11Ghɨta tì khɨli nâbi wùni yu na a mò luk we wù mò atɨ̂n ni, jûmtì yen nì wun afû. Jisòs fyi ghɨna nâ jûŋ jis ha ghɨna kum fə̂n wù Fùyènù, fî chwuk ghe ghɨ ndùku yafa.

12À hì mô wu yu kolô, jùmtìbàmsù wunsu njwòsù bà yen jis ha wun na, “Jìs ha ghɨt ghɨna na ghɨna jyahi ma lyê yen a tu tèk, ne a tu lùk afa fùkmù mò bakhe, ma ghɨna khɨŋ shyə ma ghɨ yə nì luku hi chyə̂ beka luk wûn mô a yi bàm.”

13Biyani Jisòs fîsì ha ghɨna na, “Nâ ghàn fo shyə ma ghɨna yə.”

Ghɨna jis ha wun na, “Ghàh kəta kə ban wu kwaŋu wù tân nì yila à bà. Wò khɨŋa na ghàh yê yun mwə̀ yə̂mù ha nôn à ghɨ̂t ghɨna à jɨ̀m ma?” 14Ghɨt a lɨmànà ndùku mô a nôn à afân kwoka tânà yê kamsù tân.

Jisòs jis ha jùmtìbàmsù wunsu na, “Nê ma ghɨna ndoko wu tuk, wu tuk mtân, mtân.”

15Ghɨna jis ghɨt atɨna chwo ndokò a chyə̂. 16Jisòs fyi ban wu kwaŋ we wù tân nì yila à bà ki kokhe yen a nyə̂, fo àyòŋnà ha Yènfù bəkti fo ha jùmtìbàmsù wunsu na ghɨna jyati ha ghɨt ghê. 17Ghɨna à jɨ̀m yə̂ kwut, jùmtìbàmsù wunsu kumti chyàksù bansu su lun kà sù ìwûm njwòsù bà.

Bità fôktì wùt we Jisòs mò wunù

(Mat 16.13-19; Mâk 8.27-29)

18À ndùku mô tuk lefu, Jisòs hì chyate wu lùk kə ghê jùmtìbàmsù wunsu, ki buf ha ghɨna nâ, “Ghɨta jìsà na mu mò nde?” 19Ghɨna jis na, ghɨta jìsà na, “Wò mò Jon Fo Mòlû, ale jîsà na, wò mò fòktì Ìlajà, ghɨ le jîsà na wò mò fòktì wù chìk wùlè te wù kaha lote a yi kpû.”

20Jisòs buf ha ghɨna na, “Nâ ghàn jìsà na mu mò nde?”

Bità jis na, “À mò wò Klistù, a we Yènfù chwoka lema.”

(Mat 16.20-28; Mâk 8.30–9.1)

21Jisòs kântì na kə ghɨna nè fôktè gha mi yîn ha wùt, 22Fî jis na, “Wâ Wùt kəta hi yena ngə̂k yì chìk, na chəhsu nì ngàŋsù ndâ Fùyènsu chiksu nì chichàsu saksu mana wûn, ma ywi wûn, ma à nê hi mô yi bàm yi mu tuk mtât ma wù kahà loti a yi kpû.”

Lumu hi jùmtè Jisòs

23Jisòs jis ni, ki jîs ha nôn à ghɨ̂t ghe ghɨ ndùku bênà na, “À kòŋà nâbi nde hi jùmtè mu, wu mâkà ngɨŋ à wûn, wu hi bêkà kâkfùtàfù tuk mù jɨ̀m jûmtè mu.#9.23 Hi bèkà kâkfùtàfù mò na wò mò fati wùni hi kpu kəbi te Jisòs. 24À mòmhi nâbi nde hi bònhè ngɨŋ à wûn, ma wù ləha, ma à lesi nâbi nde ngɨŋ à wûn kum mu, ma wù bê bon. 25Mbè wùt mò ghə a yu afa wù khɨte mbyî jɨ̀m lesì ngɨŋ à wûn agha? 26Nâbi nde shìki wumî kum mu nì yiki mi, wu hi khə na Wâ Wùt bè boŋa wumelò kum wûn a yu afa Wâ Wùt bè kaha bênà atɨ̂n à ban yi chiki bè wûn nì anjèlsù wunsu yulesu. 27Mu jìsà ha ghàn hamok na, ghɨt ale mò afân lân, bu hi bè kpû nâ hakoh, bu na ghɨna yen fə̂n wù Fùyènù.”

Kə̂k yi Jisòs kwuna a kun

(Mat 17.1-8; Mâk 9.2-8)

28À hì mô kwoka yênà mu tuk fama te Jisòs jìsa gha ghɨ̂n ni, wù lyi Bità nì Jon nì Jêms ghê ghɨna kwok a kun hi jə̀m. 29Te Jisòs ndùku jə̂mà, kə̂k yi wuni kwuna, njusu wunsu hì fufa kə ni, njêntè. 30Kə ni, ghɨt a bà timi hì bitè a gha nì wûn. À ndùku mô Musìs nì Ìlajà. 31Ghɨna hì mô nâ fùtɨ̂n à ban yi chiki. Ghɨna hì jîsà kum nì kpu yê Jisòs kəta hi kpû a Jèlusalèm hi lunhe gha yê Yènfù ndùku mô ma wù ti lem ha wûn. 32À ndùku mô yâ, Bità ghê ghɨt ale bwunê nâ haŋaŋ ghɨna yemà, yen yi ban yi chiki Jisòs, fî yen kəbi ghɨt à bà ghe, ghê Jisòs mô amok. 33Ghɨt atɨna shihi lò, Bità ki jîs ha Jisòs na, “Yi jwôfàlò a bèbɨn na ghàhnà hi mô afân. Ghàh nè balò wìmù mù tât, ma wò nê hi kəta à mòk, Musìs kəta à mòk, Ìlajà kəta ale.” Wù ndùku jîsà ni, khə wi gha ye wù jìsà.

34Kə te Bità ndùku baha jîsà kə yi jîs, bàksù chwo baŋ ghɨna, fânì kwo ghɨna. 35Jyə̀ fwu fùtɨ̂n à sìmbàk afû jis na, “Wùna mò wâ mù we mu chwoka. Ghàn hi ywo ha wûn!”

36Te jyə̀ àtɨ̂n tì jìsa mihe, ghɨna yen Jisòs mô afû kə wù nɨ̂ŋ. Ghɨna china kə yi chinâ, tê fòktì ha wùt mòk gha ye ghɨna yena mu tuk afû.

Jisòs chwuk walà wu kəta yohnà a be

(Mat 17.14-18; Mâk 9.14-27)

37Tuku yû, Jisòs ghê jùmtìbàmsù wunsu sù tât kaha chwo kun, nôn à ghɨ̂tà bên, dô kə ni hi bè yen a wûn. 38Wùt lè atɨ̂n à nòn afu metì bwat a jyə̂ yì tâ jis ha Jisòs na, “Chichà, chichà gàmti wâ mù lɨmà wunâ, beka mu kəta kə wûn. 39Yohnà be faŋa wi hi khɨte wun na wù shɨŋ à bwat à ji, ma wù fen a chyə̂, fufutu fwo a wun a yi jwô. Ghɨ ni ya, ghɨ fo ngə̂k ha wun ghɨ de wûn ma wù ti bôt nâ haŋaŋ. 40Mu ye chyati jùmtìbàm sasu na su jum à fihi, biyani ghɨ ti ta ghak ghɨna.”

41Jisòs fîsì jis na, “À mò nâ yìni mbyi yì be ni a yì ta hi bimî ni, mu nè chyə tânà yàni nì ghàn shyəma ghàn bimi?” Wù jis ni, ki jîs ha wùt àtɨ̂n na, “Bi nì wan wâ we afân.”

42Wù shihi fwo yèn nì wûn, yohnà be atɨna mak wan àtɨ̂n a chyə̂, wù hì tâkà. Biyani Jisòs kântì yohnà be ghê, ghɨ fwû, wan àtɨ̂n tâ. Wù kaha lyi fô wun ha bè wûn. 43Nâ ghɨt à jɨ̀m afû hì mô nì kani kum a jyak a Fùyènà.

Jisòs fî jis kum kpu wuni

(Mat 17.22-23; Mâk 9.30-32)

Ghɨta ndùku baha kante kə gha à jɨ̀m ghe Jisòs ndùku nê, Jisòs jis ha jùmtìbàmsù wunsu na, 44“Ghàn fatè yu gha ye mu khɨŋa hi jìs ha ghàn. Ghɨ nè bəklelò Wâ Wùt ha ghɨta.” 45Biyani ghɨna te ywo khɨlî gha tɨni beka à ndùku mô ni, ma gha yile ti ni na kə ghɨna ywo khɨli. Ghɨna hì fânà ghaka hi buf ha wûn nâ gha tɨni mò na ghə agha?

Jisòs yiki kum wùt we wù chyà wùlè

(Mat 18.1-5; Mâk 9.33-37)

46Gùfna tì lôtì a jùmtìsùbàmsu Jisòs sù a fùtɨ̂n, nâ a mò nde we a wù ngaŋte chyâ a ghɨna fùtɨ̂n agha? 47Jisòs khɨli gha ye ghɨna ndùku kwâktè, lyi walà tom bakhi a wun a ngwùŋ 48jis ha ghɨna na “À tòkna nâbi nde nì wan wù teta wuna kum mu, ma à nê hi mô na wù ti tôknà nì mu. We wù tòkne nì mu, ma wù hi khə na wù tòknà ha we wù tuma mu. Ghàn hi khə na we wù tobte gokhè a ghàn a fùtɨ̂n mò we wù ngaŋte chya.”

Nâbi nde we wù bànà wi ghàn mò ghàn à ghɨna

(Mâk 9.38-40)

49Jon jis yi wuni na, “Bèbɨn, ghàh tê yen wùt, wu jûmà fihe yohnù wu be a wo yi yet, ghàh ti jis na kə wù fi mom beka wù wijə wùt mòk a ghàhnà fùtɨ̂n.”

50Jisòs jis ha ghɨna na, “Kə ghàn fi tamti lô wûn, beka we wù nò wijə ghàn mò a ghàn a bàh.”

Tèk yi Sàmaliyà tunhi hi fye Jisòs te wù ndùku kwoka a Jèlusalèm

51Jisòs tî lem na yi nè kwoka lò a Jèlusalèm beka yu ndùku bakhe bênà shyəma ghɨ lyê kwok nì wûn a nyə̂. 52Wù tum ghɨta na ghɨ yen ashyə̂ yi tèk yile a Sàmaliyà ma yê fati nâbi ghə ha wûn afû. 53Biyani ghɨta afû tê fye jə̀ Jisòs beka yi ndùku mô na wù ndùku chyâ yê kə a Jèlusalèm. 54Jùmtìbàmsù wunsu mô Jêms nì Jon yen gha yîn ni, jis na, “Bâba, wò khɨŋa na ghàh toŋa wusu a nyə̂ ma wu chwo ywiti ghɨna agha?”

55Biyani Jisòs bɨ̂nhì wu wun ki ghɨna kan na kə ghɨna nè mômà. 56Ni, Jisòs ghê jùmtìbàmsù wunsu lô yen a yi tèk yile.

Yi hì ta ghaka ghɨta hi jùmtè Jisòs

(Mat 8.19-22)

57Ghɨna hì gbê yênà wu lum, wùt wù lɨmà wùlè ben jis ha Jisòs na, “Mu nè jûmtèlò wò hi yèn nâbi afa wò yènà.”

58Jisòs fîsì jis ha wûn na, “Sòŋàtù kətalò bûkù ghɨna, nyɨ̀mû kəta ndasu, biyani Wâ Wùt kəta wi luku hi nìŋhè a tô wuna àtɨ̂n hi yùtì.”

59Jisòs fî jis ha wùt lè na, “Jumti mu.” Biyani wùt atɨ̂n jis ha wun na, “bâ. de ma mu kolò yê guma bôm shyəma mu bê jumti wò.”

60Biyani Jisòs jis ha wun na, “De ma ghɨt ghe ghɨ mô te ghɨt a kputena guma ghɨt a ghɨna ghɨ kputena. Biyani ha wò, wò kəta hi tè fòktè yèn gha kum fə̂n wù Fùyènù.”

61Wùt le fî jis na, “Mu nè jûmtè lò wò Bâba, biyani de ma mu yê toŋte ha ghɨt a ma laŋ.”

62Jisòs jis ha wun na, “Nâbi nde we wù yìmi fêtì hì kaha ke yi bàm kpene wi a fə̀n wù Fùyènù.”

Currently Selected:

Lûk 9: bmv

Highlight

Copy

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)