Lûk 5

Jisòs lyi jùmtìbàmsù wunsu shyəsu

(Mat 4.18-22; Mâk 1.16-20)

1À ndùku mô wu tuk wule, Jisòs yen time yi bi wu lwi afa ghɨ ndùku toŋte na Gènesalèt, nôn à ghɨ̂tà hì fahe bênà a wun yi kə̀k hi ywo gha Fùyènì. 2Wù yen ngwùksù a bi jwô afû sùbà ma ghɨt ghe ghɨ ndùku kwola yila atɨ̂n ti fwu ndokò yi bàm, hì sô wətu ghɨna tu. 3Wù lyi atɨ̂n à yìlè a kəta Samùn, jis ha wun na, wù chinte liti yinì a jwô. Te Samùn chinte yena nì yinì, wù chwo ndokò atɨ̂n hì yike à ghɨ̂t.

4Te wù yike mihe, kahi jis ha Samùn na, “Liti kpenhi ndù nì ngwùk àtɨ̂n a jwô, ma ghàn tum à chwohi wətu a jwô ma ghàn kwo yila.”

5Samùn jis ha Jisòs na, “Ghàh te chyə hì tumâ a Bâba, tê kwo jə̀ shyə ale, biyani beka à jis wò, mu tê jîsà lò na ghɨ tum à chwohi.” 6Ghɨna tum wətu kwo yila ghɨ dô kə ni, wətu ghɨna tu hì khɨŋa hi tentî. 7Ghɨna lâptì a wô ha ghɨt ghe, ghê ghɨna ndùku fêtà na ghɨna bê gamti ghɨna, ghɨna bên nì ngwùk yìlè, lunhi sunsu sùbà nì yila su hì khɨŋa hi mitâ a jwô. 8À hì mô te Samùn Bità yena gha ye yi gana ni, wù chwo tum ngwuksu a Jisòs ashyə̂ jis ha wun na, “Lô chyà a mo ngwùŋ a Bâba. Mu mò wùt wù be!”

9Wù tì jis ni beka wù ndùku mô nì kani nì ghɨt ghê ghɨna ndùku mô, ha yila dona ghe ghɨna tì kwola. 10Wana Sebedì ghe ghê Samùn ndùku fêtà amok ndùku mô Jêms ghê Jon ghɨna hì mô kəbi nì kani. Jisòs ki jîs ha Samùn na, “Kə wò fî fan, hi yìmì chîn hi yèn ashyə̂, wò nè hì kwo à ghɨ̂t.”

11Ghɨna kaha ben nì ngwùksù yi bi jwolì lo de nâbi ghə ghɨ ghɨna, jûmtì Jisòs.

Jisòs chwuk wùt à kùh

(Mat 8.1-4; Mâk 1.40-45)

12Jisòs yen yi tèk yile, wùt lè ben ha wûn ma kùhà ti kût wun wu wunu nâ wù jɨ̀m. Te wù yena Jisòs, fen a wun ashyə̂ chyati wûn na wù chwuk yi jyâna, “Wò hì kôŋà ma wò chwuk mu a Bâba.”

13Jisòs nâhì a wo kum wûn jis na, “Mu kòŋàlò, ta lê.” Kə wu yu kùh àtɨna mî a wun wu wùn. 14Jisòs chîhì ha wun na, “Kə wù mom hi fòktì ha wùt, ndù, chwùti ngɨŋ yâ ha tu ndâ Fùyènù, ma wò fo fo ye sak yi Musìs tì jìsa na, wùt ki tâ nì kùhà wu fo yi fô shyəma ghɨta khɨli na wò ti tâ.”

15Gha mi yîn kum Jisòs waŋ kə luk tù jɨ̀m, nâbi te wù ndùku khɨŋa na wùt yafa we let gha tɨni. Nôn à ghɨ̂tà hì bênà hi ywo yikî wuni fê bênà na wù chwuk yaftu ghɨna tu. 16Biyani, wù ndùku faŋa wi hi lò dè ghɨta hi yèn wu lùk wule kə wù nɨ̂ŋ hi jə̀m.

Jisòs chwuk wùt wù kə̀blena

(Mat 9.1-8; Mâk 2.1-12)

17À hì mô wu tuk wule kəbi afû, Jisòs hi yike wu lùk wule ghɨt a Falàsî nì chichàsù saksu mô afû ma ghɨna fwu ben a tu tèk tù jɨ̀m a Galìlî nì Jùdiyà nâbi nì Jèlusalèm. À ndùku mô ni, jyaka Bâba mô ha Jisòs wu chwuka tu yâf. 18Kə ni, ghɨta ben nì wùt ma wù ti kə̂blì, ma ghɨ ti nîŋhì wûn a fughàm, hì khɨŋa lumu hi lyi nì wûn a ndâ afa Jisòs ndùku mô atɨ̂n hi nìŋhè a wun a Jisòs ashyə̂. 19Biyani lumu ndùku wi shyəma ghɨna lyi nì wûn beka ghɨta ndùku dô. Ghɨna kwok nì wûn lumu a tô ndâ, chwok a bûk, chwohi wûn atɨ̂n à nôn afû nìŋhì wûn a Jisòs ashyə̂. 20À hì mô te Jisòs yena bimî ye ghɨna ndùku kəta, jis ha wùt kə̀blena we na, “Bə mu ti lehìfo be sasu!”

21Chichàsù saksu nì ghɨt a Falàsî hì bufa ha ngɨŋsu ghɨna su nâ, “Wùna mô nde a wù sùlè Yènfù ni? À mò hi lèhèfo nde besu wûtsù, a bu kə Fùyèn?”

22Jisòs khɨli gha ye ghɨna kwàktè ki buf ha ghɨna nâ, “Ghàn kante gha ghɨna ni kum ghə? 23À bona yìni, hi jìs na, ghɨ ti lehìfo be sasu ma hi jìs na, ‘Lòti gbê’ agha? 24Mu chwùtè ha ghàn chîn na Wâ Wùt kətalò jyaka a chyə afân hi lehèfo besu ghɨ̂tsù.” Wù ki jîs ha wùt kə̀blena we na, “Mu jis ha wò na, wò loti ma wò lyi shɨ̂ŋ fafu ma kolo.”

25Wù lôtì kə yu mòk a ghɨna ashyə̂ lyi ghâm fe a ghɨ tì nìŋhe wûn atɨ̂n hì kolê, kokhe yê nì Yènfù. 26Ghɨt à jɨ̀m afû hì mô ni kani, fânì kwo ghɨna, ghɨna hi bəmhe Yènfù jîsà na, “Ghàhnà ti yen gha kanana lân!”

Jisòs yə nì ghɨt a be a Lefì ndâ

(Mat 9.9-13; Mâk 2.13-17)

27Yi bàm yi gha mɨ ghɨ̂n, Jisòs fwu hì yênà, yen wùt lè wu kâtà ŋwàklànà, yet yi wuni mô Lefì, wu mô a wì afa ghɨ kâtà ŋwàklànà atɨ̂n, Jisòs jis ha wun na, “Jùmti mu.” 28Kə wu yu, wù lôtì lo de nâbi ghə yen a wun yi bàm.

29Lefì fî fati tat yi chìk a wun a ndâ ha Jisòs. Ghɨta bên bakhi nì ghɨt ghe ghɨ kâtà ŋwàklànà, ben afû dô kə ni ghê ghɨna hì yə̂. 30Ghɨt a Falàsî ale nì chichàsù làŋsù hì njaŋâ, bufa ha jùmtìbàmsu Jisòs su na, “Kum ghə te ghàn yə fê nyô nì ghɨt ghe ghɨ kâtà ŋwàklànà nì ghɨt a be ghɨ le agha?”

31Jisòs buf ha ghɨna na, “A yule ndâ nde ma wù fê shik hi khɨŋa a fu agha? A shika kə ghɨt a yablena. 32Mu tà ben hi tihe ghɨt ghe a ghɨ mô chilichili, mu ben kum ghɨt a be hi fòktì na ghɨna kahi təm a ghɨna.”

Jisòs yiki kum chyənu mwu nì wu fe

(Mat 9.14-17; Mâk 2.18-22)

33Ghɨna jis ha Jisòs na, “Jùmtìbàmsù Jon su bama yi jwô jə̂mà, su Falàsî sù bama yi jwô, jə̂mà biyani sasu yə̂ fê nyô kə te ghɨna kòŋà.”

34Jisòs buf ha ghɨna na, “A ghɨ làhi bimi na ghɨta bam jwo wu lùk wu malanu lɨm à wùt ywên baha mò kə afû agha? 35Tuku bènàlò a ghɨ bè lyê lô nì lɨm à wùt ywên a ghɨna fùtɨ̂n, ma ghɨna bê hi bama jwo.”

36Wù jis ni kaha ma kəbi ngàn yìlè ha ghɨna kum chyənu mwu nì wu fe jyâna, “Wùt wi hi lyè bâh à sù nju a fe hi bàt njùsu mwusu atɨ̂n. Wùt ki nî ni, ma wù bobhi njùsu fe sê halô, bâh à fe ghê nè kwônà wijə nì njusu mwu sê. 37Yi mô kəbi yi ghəl te wùt wi hi lyè sìŋ à mù lùk hi lèm a sàlsù gwusu nyâmsù mwusu, beka wù ki nî ni, ma lùk mù tɨ̂n nê shihi tâ ma mù bâtì sàlsù, ma wù gha lùkû nì sàlsù. 38A kəta kə hi lèm à sìŋ à mu lùk a sàlsù fesu. 39Yi mô kəbi hamok na wùt shìki nyo lùk mu tâ, wù nê hi fê kòŋà wi hi nyo lùk mù tofamù, wù faŋ kə na, ‘Lùk mù tâ jwòfàlò.’

Currently Selected:

Lûk 5: bmv

Highlight

Copy

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)