Lûk 6

Gùfna kum nì tuk wu laku ghɨt a Jûs

(Mat 12.1-8; Mâk 2.23-28)

1Tuku tî yû wu tuk wu lak wule, Jisòs ghê jùmtìbàmsù wunsu hì tohna chyâ yi bat yi saŋa bota ale, hì yole tû saŋu le, fikhe kutâ. 2Ghɨt a Falàsî ale buf ha ghɨna na, “kum ghə te ghàn nè gha wu tuk wu laku, saki bime wi agha?” 3Jisòs buf ha ghɨna na, “Ghàn tà taŋ yu gha ye Defìt tì ne te jìŋ yafa wun ghê ghɨt a wuna agha? 4Wù lyi yen a ndâ Fùyèn, lyi yə mwə̀ mù yə̂mù Fùyèn, saki chwûtè na a yə kə ngàŋsù ndâ Fùyènsu.”

5Wù jis ni ki jîs ha ghɨna na, “Wâ Wùt kətalò jyaka hi jìs na ghɨ ni nâbi ghə wu tuk wu laku.”

Jisòs chwuk wùt wu tuk wu laku ghɨt a Jûs

(Mat 12.9-14; Mâk 3.1-6)

6À hì mô kəbi wu tuk wu lak wule, Jisòs yen lye a ndâ yùŋtì hì yikê, wùt lè mô afû ma kpen wu wunu wu wo ta ti kpû.

7Chichàsu làŋsù, ghê ghɨt a Falàsî lem yi se a wun wù wùn hi yen nâ wù nè chwukalò wùt wu tuk wu laku shyəma ghɨna khɨli gha ye ghɨna nè ngane wûn atɨ̂n. 8Biyani wù khɨli kwâktì ghɨna jis ha kpû kpên we na, “lòti chyà bî timi a ghɨta ashyə̂.” Wù lôtì yen timilò. 9Jisòs buf ha ghɨna nâ, “Saki bimilò na ghɨ nî jùŋ wu tuk wu laku ma be, yi bime na ghɨ bonhi wùt ma ghɨ ywi agha?” 10Wù jis ni, kaha ki tala ghɨna à jɨ̀m, kaha jis ha wùt we na, “Nànti kpen wâ,” Kə wu yu te wù nànte, kpen wu tɨnu tâ.

11Biyani gha tɨni yaf ghɨt atɨna nâ haŋaŋ, ghɨna hì kwàktè gha ye ghɨna mò hi nì ha Jisòs.

Jisòs chwokti ghɨt a wuna ghɨ tuma

(Mat 10.1-4; Mâk 3.13-19)

12Tuk wule a wu yu kolô, Jisòs kwok a kun chyə jə̂m kə ha Yènfù ni, tuku yû. 13Tuku kpên, wù toŋa jùmtìbàmsù wunsu chwokti ghɨta ìwûm njwòsù bà lem kəbi ghɨna ha ghɨt a wuna ghɨ tuma. 14À hì mô Samùn we wù fo kpenhe yeti ha wun na Bità, a mô wâ nè Bità ghɨ toŋte na Andùlù, nì Jêms, nì Jon, nì Filîp nì Bàtòlòmiyà. 15Màches nì Tomòs, nì Jêms wâ wùt à Àfeyòs nì Samùn wùt lùmana à ghɨt a Jûs. 16Nì Judàs a wâ Jêms ghê Judàs Ìskaliyòt we wù tì kaha bəkle Jisòs.

Jisòs yikê, chwuka à ghɨ̂t

(Mat 4.23-25)

17Jisòs kaha chwo a kun afû, ghê ghɨna timi wu lùk wule yi bat bakha nì jùmtìbàmsù wunsu su dô kə ni. Nôn à ghɨ̂tà fwu ben kəbi afû dô kə ni ma ghɨ fwu ben kə bûlà tu Jùdiyà tù jɨ̀m nâ nì Jèlusalèm. Ghɨt ale mô kəbi afû ma ghɨ fwu a Tayà nì Sidòn wu luk wu bakhe a bì jwolì chìk. 18Ghɨt atɨna ndùku mô à jɨ̀m ma ghɨ fwu ben kə hi yu yi yikî Jisòs, na wù fê chwuk yaftu ghɨna tu. Nâbi ghɨt ghe ghɨ ndùku yafa kum nì yohnà be ghɨ tâ. 19À ndùku mô nâbi nde a nòn afû nô kə hi kùm à wûn, beka jyaka ndùku fwo a wun wu wùn chwuka kə ghɨt à jɨ̀m.

Bônhìtù nì ngəksu

(Mat 5.1-12)

20Wù lôhì a se ki yen nì jùmtìbàmsù wunsu, jis ha ghɨna na:

“Jùŋ mò a ghàn ghɨt a fufana beka jùŋ à Fə̂n wù Fùyènù kəta ghàn.

21Jùŋ mô ha ghàn ghe jiŋsu yafa ghàn chîn,

beka ghàn bè yə kpenalò kə te ghàn kòŋà.

Jùŋ mô ha ghàn ghe ghàn jyè chîn,

beka ghàn bè chəkalò.”

22“Jùŋ mô ha ghàn chîn, te ghɨta bànà ghàn, jùmà ghàn a ghɨna ndasu chintesu, sùlè ghàn fê bobhe a yet ghana kə kum Wâ Wùt. 23Ghɨta shìki nî ha ghàn ni, ghàn hi saŋlê binâ beka maktu chiku yute ghàn a nyə̂. À mò kəbi yi ghəl te be ghɨna ndùku nê ha fòktìsù chiksu.

24Biyani ngə̂k yì chìk mô ha ghàn ghɨt a mu ka beka jùŋ yanì mò a ghàn a wô.

25Ngə̂k yì chìk mô ha ghàn ghe ghàn yə kwuta chîn

beka jiŋsu bè fê yafalò ghàn.

Ngə̂k yì chìk mô ha ghàn ghe ghàn chəka chîn beka ghàn bè hì kùnà wunu fè jyê.”

26“Ngə̂k yì chìk mô ha ghàn ghe nâbi nde jìsà jùŋ kum ghàn beka à mô kəbi gha ye be ghɨna ndùku nê ha fòktìsù fəmsu.”

Ghàn hi kôŋà bànà sanisu

(Mat 5.38-48; 7.12a)

27“Biyani ha ghàn ghe ghàn yute ha mu chîn, mu jìsà na, ghàn hi kôŋà bànà sanisu nê jùŋ ha ghe a ghɨ bànà ghàn. 28Ghàn hi bonhê ghe a ghɨ sùlè ghàn, jə̂mà ha ghe ghɨ nyâblè nì ghàn. 29Wùt sam a wô a wo jyə̀k, wo bɨnhì ale, ma wù sam à mihi. Wùt ki fye à waf gha, kə wò ta nâbi nì nju sasu a wò màka a fùtɨ̂n. 30À lon nâbi nde shyə ha wò, wo fo kə yi fô ha wûn. Wùt ki khɨte fye mwə̀ mâ ha jyak kə fi buf. 31Ghàn hi nê gha ha ghɨta te ghàn kòŋà na ghɨ ni ha ghàn”. 32“Ghàn shìki kôŋà kə ghɨt ghe ghɨ kôŋà ghàn, nâ jùŋ àtɨ̂n nê hì mô ghə a Yènfù ashyə̂ agha? Beka nâbi ghɨt a be kòŋà ghɨt ghe ghɨ kôŋà ghɨna. 33Ghàn shìki nê jùŋ kə ha ghɨt ghe ghɨ nê jùŋ ha ghàn, Yènfù nê yen yàni jùŋ àtɨ̂n agha? Beka nâbi ghɨt a be nè kəbi ni. 34Ghàn shìki mô hi samhe a shyə ha wùt kə beka ghàn kwàktè na wù nè kaha folò, nâ jùŋ àtɨ̂n a Yènfù ashyə̂ nê hi mô ghə? Beka nâbi ghɨt a be samhelò mwə̀lû ha ghɨt a ghɨna beka ghɨna khə na ghɨna bè kaha kwotelò shyə ghê ghɨna tì fo.” 35Biyani mu jìsà ha ghàn na, ghàn hi kôŋà bànà sanisu, nê jùŋ ha ghɨna, samhe ghɨna nì mwə̀lû, nâbi ghe ghàn khə wi na ghɨna bè kaha folò. Ghàn ki nî ni, maktu wanu bê hi ghaka kə ni, ma ghàn nê fè chwuti na ghàn mò wana Yèn fe fu ngaŋte kpene, beka fu tôknè ha ghɨt a be nì ghɨt ghe a ghɨ laha yena wi jùŋ. 36Ghàn hi kwohe seni ha ghɨta kəbi te Bì wânù.

Kə ghàn sak ghɨt ale

(Mat 7.1-5)

37“Kə ghàn sak ghɨta kə Yènfù bê sak ghàn. Kə ghàn nè bobhe ghɨta kə Yènfù bê bobhi ghàn. Ghàn hi lehèfo ghɨta, ma Yènfù bê lehêfo ghàn. 38Ghàn hi fo ghɨta nì mwə̀lû ma Yènfù bê fo ghàn, ghɨ shihi fô tòkà lêmà bàlì sanisu, shikhè, yiktê, fê lunhe nâ ni, na su hi sûlè fwo a chyə̂. Beka ghàn shìki fo mwə̀lû ha ghɨta nâbi a ghɨ̀ni fêkà, ma Yènfù bê fo ha ghàn kəbi a fèk àtɨna.”

39Te wù jìsa ni kaha ma ngàn yìlè ha ghɨna na, “Fèfà wi hi chwùte wu lum ha ghɨ le, beka ghɨ ki môm ma ghɨna fen a yi be kə à jɨ̀m.” 40Wù fî ma kəbi ngàn yìlè na, “Wan wù yikena wi hi bè chyà chichà à wûn, biyani, à fati yiki nâbi nde ma wù nê hi mô kəbi te chichà à wûn.”

41Wù fî ki buf nâ, “Kum ghə te wò ke kə namtà fe fu mô a wâ nâ yi sê, biyani yena wi a fûŋ à fùkàk ghe ghɨ mô a wo yi se? 42Wò ki faŋa kə ni, ma wò nê jis yàni ha wâ nâ na, ‘Tek ma mu fihi namtà fù a wò yi sê wâ nôm,’ mô ni, yena wi a fûŋ à fùkàk ghe a ghɨ mô a wò yi sê agha? Wò, wùt wunâ, wò kama nê gha ni! Fihi fûŋ à fùkàk ghê a mô a wò yi sê, ma yi yuli laŋ, shyəma wò khɨli hi yena namtà fê a fu mô a wâ nâ yi sê.”

Ghɨ khɨle fukâk a wu tam

(Mat 7.16-20; 12.33-35)

43“Ghàn hi khə na kâk fù jûŋ fù tà timi hì mo tamu be, fu be fu mo wi tamu jûŋù. 44Ghɨ yena khɨle fukâk wu tam afa fu mo. Ghɨ bè time kônà wi fiksù a ghə̀n a sù sòndoŋa, nâbi lùkàmù a tàŋsù kwòsù. 45Wùt jùŋ nê jùŋ, yi mô ma yì fwo kə a fùtɨ̂n à gha jûŋà afa wù bakte lema a wun a yi təm, wùt be nê kə be ye wù bakte lema a wun a yi təm. Beka jwo wùtì jìsà kə gha ye yi mô a wun a yi təm ma yi ti lûn.”

Ba jûŋì nì ba yi be

(Mat 7.24-27)

46“Njwô ghə te ghàn toŋte kə mu na ‘Bâ, Bâba,’ yu mù jɨ̀m, nê wi gha ye mu jìsà ha ghàn? 47Mu nè chwûtè lò mô ye wùt bènà ha mu wu hi mô hi ywo jyə̂ mì, nê kə te mu jìsa, wu nê hi mô. 48Wù mò te wut we wù tì shihi ba ndâ wûn fati chum a chyə atɨna nâ jûŋ lem a ti, kwuŋa bên chin ndâ àtɨ̂n, yì tê nèklì beka yì ndùku mô ma ghɨ ti fati bâ. 49Biyani wùt we wù ywo jyə̀ mì faŋ hi nì te mu jìsà, mò te wut we wù shihi ba ndâ, faŋ hi lèm a chyə nda, kwuŋa chwo bak ndâ atɨ̂n yì fen bwutì nâ yì jɨ̀m shyə ale tê fâŋ.”

Currently Selected:

Lûk 6: bmv

Highlight

Copy

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)