Piilimka 17

1Abram ale jam nya bena pineok ale neok la, Naawen yaa pai wadek a sak wa a weeni ayen, <<Mi ka Wen Dii Ale A Niak La, a cheŋ ale mu abe fi kan ta nye kaasuŋŋoa. 2M le basi ate fi ŋaaŋbisaŋa a piisi ate nɔiyeŋ kaai ate mi ale fi nye la a chim wensie.>>

3Abram yaa koori a pai diri a kpi tɛŋ, ate Wen weeni wa ayen, 4<<Dan ka mi tɔga, mi ale fi nɔiyeŋka ale nna. Fi le chim tɛŋsa yega ko. 5Ba kan ŋmaa wi fu ayen Abram. Fi yuenni yaa le chim ka Abrayam. Diila m basi kama ate fi chim tɛŋsa yega ko. 6M le basi ate biam jam fi jigi. Tɛŋsa ale nyini fi jigi ate nalima mɛ a nyini fi jigi. 7M le basi ate m nɔiyeŋka a chim nɔiyeŋ kaai ale kaa kpeglim mi ale fi ale fi ŋaaŋbisaŋa suŋsuŋ la. Ka le kasim boro kama ale fi ŋaaŋ sii ale cheen la. M le chim fi Wen ale fi ŋaaŋsaŋa Wen. 8Keenan tɛŋka meena ate fi boro yɔgyɔgla de a chim nichaanɔ nna, m le basi ate ka chim fi ale fi ŋaaŋbisaŋa tɛŋ kasim a cheŋ. M le chim ba Wen.>>

9Wen yaa weeni Abrayam ayen, <<Ku a fɛ kama ayen fi ale fi ŋaaŋsaŋa a ta m nɔiyeŋka a magsi baai meena ale bo ŋaaŋ a cheen la. 10Mi nɔiyeŋka ale fi ale fi ŋaaŋbisaŋa ale bo ŋaaŋ la ale nna. Nɔiyeŋ kaai ale magsi ni ta la. Nidoa meena ale bo ni po la a gebi wa yoari. 11Ni gebi ni yoaŋa ate ku a sak nɔiyeŋka ale bo mi ale fi suŋsuŋ la. 12Fi buuni po meena ale bo ŋaaŋ cheena la, nidoa meena a dan nya daa naaniŋ ba gebi wa yɔnni, ale baai ate ba biak fi dɔkku po yaase ba da nichaanɔ ale ligra. Baai ale poom kan daa fidek bisa la. 13Ba da ba ale ligra yaase ba biak ba fi dɔkku po, ku a fɛ kama ayen ba gebi ba yoaŋa. Mi nɔiyeŋka ale bo ni nyiŋ lammu nyiŋla ka nɔiyeŋ kaai ale kan ta kpeglimka. 14Nidoa waai ale kan gebi wa yoari, ate nyiŋ gbaŋka an gebi la a kan maara bo wa nuruma po, diila wa kaasi nɔiyeŋka kama.>>

15Wen ŋman weeni Abrayam ayen, <<Fi powa Sarai, kan ŋman wi wa ayen Sarai, wa yuei yaa le Saara. 16M le niak wa, abe m basi ate wa biak nidoabili a te fu. M le niak wa ate wa chim tɛŋsa ma, wa le biak nuruba nalima.>>

17Abrayam yaa koori a pai diri a kpi tɛŋ, a yaa la ale weeni wadek ayen, <<Bena kook nuru ale baga a biak nidoabili a te wa dega? Saara ale ta bena pineok la ale biak biiga?>> 18Ate Abrayam yaa weeni Wen ayen, <<Be basi ate Ismael a nya fi niaka.>>

19Wen yaa weeni Abrayam ayen, m siak ya, alege fi powa Saara ale biak nidoabili ate fi te wa yuei ayen Aizik. M le basi ate mi ale wa nɔiyeŋka a zaani ate ka chim nɔiyeŋ kaai ale kaa kpeglim a te wa ŋaaŋbisaŋa ale bo wa ŋaaŋ cheen la. 20Alege Ismael jigi, m wom fu kama. M le sum niak wa. M le basi ate wa ta kiri abe m basi ate wa ŋaaŋbisaŋa piisi. Wa le chim kpaga pi ale ŋaye ko abe m basi ate wa chim tɛŋ kpieŋ. 21Alege m nɔiyeŋka m le basi ate ka zaani ale Aizik, waai ate Saara a za wa biak a te fu bali benni nna po de la.>> 22Wen ale biisi ale Abrayam nueri la, wa yaa jueli wen ale ge wa.

23Dai dila danni dek Abrayam yaa yik Ismael ale baai ate ba biak wa dɔkku po a le baai ate wa da ale ligra la, nidoa meena wa dɔkku po a gebi ba yoaŋa ase Wen ale weeni diila. 24Abrayam jam ka bena pineok ale neok ale gebi wa yoanni. 25Wa nidoabinni Ismael jam ka bena pi ale ŋata. 26Abrayam ale wa nidoabinni Ismael a jam gebi ba yoaŋa ka da dila dek. 27Nidoa meena Abrayam dɔkku po, ale baai meena ate ba biak wa dɔkku po la ale baai ate wa da nichaanɔ ba jigi la jam gebi kama ale wa.

Currently Selected:

Piilimka 17: BWU

Highlight

Copy