Piilimka 21

1Yɔgyɔgla de Naawen niauŋku a jam bo le Saara kama a magsi chaab ale wa le weeni diila. Ate Naawen yaa nye dii ate wa puulim la a te Saara. 2Saara yaa yik lɔgi a biak nidoabili a te Abrayam wa kpaŋsaŋa po, diipo dek ate Wen a puulim la. 3Abrayam yaa te nidoabinni ate Saara a biak a te wa la yuei ayen Aizik. 4Nidoabinni ale nya daa naaniŋ la, Abrayam yaa gebi wa yɔnni a va chaab ale Wen ale weeni diila. 5Abrayam jam ta ka bena kook alege ate Saara a biak Aizik a te wa la.

6Saara yaa weeni ayen, <<Wen a basi kama ate laata a bo m nɔi po, waai meena ale a wom kude la ale la ale mu.>> 7Ate wa yaa ŋman gum du ayen, <<Ka wana daam ate ni wa weeni Abrayam ayen biik ale ŋoosi Saara? Alege mi a biak nidoabili m kpaŋsa po a te Abrayam.

8Biika yaa chim ate wa gaari wa. Dai dii dai ate Saara gaari Aizik la, Abrayam nye ka ŋandiinta tigi. 9Alege Saara ale nya nidoabinni ate Aga ale nyini Ejipiti la a biak te Abrayam la a nye ba a la la, 10wa yaa weeni Abrayam ayen, <<Basi ate nipok yɔmawa ale wa nidoabinni a cheŋ, nipok yɔma wala nidoabinni a kan maa ta charuk ale mi nidoabinni Aizik.>>

11Wanni a daani Abrayam nna yegayega dii nyiŋla ku a nye ale ka wa nidoabinni. 12Alege Wen a weeni wa ayen, kan te fi nidoabinni ale fi dɔkliewa wari a daani fu. Wom Saara ale weeni fu dii meena la, diila ka Aizik nyiŋ ate m teeri fi buuni wari. 13M le basi ate dɔkliewa nidoabinni a chim tɛŋ mɛ dii nyiŋla wa ka fi buuri.>>

14Vari ale veenti la saluik yokyokwa Abrayam yaa pai ŋandiinta ale bunlɔk ale nyiam a te Aga. Wa pai ba a vi wa ŋmankpala a basi ate wa cheŋ ale nidoabinni. Wa yaa cheŋ a ga bo Beerseba gɔnni po a tuinti.

15Bunlɔkku po nyiamu ale nueri la, wa yaa pai nidoabinni a dueni ti fiisa tɛŋ. 16Wa yaa cheŋ niŋ nna maga a ga kala. Wa yaa poli ayen, <<M kan baga a nya nidoabinni ate wa a kpi.>> Wa le kala a moata dula la wa yaa piilim kumsa.

17Wen yaa wom nidoabinni ale a kum la, ate Wen maarɔ yaa wi Aga nyini wenŋmazuk ayen, <<Ka boan wari, Aga? Kan chali yɔgsummoa, Wen a wom nidoabinni ale doa dula a kum la kama. 18Yik nidoabinni nisa a zak wa ate wa yiti, diila m le basi kama ate wa chim tɛŋ kpieŋ.>>

19Wen yaa lak wa nina ate wa nya vili ale nyiam. Wa yaa cheŋ a ga sueri bunlɔkku ale nyiam a yaa te nidoabinni ate wa nyu.

20Wen jam bo le nidoabinni kama wa chimta po. Wa kasim bo ka gɔnni po a ga chim tɔŋdɔ. 21Wa le jam bo Paran Gɔnni po la, wa mawa yaa yaali nipok Ejipiti a te wa.

22Dila po Abimelek ale wa tugurik tɔŋdɔma kpagni Fikol yaa weeni Abrayam ayen, <<Wen a bo le fu kama wari meena ate fi a nye la po. 23Yɔgyɔgla de pɛ Wen niŋ ayen fi kan nye venta nyeka ale mi yaase mi bisaŋa yaase m ŋaaŋsa. Sak mi ale tɛŋ kaai ate fi boro ase nichaanɔ la jiirim buui dek ate mi sak ale fu la.>>

24Abrayam yaa weeni ayen, <<M pɛ ya.>>

25Abrayam yaa fɔbili te Abimelek wa vinni ate Abimelek tomteerɔma a vari la. 26Alege Abimelek yaa weeni ayen, <<Mi zɛ waai ale nye nnala la. Fi an weeni mi, ka jinla nyiini ate mi a wom.>>

27Abrayam yaa ta piisa ale niiga a jam te Abimelek ate ba nɔi bayewa a nye nɔiyeŋ. 28Abrayam yaa gaari pasaa ŋayopɔi piisaŋa po, 29ate Abimelek a bek Abrayam ayen, <<Pasaa ŋayopɔiwa de ate fi gaari la kiri ale boa?>>

30Wa yaa tulisi ayen, <<Siak a tuesi pasaa ŋayopɔiwa de mi nisa po ate ku chim seerɔ ayen ka mi ale tu vinni de.>>

31Ate ba yaa wi dula ayen Beerseba, dii nyiŋla nuruba baye ale pɛ dula jigini.

32Nɔiyeŋka ale nye la ŋaaŋnyiŋ, Abimelek ale wa tugurik tɔŋdɔma kpagni Fikol yaa ŋman cheŋ Filistia demma tɛŋka. 33Abrayam yaa vuk ti fiik Beerseba. Dula jigini wa yaa wi Naawen yuei, Wen Dii Ale Kan Ta Kpeglimka la. 34Abrayam yaa jam bo Filistia demma tɛŋka ate ku benni.

Currently Selected:

Piilimka 21: BWU

Highlight

Copy