Piilimka 34

1Yɔgyɔgla Daina, lie waai ate Leya a jam biak a te Jekob la, yaa jam nyini peelim a cheŋ tɛŋka nipooma jigi ayen wa puusi ba. 2Ayaamo biika Sikiim Yivi denɔwa, waai ale soa kauk kula a nya la, ale ga nya wa la, wa yaa yik wa, a fɛ goa ale wa. 3Wa suinum yaa jam doa Jekob liewa Daina zuk, ate wa ta yaalika ale nipokbinni, ate wa biisi bi masik a te wa. 4Ate Sikiim a yaa weeni wa kowa Ayaamo ayen, <<Yaali nipokbinni nna a te mu ate wa chim m pok.>>

5Jekob ale ga wom ayen ba taŋ wa liewa la, ale wa bisaŋa a jam ta ka duŋsa a bo vaasaŋa po, ate wa yaa jam sina ate ba ga jam yeri.

6Ate Ayaamo ale ka Sikiim ko la, yaa cheŋ ayen wa biisi ale Jekob. 7Yɔgyɔgla Jekob bisaŋa ale ga nyini vaasaŋa po a jam la, ba yaa wom dii ale nye la. Ate ku yaa jam cha ba ate ba sue yaa jaa puuri, dii nyiŋla Sikiim a nye ka chivie wari Izirali po, wa ale goa ale Jekob liewa la, wa dii ale kan magsi ayen di nye.

8Alege Ayaamo a jam weeni ba kama ayen, <<M biika Sikiim suinum ale doa fi liewa zuk. Mi a saalim fu ayen fi pai wa a te wa ate wa chim wa pok. 9Ni te ate ti a faari chaab lieba. Ni pai ni liema a te ti, abe tama mɛ a pai ti liema a te ni. 10Ni baga a kali ale ti kama. Tɛŋka ale la a lak doa te ni. Ni kali ka po, ni a nye geruŋ ka po, abe ni ta ŋanta ka po.

11Ate Sikiim yaa weeni Daina kowa ale wa tuama ayen, <<Ni ŋman te mu, ate ni ale a yaali jaabuuri meena la, m le te ni. 12Ni weeni dii ale magsi m tuni nipowa nyiŋla ale tiirim buui ale magsi m te la. Dii meena ate ni a weeni la ku dan poom zuak a soa dii ya, m le tuni ni. Nama dek a tin pai nipokbinni ate wa chim m pok.>>

13Ba le taŋ ba toawa Daina la nyiŋ, Jekob bisaŋa a jam tulisi Ayaamo ale ka Sikiim ko la ale ka pimpaasima ase ba le a biisi ale wa. 14Ba jam weeni wa kama ayen, <<Tama kan nye wa dila choa. Tama a kan pai ti toa a te nuru waai ate ba an gebi wa yoari ya. Ku le chim ka chivie a te ti. 15Tama le pai ti ale a siak wa dii zuk la a dueni ni niŋ. Di be ka wa yeŋ dekki. Ase ni dan siak ayen ni gebi ni nidoama meena yoaŋa ate ni nye ase tama la. 16Dila tɔgni, ti le pai ti liema a te, abe ti tuesi nama mɛ liema a tara. Ate ti le kali ale ni, ate ti chim nuru yeŋsa ale chaab. 17Alege ni dan kan siak ayen ni gebi ni yoaŋa, ti le ta ti toawa a cheŋ.>>

18Ba le jam weeni diila a jam nala kama a te Ayaamo ale wa biika Sikiim. 19Duorɔwa, waai le ta zula a gaam ba meena wa ko yenni po la, an poom jam beni ale ba ale weeni wa diila. Dii nyiŋla wa jam ta suipeentik ale Jekob liewa kama. 20Ate Ayaamo ale wa biika a jam cheŋ tɛŋka nansuiŋku ayen ba biisi a sak tɛŋka nidoama. 21Ba yaa weeni ayen, <<Nuruma de ka ti doaba, ni te ti te ba suik ate ba kali ti tɛŋka po a gerim. Tɛŋka doa kama nna yegayega a baga a paari ba. Ti baga a faari ba lieba kama ate ba mɛ a baga a faari tama mɛ lieba. 22Alege nuruma ale siak a kali ale ti ase ka tama a nin nye ba le a weeni dii ayen, ti nidoama a gebi ba yoaŋa ase ba ale gebi diila. 23Ba le a wuuk ŋan baai la ale ba paaruŋku ale ba duŋsaŋa meena, a kan chim daa tama ŋanta? Dila nyiŋ ni te ti siak te ba, ate ba kali ale ti.>>

24Nidoama meena ale nyini nansuiŋku la a siak Ayaamo ale wa biika Sikiim ale weeni diila ate nidoama meena ale jam bo tɛŋka po la a jam gebi ba yoaŋa kama.

25Ba le gebi ba yoaŋa ate ku paari daa ŋata, ate ba niraŋa a dom la, ate Jekob bisa baye, ba jam ka Simeyon ale Livai, ale ka Daina toaba la, yaa jam pai gebik woŋsa, a ga yik tɛŋ kaai ale kan seba kpaliŋ nɔi po la nidoama a ko nidoama meena. 26Ba jam maa ko Ayaamo ale wa biika Sikiim alege yaa ta Daina a nyini Sikiim yenni po a cheŋ. 27Jekob bisaŋa yaa jam kpiema zuk a kɔlim ba ŋantaŋa, ale juijui ate ba taŋ ba toawa la. 28Ba jam choa ba piisa ale ba niiga ale ba bonsa ale ba ŋanta ale bo diina po ale peelim la kama. 29Ba jam kɔlim ba paaruŋku ale ba nipooba ale ba bisa meena ale ba yieŋa po ŋanta meena a jam ta cheŋ kama.

30Ate Jekob yaa weeni Simeyon ale Livai ayen, <<Ni ta daanika a jam te mu diila ni nye kama ate m chim ja nyuŋtik ate Keenan demma ale Perizzi demma ale nuru baai ale bo tɛŋka de la. Tama a fiisa kama, ate ba dan gum chaab ayen ba nye kpaliŋ ale mi ale m yenni demma, ba a kaasi ti kama.>>

31Alege ba tulisi wa ayen, <<Ti be basi ate wa nye ti toawa ase waai ale pai wadek a te nidoaba a tuesi ŋanta la ya?>>

Currently Selected:

Piilimka 34: BWU

Highlight

Copy