Luuk 15

1Dai yeŋ ate lampoo cheesirɔba ale wabaata nyam meena yaa jam torisi paari kpaŋŋa ayen ba wom Yeezu sinsaŋŋa. 2Farisiima ale Sinsak sagrɔma a yaa maa chaab a ŋuuni a weeni ayen, <<Nuruwa de a pai wadek a gum chaab ale ka wabaata nyam ale a dɛ ale ba mɛ.>>

3Wa yaa weeni ba wamagsini de ayen, 4<<Ase ni wanyi a nin ta piisa kook, ate kunyi a bɛ, wa a nye ka sɛ? Wa le basi ka piisa pineok ale neokku sagni po alege yaa nyiem a gisi kuui ale bɛ la ate wa nya ku. 5Ase wa dan nya ku, wa pai ku a tuk ka ŋmankpaluk ale suipeentik. 6Wa dan jam yeri, wa a wi ka wa doama ale wa kali mɔtidɔma jigi yeŋ a weeni ba ayen, <Ni a dɛ masim ale mu ale m nya m posuku ale bɛ la kama.> 7Ku abe ka dila ate mi a weeni ni, suipeentik nna yega ale ka bo wenŋmazuk ase wabaata nyɔnɔ a nin basi wa biemu a gaam wayɔrisima nyam pineok ale neok baai ale kan ŋman magsi tagrika la kama.>>

8Yeezu yaa ŋman magsi wamagsini di choa ayen, <<Ase nipok wanyi a nin ta ligbie pi ate ligbinni dinyi a yaa bɛ wa a nye ka sɛ? Wa toati ka bolim a vaari dɔkku meena gisi nalimnyiini ate wa ga nya di? 9Wa dan ga nya di wa ale wi wa doama ale baai ale kali moata wa ate ba jam jigi yeŋ a weeni ba ayen, <M sui peenti yegayega dii nyiŋla, m nya m ligbi dii ale bɛ la kama. Ni be basi ate ti sue peenti.> 10Suipeentik kala dega dega ate Wen maarɔma a tara ase tuimbaata nyɔnɔ wanyi a nin basi wa tuimbaata tomka.>>

11Yeezu yaa weeni ayen, <<Nuru ale boro a ta wa nidoabilisa baye. 12Wa bibaaŋka a yaa weeni wa ayen, <M koa, ŋan baai ate fi ale lueri a chari mi ale m suoku la, pai mi ŋantaŋa a te mi yɔgyɔgla.> Nuruwa yaa siak a yaa chari ba wa ŋantaŋa. 13Daa maga ale ga taam la, bibaaŋka a yaa pai wa ŋantaŋa meena a cheŋ satɛŋ nna niŋniŋŋa. Dula jigini wa yaa nye nanbolini a kaasi wa ligraŋa meena. 14Wa ale ga dɛ wa ŋantaŋa meena a nueri la, kom nna yegayega a yaa jam tɛŋ kala alege wa ŋman ka jaaboa. 15Wa yaa cheŋ tɛŋ kala nuru wanyi jigi ate nuru wala a yaa ta wa a cheŋ wa talim ayen wa a nya die zuk. 16Wa sui ate jam peenti kama yegayega ase wa nin nya suik a maari a dɛ deeŋa ŋandiintaŋa, alege nuru an jam te wa jaaboa.

17<<Alege ku ŋaaŋnyiŋ ate wa yammu jam la, wa yaa weeni wadek ayen, <M kowa tomteerɔma meena a ta ŋandiinta ka nna yegayega a gaam ba dɛka alege mi bo dela ayen m kpi ale kom. 18M le yiri kama a kuli ga weeni m kowa ayen, M Koa, m tom ka wabiok Wen ale fi jigi. 19Ku an ŋman magsi fi ale wi mu ayen fi biiga, a nye mu ase fi tomteerɔma po wanyi la.> 20Wa yaa deri yiti a kuli wa kowa jigi. Wa ale jam bo suiku po a cheena yeri la, wa kowa a yaa nya wa ate jiirim a yaa yik wa kowa ate wa chali nyini a ga tu wa suiku niŋ a gbaari wa a puusi wa. 21Nidoabinni yaa weeni ayen, <M koa, m tom ka wabiok Wen ale fi jigi. Ku an ŋman magsi ayen fi wi mu ayen fi biiga.> 22Alege wa kowa yaa wi tomteerɔma ayen ba nye nwuli a ta garuk kuui ale nala nna yegayega wa gattaŋa meena po la a jam jo wa. Wa weeni ba ayen, <Ni pai nifelinni a su wa nisaŋa abe ni pai nuensa a su wa. 23Ni ga yik naabiik kaai ale biigi la a ta jam ko. Ate ti nye ŋandiin kpienta tigi ate ti nye suipeentik ale chaab. 24Dii nyiŋla, m nidoabinni de a jam kpi kama, alege yɔgyɔgla de wa vua kama, wa jam bɛ kama alege yɔgyɔgla de ti nya wa kama.> Ba yaa deri piilim ba ŋandiintaŋa dɛka ale diinta.

25<<Ba ale jam boro a nye nyaŋa de meena la, wa bikpagni a diem jam bo ka talim. Wa yaa ale jam nyini peelim a cheena a jam moata yeri la, wa yaa wom yiilaŋa ale gɔgtaŋa. 26Wa ale jam paari la, wa yaa wi tomteerɔma wanyi a bek wa ayen, <Ka boan ale a nye?> Tomteerɔwa yaa tulisi wa ayen, 27<Ka fi yuawa ale ŋman pilim jam ate fi kowa yaa ko naabiik tanjaŋini, dii nyiŋla wa nya biika kama ale jaab ka wa, wa ta nyiŋyɔgsa kama.> 28Alege bikpagni sui a yaa a puuri nna yegayega ate wa zɛri ayen wa kan ŋman jo yenni po. Wa kowa yaa nyini saalim wa ayen wa jo. 29Alege wa tulisi wa kowa ayen, <Nya de, benaŋa de meena wuu ate mi tom te fu nna ase yɔma la, m be an zɛri fi nɔi mɛ. Ka boan jaab ate fi nye te mi? Ale buli mɛ la, fi an te mi ayen m nye ŋandiinta tigi ale m doama. 30Alege fi nidoabinni de waai ale ta fi ŋantaŋa a cheŋ ga yik kaasi nipok kaasuŋta zuk la, a yaa dan pilim jam fi yiri yik naabiik kaai ale zuak nna yegayega la, a ko te wa!> 31Wa kowa yaa tulisi wa ayen, <M biigaa, fi kasim bo ale mi ka daa meena, m be ale ta jabuui meena la, ka fi abe ale soa. 32Alege ku magsi kama ayen ti boro a dɛ ale a gɔk dii nyiŋla, fi yuawa a daam kpi kama alege yɔgyɔgla de wa vua kama, wa daam bɛ kama alege yɔgyɔgla de ti nya wa kama.> >>

Currently Selected:

Luuk 15: BWU

Highlight

Copy