Luuk 17

1Yeezu yaa weeni wa ŋaaŋviirɔma ayen, <<Dii ale basi ate biem a nye la ale jam, alege ku ale bie a te waai ale basi ate biem a nye la. 2Ba dan pai ni kpienni a bobi wa ŋiri a yuk basi nyakpiemu po a zunchoŋŋa fi le nye ate bifiisaŋa de wanyi a nye biem.#17:2 Nya fotowa, Maak 9:42. 3Dila nyiŋla, ni kpesi nidek ale wa dii meena ate ni a nye la. <<Fi suok a dan nye wabiok, toariŋ wa ale nin muna ate wa dan basi wa wabaataŋa tomka fi vɔŋ te wa. 4Wa be dan nye kaasi fu a paari ku nɔi buyopɔi dai yeŋ ale ŋman weeni fu ku nɔi buyopɔi ayen wa siak wa kaasuŋku, ku a fɛ kama ayen fi vɔŋ te wa.>>

5Tuimtomdɔma yaa weeni Nyɔnɔwa Yeezu Kirisita ayen, <<Nye ate ti siaka a zuak a nyoro.>> 6Ate wa mɛ yaa tulisi ba ayen, <<Ni siaka a dan soa ase mastad#17:6 Mastad ka biri fiik. biri la, ni baga weeni kiŋkaŋka de kama ayen, <Voori fidek a yiri ga zaani nyakpiemu po>, ate ka sum nye dila.

7<<Ka ni wana a nin ta tomteerɔ ate wa a kpa yaase wa a kasi piisa ate wa nyini peelim a jam jo ate fi deri weeni wa ayen, <Jam kali a dɛ ŋandiinta?> 8Wa kan goanti a weeni wa kama ayen, <Dik junɔi ŋandiinta a te mu abe fi gomsi fidek a limisi mu ate m ga dɛ abe m nyu nueri, dila ŋaaŋnyiŋ abe fi mɛ a dɛ abe fi nyu.> 9Wa kan nye tomteerɔwa jiam, dii nyiŋ la wa nye ka dii ale magsi la. 10Ku be ka dila, nama mɛ jigi. Ni dan tom Wen ale weeni ni ayen ni tom diila a nueri, ni weeni nidek ayen, <Tama ka tomteerɔba. Dila nyiŋla ku an magsi wa nye ti jiam. Ti tom ka dii ale magsi ayen ti tom la.> >>

11Yeezu ale jam bo suiku po a cheŋ Jerusalem la, wa jam va ka Samaria ale Galili tɛŋsa suŋsuŋ po a cheŋ. 12Wa jam boro a jo ka tɛŋ fiik po a yaa ga zik gama pi ate ba za nna niŋniŋa,#17:12 Kaabka 13:45-46 13a kaari ate ku a jueli ayen, <<Ti Nyɔnɔ, Yeezu, ta jiirim ale ti.>> 14Yeezu ale nya ba la, wa yaa weeni ba ayen, <<Ni cheŋ a ga pai nidek a sak kaabteerɔma.>> Ba ale cheŋ la ba yaa deri nya nyiŋyɔgsa.#17:14 Kaabka 14:1-32 15Ba wanyi ale chuiri nya ale wa ta nyiŋyɔgsa la, wa yaa pilim ŋmani ale a pak Wen ate ku a jueli nna yegayega 16a yaa jam paari Yeezu a lo wa naŋsa tɛŋ a nye wa jiam. Nuruwa a jam ka Samaria denɔ. 17Yeezu yaa bek wa ayen, <<Daa nuruba pi ale nya nyiŋyɔgsa la? Mbala neokku a bo ka bɛ? 18Ba wanyi mɛ la an baga pilim ŋman jam a te Wen pimpaukwa ka nichaanɔwa dɛ nyiini?>> 19Yeezu yaa weeni wa ayen, <<Yiri zaani a cheŋ. Fi siaka ale basi ate fi nya nyiŋyɔgsa.>>

20Farisiima gela yaa bek Yeezu ayen, <<Ka dimpo ate Wen naamu ale jamu?>> Yeezu yaa tulisi ba ayen, <<Wen naamu an cheena ale daana ayen ni kpesi nya, 21yaase nuru kan weeni ayen, <Nya de, bu bo ka dela,> yaase <Bu bo ka dula.> Wen naamu a bo ka ni suŋsuŋ.>>

22Wa yaa weeni wa ŋaaŋviirɔma ayen, <<Daa cheena kama ate ni le kasim a yaali ayen ni nya Mi Saalɔbiika danni dinyi, alege ni kan nya. 23Nuruba abe le weeni ni ayen, <Ni nya dula, ni nya dela.> Ba dan weeni dila, ni kan cheŋ, ni be kan va ba mɛ. 24Ase ŋmoruk a nyiem ale a ni ate wenni a nyaksi taam de a ŋman nyaksi taam de la, Mi Saalɔbiika mɛ danni a dan jam ku le nye ka dila dekdega. 25Alege wa le dɛ niŋ a nam nna yegayega ate gaŋka de ale zɛri wa. 26Ase ku ale jam ka dii Nowa vaaŋa po la, ku ale chim ka dila dekdega Mi Saalɔbiika daaŋa po. 27Nowa daaŋa po, nuruma a jam a dɛ kama ale nyu a buk ale a faari nipooba ale pai ba liema a yalisi ate ku paari dii ate Nowa a jo ŋaaruŋku po alege ate nyiamu a jam kaasi jaab meena.#17:27 Piilimka 7:13-24 28Ku jam nye ka dila dekdega Lɔti daaŋa po. Dila po wa, waai meena a kasim jam a dɛ kama ale a nyu ale a da diak mɛ ale a bori ale a sɛ yie. 29Da dii danni ate Lɔti basi Sodom tɛŋka la, bolim ale tintain tuila ale jam nyini wenŋmazuk a jam ko ba meena.#17:29 Piilimka 19:16-26 30Ku le nye ka dila dekdega da dii dai ate Mi Saalɔbiika ale pai m dek a sak nuruba la.

31<<Da dila danni, nuru waai a dan bo wa gboŋ zuk wa kan ŋman siŋ jo wa dɔkku po ayen wa pai wa ŋanta, dila dekdega nuru waai mɛ ale bo peelim wa talim po la, a kan ŋman pilim jam yeri ya. 32Ni teeri Lɔti powa wari! 33Nuru waai ale pii nyiŋ a nye ayen wa vari wadek nyuvuri a basi la, ale jɔk di kama. Waai mɛ abe ale a jɔk wa nyuvuri la, le vari di a basi kama. 34Mi a weeni ayen yok ku la, nuruba baye ale ba dua ta yeŋ po a goa, ate Wen jam pai ba wanyi a ta cheŋ alege nwala a dueni. 35Nipooba baye mɛ ale maa chaab a boro a num zom ate Wen jam pai ba wanyi a ta cheŋ alege nwala a zaani. 36Nuruba baye ale bo kaduk po a kpa ate Wen jam pai ba wanyi a ta cheŋ alege nwala a zaani.>> 37Wa ŋaaŋviirɔma yaa bek wa ayen, <<Ti Nyɔnɔ Yeezu Kirisita, ka bɛ ate nyaŋa de ale nye?>> Wa yaa tulisi ba ayen, <<Jakpiuk ale dua juijui la, duinsa a bo ka dula.>>

Currently Selected:

Luuk 17: BWU

Highlight

Copy