Matius 17

Yesus nangrihi nulu Musa irua Elia

Markus 9:2-13; Lukas 9:28-36

1Amar inean nelak roak, na Yesus novun Petrus, Yakobus irua warin a Yohanes, ma rvaꞌal vuar karatat isa, ma aksa ira watan naꞌa inyai. 2Ira rsiꞌik, na Yesus felan a naling roak Ia. Wahan a vanan ma wean lera, ovu vali afa ovi nung a neluk ra, rangiar urun ma rfitik-ryadat. 3Brian munuk, na rsiꞌik Musa irua Elia rvotuk ma rangrihi nulu Yesus. 4Ba Petrus nfalak verin Ia ne, “Duilaꞌa, lolin urun ma tnaꞌa wan ini. Ni lolin a amfadiri befak itelu, ma isa verin Oa, isa verin Musa, isa vali verin Elia.”

5Petrus nangrihi obin, na brian munuk mutan isa vanan urun ma nkum-teri irtelu. Ira rarenar vai isa ntali mutan ralan yai ne, “Ini Yanak i ulobang urun Ia. Ia notu ma ralang a lolin urun, ba mryenar afa ovi nfalak ra!”

6Yesus Ni tamata avyai rarenar vai yai, na rbobar urun ma rleka lahir rsuta lanun ma rtub-fangofak ira. 7Yesus nma ma nkena ira, beti nfalak ne, “Deka byobar, ba mdyiri kikyai!” 8Ba rvanung waharira ra ma rsiꞌik, na wol tamata roak naꞌa inyai. Yesus aꞌuk saꞌi nanaꞌa inyai.

Yesus Ni tamata ovi rorang Ia rorat naꞌa Elia

9Nata rsuta tali vuar ma rnaꞌa rira banbanan obin, na Yesus nsurak ira ne, “Deka fyamalik afa i mryea inlangin yai verin tamata ra veki. Mnyaban ma Ubu nfavaꞌat ewal Yaꞌa, Tamata Yanan Yaꞌa tali matmatan, beti fyamalik.”

10Ira rorat Ia ne, “Notu afakinimi Yahudi rira dawan ovi rair Musa ni inukun ra rfalak ne Elia nma ula ia, beti Raja i ntevut dida salasilan ra nma?”

11Yesus nfalak ne, “Kena, Elia nma ula ia, boma nasusan afakataka munuk. 12Naꞌuk ufalak verin mia ne, Elia nma roak, naꞌuk tamata ra wol rkaꞌa ia ma rotu tia ma watan ia. Wean inyai vali verin Yaꞌa Tamata Yanan Yaꞌa ini, veka utuan sian rivun ma tamata ra veka rwi-rwa Yaꞌa.” 13Naꞌut inyai beti Yesus Ni tamata ra rkaꞌa ne, Yesus nfamalik Yohanes i nbaptis tamata ra. Yohanes wean nabi Elia.

Yesus nalaꞌing vatuk nait sian tali kasikoꞌu brana isa

Markus 9:14-29; Lukas 9:37-43

14Yesus ovu Ni tamata itelu yai rsuta tali vuar yai ma rtuan tamata rivun. Tali tamata rivun avyai, na brana isa nma ma nsangatur naꞌa Yesus wahan ralan a ma nfalak ne, 15“Duilaꞌa, fara fwaturu Mu silobang a verin yanak brana. Ia ni suhut manut ma notu ma wean i nfoar, ba nawar ma dawan ia, ovu baꞌi nleka naꞌa yafralan ovu vali naꞌa wear. 16Yaꞌa ovun roak ia uma verin Mu tamata ovi rorang Oa, naꞌuk wol rot-nala ma lolin ia.”

17Yesus ntabu ira ma nfalak ne, “Wean inba mia? Wol bira inorang lahir ovu wol myorang afa ovi kena ra. Amar ifira vali ma udoku ovu mia ma utahang nal ralang ovu mia, tamata ovi wol bira inorang a? Myovun kasikoꞌu yai mya ini!” 18Ba Yesus nfareta nait sian i nleal kasikoꞌu yai ma nti talik ia. Nait sian yai nti talik lahir ia, ma lolin ewal ia.

19Afa yai nlia roak, beti Yesus ovu Ni tamata ovi rorang Ia rban-talik wan yai ma aksa ira watan, ma rorat Ia ne, “Afakinimi ami wol amaling nala nait sian yai?”

20Yesus nfalak verin ira ne, “Wol myot-nala, tevek bira inorang a kakoꞌu daꞌin. Afa i ufalak verin mia ini, kena urun! Ba wean i bira inorang a veran sesawi ni vatul watan, na bisma fyalak ma vuar yai nti wan liak, na vuar yai veka nti lahir, ba bis myot-nala afaka watan. [21Naꞌuk lingaꞌan isa watan ma milaꞌing vatuk nala nait sian i felan wean inyai. Musti miflurut verin Ubu ovu mtyolat.]”#17:21 Naskah mnanat boku wol rira ayat ini.

Yesus nfamalik ewal Ni matmatan a

Markus 9:30-32; Lukas 9:43-45

22Amar isa, na Yesus ovu Ni tamata ovi rorang Ia rasdovu ira naꞌa Galilea, ma nfalak verin ira ne, “Tamata ra veka rala Yaꞌa, Tamata Yanan Yaꞌa ini, verin tamata ra, 23ma rfedan Yaꞌa, naꞌuk amar itelu nelak, na Ubu veka nfavaꞌat ewal Yaꞌa.” Rarenar afa i Yesus nfalak yai, na ralarira ra lalau urun.

Yesus nbahir kulu verin Yahudi rira rahan dawan falurut

24Yesus ovu Ni tamata ovi rorang Ia raran ahu Kapernaum. Amar isa, na tamata ovi baꞌi rera babahir kulu verin Yahudi rira Rahan Dawan Falurut, ti ma rtuan Petrus ma rorat ia ne, “Mu guru nbahir kulu verin dida Rahan Dawan Falurut, te wahal?”#17:24 Lokat varat, na brana Yahudi ovi rira tuvu varat vutrua nrata musti rbahir kulu verin Yahudi rira Rahan Dawan Falurut. Babahir kulu ini veran rira kadi naꞌa amar irua.

25Petrus nfalak ne, “Ia nbahir kulu yai!” Nata nti rahan i Yesus nleal a mane norat afa yai tali Ia. Wol norat Yesus obin, na Yesus norat lan roak ia ne, “Simon, munovak aka naꞌa afa ini: raja ovi rnaꞌa lanit ivavan rfareta tamata aba ma rbahir kulu? Rera tali rira tamata ra, te tali tamata dakan ra?”

26Petrus nfalak ne, “Tali tamata dakan ra.”

Yesus nfalak ne, “Ba wean inyai, na raja rira tamata ra deka rbahir kulu. 27Naꞌuk totu ma ralarira deka sian ita, ba mtaha mu snar a ma ti mdava ian naꞌa danau. Mngal ian i bwing lan a, vavan a, na veka mrea kubang isa.#17:27 Kubang perak isa naꞌa vai Yunani naran stater, fyawan veran rira kubang perak koꞌu naran dirham, ifaꞌat. Stater isa naran ma tamata irua rbahir kulu verin Yahudi rira Rahan Dawan Falurut. Kubang yai naran ma tbahir kulu, ba mala ma bwahir kulu verin itrua.”

Currently Selected:

Matius 17: frd

Highlight

Copy