Ɨ̀fàʼì 2
2
Əzwî ə Zeŋɨ ə nyaʼa yeʼe ɨgwɨ ə bə̂d Kristo
1Ənɨ əni ə Pentekɔ̀s #2.1Pentekɔ̀s yɨ əni nɨ mɨ̀Jû nyaʼə jɨg əchwɨ̂ ənɨ mbɨ nyaʼa kwə̀ŋ ɨghɨ rɨ ə mbeŋ. À yɨə nyaʼa ɨni ɨwum tân ənɨ mbɨ nyaʼa jɨg Əchwɨ̂ ə Che-ɨgun. ə nyaʼa yeʼe kùʼ, bə̂d mɨjìm mbe nɨ nyaʼa ben ə Kristo nyaʼa fetɨ əsɨ ə mɔʼ. 2Əghɨ ə mɔʼɔ ə nyaʼa sàʼ kùm rɨkaŋ ɨghabɨ əfim ə nɨə chèə̀. Zɨə nyaʼa wò swi nəb jìm ze nɨ mbɨ nyaʼa chub ɨŋga. 3Mbɨ nyaʼa zə ɨghɨ mɔʼɔ nɨ nyaʼa ɨghabɨ tɨnemɨ ɨwid nɨ nyaʼa wo ghàpɨ̀ chub ɨgun ə wə̀d mɔʼ mɔʼ rəbɔʼ mɨ̀mə̌d. 4Əzwî ə Zeŋɨ ə nyaʼa swi ɨŋga mɨ̀mə̌d mɨjìm, əne mbɨ nyaʼa kɔ gham mɨŋgam ɨbeŋ cherə, ɨchî nɨ Əzwî ze ə nyaʼa naʼ ɨka əmbɨ mɨ̀mə̌d.
5À nyaʼa ənɨ ə nyùmə̀ we, mɨ̀Jû mbe nɨ nyaʼa nùŋ fîŋ ɨgun ə Ŋwiə̀ mbɨə nyaʼa ə Jèrusalèm. Mbɨ yɨə nyaʼə rɨŋga ɨbeŋ jìm mbe nɨ yeʼ ɨŋga ɨsɨg. 6Ənɨ mbɨ nyaʼa zu əghɨ ze nɨ nyaʼa kumɨ, ɨnɔ̂n bə̂d we nyaʼa wò fetɨ. Mbɨ nyaʼa yiirɨ ɨmbə̀ʼ ɨghəm nɨ wə̀d mɔʼ mɔʼ rəbɔʼ mɨ̀mə̌d nyaʼə zu ɨchî nɨ bə̂d mbe nɨ nyaʼa ben ə Kristo nyaʼə ghà ɨnû ənɨ i ɨŋgam əbeŋ. 7Ənû ze ə nyaʼa chè mɨ̀mə̌d, əne mbɨ nyaʼa yiirɨ biirɨ ni, “Ɨmbə̀ʼ bə̂d mbɔ̂ mɨjìm nɨə ghàmə̀ yɨ məGaliliî ə? 8Zɨə sɨ chè rɨ yè nɨ wə̀d mɔʼ mɔʼ rəbɔʼ na wɨə zu ənɨ mbɨə ghàm ənɨ i ɨŋgam əbeŋ ə? 9Tɨ̀ yɨ rɨ ə Patìà, rɨ ə Medìà bə̀ fɔrɨ rɨ ə Elàm; tɨ̀ yɨ rɨ ə Mèsòpòtemìà, rɨ ə Jùdeyà bə̀ fɔrɨ rɨ ə Kàpàdosìà; tɨ̀ yɨ rɨ ə Pontùs bə̀ fɔrɨ rɨ ə Esià; 10tɨ̀ yɨ rɨ ə Frigìà bə̀ fɔrɨ rɨ ə Pamfilià, rɨ ə Ijìpt bə̀ fɔrɨ rɨŋga ɨba ɨbeŋ mbe rɨ ə Libià ɨban ə Sìrin. Mba mɨmɔʼɔ yɨ rɨ ə Rom. 11Tɨ̀ yɨ mɨ̀Jû mbɨ ə bə̂d mbe nɨ fə beŋ tə fîŋ ben ənû ə Ŋwiə̀ mɨ̀Jû. Tɨ̀ yɨ rɨ ə Kret bə̀ fɔrɨ rɨ ə Àrebìà. Àyɨə mba mɨjìm mbɨə zu ənɨ mbɨə ghà ɨnû kyeŋ mbe nɨ Ŋwìə̀ ghɨ̌. Ɨ mbɨə ghàə̀ yeʼ ənɨ mba mɨŋgam əbeŋ.” 12Ənû ze ə nyaʼa chè mɨ̀mə̌d mɨjìm, ɨtu mɨ̀mə̌d bə̀ bùùrɨ̀, əne mbɨ nyaʼa kɔ biirɨ mbənə mbənə ni, “Əton ənɨ ənû zɔ̂ kɨ ni yè ə?”
13Mbɨ nyaʼə biirɨ əne, àyɨə mbɨ mɔʼɔ nyaʼa kɔ baʼrɨ mɨ̀mə̌d ghà ni, “Mbɨ fə nɔ be.”
Pità nyaʼa gham əmbɨ ɨnɔ̂n bə̂d we
14Pità nyaʼa nɔ̀ʼ təm rətiə mbɨ ə bə̂d tom mbe wum chɔ̀b mɔʼ, əne ghà əmbɨ ə bə̂d mbe ənɨ ə gɨ̂ kǎ kǎ ni, “Bə̂d rɨ ə Jùdeyà mbɨ ə bə̂d mɨ̀jìm mbe nɨə chub ə Jèrusalèm, mbə̀ zu mə̀ toʼrɨ əton ənɨ ənû zɔ̂ ɨ nən. 15Chəi mbaŋə̀ tɔ̂ kɨrɨ be mɨnoʼ ɨchî nɨ mbə̀ə kɔndɨə, ɨmbə̀ʼ ɨghəm nɨ tɨ̀nîn yɨə kɨrɨ i mɨ̀nyùmə̀ əbuə ɨsɔsɔ. 16Àyɨə wə̀d ɨ̀kə̀n Ŋwìə̀, Juèl nyaʼa ghà ɨmbə̀ʼ ənû zɔ̂ ni:
17Ŋwìə̀ ə ghà ni, ɨŋga ɨni mbe nɨ sɨ nwìə̀,
mə bɨrɨ cha mɨ Əzwî ɨgun ə bə̂d mɨjìm.
Mbə bɔn mbaŋə̀ mbɨ mbə bɔn məyi bɨrɨ gha mɨ ɨkə̂n.
Mbə ɨjɔŋ bɨrɨ zə tɨ̀taanɨ njə̀m.
Njə̀m bɨrɨ chè tə mbaŋə̀ te nɨ fə nunə.
18Ee, ɨŋga ɨni mbe, mə bɨrɨ cha mɨ Əzwî
ɨgun mbɨ bə̂d ə̀fàʼì mbaŋə̀ mbɨ mbɨ məyi,
əne mbɨ bɨrɨ gha mɨ ɨkə̂n.
19Mə bɨrɨ ghɨ ɨnû yiirɨ ɨkaŋ
bə̀ ghɨ̀ ɨnweenɨ-ɨnû ɨgwɨ ə si.
Mbə bɨrɨ zə ənəm, bə̀ zə ɨwid mbɨ ə ndiʼ.
20Nyùmə̀ bɨrɨ beŋ sɨə finə,
ɨmɨg bə̀ beŋ sɨə bàŋ ɨghabɨ ənəm,
bɔŋ əni ze nɨ Ə̀nùŋɨ̀sɨg bɨrɨ wɨrɨ yeʼe, nɨ yeʼ əni ə kyeŋ ze nɨ che ɨni jìm.
21Ɨgwɨ əni ze, wə̀d mɔʼɔ we nɨ tɔŋ ɨkum Ə̀nùŋɨ̀sɨg bɨrɨ jwɨ̀ rəŋgəʼ.
22“Mɨ̀Izre, mbə̀ zu ɨŋgam wɔ̂: Yeso we rɨ ə Nazàret yɨə wə̀d we nɨ Ŋwìə̀ nyaʼa chɔʼɔ. Ŋwìə̀ nyaʼa chè ənjìm məd ghɨ̀ ɨnû kyeŋ kyeŋ, ghɨ̀ ɨnû yiirɨ bə̀ ghɨ̀ ɨnweenɨ-ɨnû əkaʼ nən, ɨchî nɨ mbə̀ kaŋ kyerɨ. 23Ŋwìə̀ nyaʼa fə bè kyerɨ i, əne wɨ̀ nyaʼa nùŋ ni mbɨ bɨrɨ gywɨ ə Yeso wɔ̂ nàʼ ɨ nən, mbə ghɨ̀ ni bə̂d nɨə ghɨ̀ ɨnû rɨbɔ̀ŋ kòmbɨ̀ əməd əzed ə baʼnɨ, zwiirɨ. 24Àyɨə Ŋwìə̀ nyaʼa zwemnɨ əməd ɨchî nɨ wɨ̀ nyaʼa ghɨ ni tɨ ɨvɨ berɨ i ɨka ɨgwɨ məd, ɨmbə̀ʼ ɨghəm nɨ chəi ɨvɨ nyaʼa berɨ ɨka nɨ yim əməd. 25Ɨfɔ̂n Dèvîd nyaʼa ghà ɨmbə̀ʼ əməd ni,
Mə wɨə nyaʼa zə Ə̀nùŋɨ̀sɨg ənɨ mɨ ɨfě ɨghəm jìm.
Ɨ wɨ ənɨ mɨ əbɔ ə jɨgɨ ɨmbə̀ʼ tɨ ənû ə mɔʼɔ naʼ i ŋgəʼ ɨ num.
26Əne ɨghaʼi nyaʼa swi ɨŋga mɨ fîŋ,
mə bə̀ ghàm mbɨ ɨghaʼi.
Mɨ nyamnyod bɨrɨ wom ɨghɨ chɔ̀m mbe nɨ Ŋwìə̀ nyaʼa kàʼi,
27ɨmbə̀ʼ ɨghəm nɨ ka à bɨrɨ waʼ e əmɨ ɨŋga ɨsì
kɨ̀ bè sàŋ ni e Wə̀d Zeŋɨ bɔb.
28À fə ghɨ̀ mə kyerɨ mɨnə̂njɨ̀ ɨ̀tènɨ̀.
À bɨrɨ ghɨ̀ ni mɨ fîŋ swi mbɨ ɨghaʼi əwù ze nɨ à chubɨ mbɨ num.
29“Mbɨ bɔŋgɔb, mə we tɨ̀ mə ghà ɨ nən ni mə kyerɨ ni à yɨ rəsìʼ ni à mbǎʼ ɨnəbɨ, Dèvîd, nyaʼa kwɨ mbɨ tweŋ əməd. Ətu ɨsì əməd ə zɨ mbɨ na yeʼe pè rə̀chɔ̀ŋ. 30Ɨchî nɨ Dèvîd yɨə nyaʼə wə̀d ɨ̀kə̀n Ŋwìə̀, wɨ̀ nyaʼa kyerɨ ni Ŋwìə̀ nyaʼa fə kàʼ bə̀ kàn ni tə bɨrɨ nuŋ wan tɨ ənɨ əghaŋ əməd ni wɨ̀ jɨg ətən ɨfɔ̀n əməd. 31Wɨ̀ nyaʼa fə zə, əne wɨ̀ nyaʼa ghà ɨmbə̀ʼ ɨchî nɨ Wə̀d we nɨ Ŋwiə̀ zɔʼɔ nyaʼa berɨ zwemə. Wɨ̀ nyaʼa bə̀ ghà ni chəi Ŋwìə̀ bɨrɨ waʼ əməd ɨŋga ɨsì fɔrɨ ni ka nyamnyod məd bɨrɨ nɔ bɔb i. 32Ŋwìə̀ nyaʼa zwemnɨ ə Yeso wɔ̂. Mba mɨjìm yɨ mɨ̀zərɨmbin ənɨ ənû rəŋgu. 33Ŋwìə̀ fə nɔ̀ əməd ɨkaŋ, wɨ̀ chub əbɔ ə jɨgɨ əməd. Wɨ̀ fə bə̀ nɨŋ Əzwî ə Zeŋɨ ze nɨ Mbǎʼ məd nyaʼa kaʼi ni tə bɨrɨ naʼ ɨ nən. Əghɨ zɔ̂ nɨ mbə̀ə zəə bə̀ zuə yɨ Əzwî ə Zeŋɨ ze nɨ wɨ̀ cha ɨgwɨ na. 34Chəi Dèvîd nyaʼa wo ɨkaŋ, àyɨə wɨ̀ nyaʼa ghà ni,
Ə̀nùŋɨ̀sɨg ə ghà əmbɨ mɨ Ə̀nùŋɨ̀sɨg ni
chub ənɨ mɨ əbɔ ə jɨgɨ
35pè ənɨ mə̀ fə baŋ mbe bə̂d pə̀n ghɨ̀ mbɨ yeʼ ɨghɨ nɨ à bɨrɨ teerɨ mbe ɨwu ɨgun.
36“Əne mɨ̀Izre mɨ̀jìm kyerɨ ni à yɨə kwàʼ rəsìʼ ni Ŋwìə̀ nyaʼa fə nùŋ ə Yeso wɔ̂ nɨ mbə̀ nyaʼa kombɨ əzed ə baʼnɨ ənɨ Ə̀nùŋɨ̀sɨg bə̀ fɔrɨ ənɨ Wə̀d we nɨ wɨ̀ zɔʼɔ.”
37Ənɨ bə̂d mbe nyaʼa zu ənû zɔ̂, zɨə nyaʼa zum fîŋ tɨ mɨ̀mə̌d, əne mbɨ nyaʼa biirɨ əmbɨ Pità mbɨ ə bə̂d tom mbə ni, “Bɔŋgɔb, tɨ̀ ghɨn ye ə?”
38Pità nyaʼa wììrɨ̀ əmbɨ mɨ̀mə̌d ni, “Wə̀d mɔʼ mɔʼ rəbɔʼ nən beŋ i fîŋ, nɨŋ mɨnib ənɨ ɨkum Yeso Kristo, ɨmbə̀ʼ Ŋwìə̀ waʼ mbə ɨnû rɨbɔ̀ŋ. Mbə mɨ ghɨ̀ əne, mbə bɨrɨ berɨ ɨneʼe nɨ yeʼ Əzwî ə Zeŋɨ. 39Ənû zɔ̂ nɨ Ŋwìə̀ nyaʼa kaʼi yɨ ɨ nən, yɨ əmbɨ mbə bɔn bə̀ fɔrɨ əmbɨ ə bə̂d mɨ̀jìm mbe nɨ yeʼ əsa əgha, əne yɨə wə̀d jìm we nɨ Ŋwìə̀ a Ə̀nùŋɨ̀sɨg tɔŋ ni wɨ̀ yeʼe əsɨ ni.”
40Pità nyaʼa ghà mɨŋgam cherə nɔnɔʼ əmbɨ mɨ̀mə̌d, kəərɨ mɨ̀mə̌d ghà ni, “Mbə̀ jwɨ rɨ ɨŋga ŋgəʼ ze nɨ bɨrɨ nyɨ ɨgwɨ ɨghəm bə̂d wɔ̂ nɨə ghɨ̀ ɨnû rɨbɔ̀ŋ.” 41Bə̂d mbe nɨ nyaʼa zu ɨŋgam məd benɨ, nyaʼa nɨŋ mɨnib. Bə̂d mbe nɨ nyaʼa yì əbɔʼ bə̂d Kristo əni ze yɨə nyaʼa ɨghabɨ ə chuʼ rɨtad. 42Mbɨ nyaʼa zɨ ətu ənɨ ɨnû mbe nɨ bə̂d tom Kristo nyaʼə chwiə. Ɨ mbɨə nyaʼa ənɨ ɨfɔtɨ, əne ɨ mbɨə nyaʼə bəʼrɨə ŋgə̀ŋ jɨg ɨnɔ̂n bə̀ kɔŋgɨ ə Ŋwiə̀ ɨnɔ̂n.
Ɨchî nɨ bə̂d mbe nɨ nyaʼa ben ə Kristo nyaʼə chubə
43Ŋwìə̀ nyaʼa ghɨ̀ ɨnû yiirɨ bə̀ ghɨ̀ ɨnweenɨ-ɨnû nɔnɔʼ ənjìm bə̂d tom Kristo mbe. Əze ə nyaʼa ghɨ̀ ni ɨbɔɔ nyɨ ɨgwɨ ə wə̀d jìm. 44Bə̂d mɨ̀jìm mbe nɨ nyaʼa ben ə Kristo nyaʼa chub ənɨ ənû ə mɔʼ. Mbɨ nyaʼa bə̀ berɨ mbə ɨghɨ ənɨ mbɨ mɔʼ. 45Ɨ mbɨə nyaʼə fèndɨ̀ mbə ɨsɨ si bə̀ fèndɨ̀ ɨghɨ mbe nɨ mbɨ nyaʼa berɨ wò ghàpɨ̀ ɨkab we əmbɨ ə wə̀d jìm ɨchî nɨ wə̀d mɔʼ mɔʼ nyaʼa kəbɨ. 46Ɨ mbɨə nyaʼə fɔtɨə wò ə mbàn Ŋwìə̀ ɨni jìm ɨnɔ̂n. Ɨ mbɨə nyaʼə bəʼrɨə ŋgə̀ŋ ɨŋga mbə ɨkwɨ bə̀ fɔtɨə jɨgə mbɨ ɨghaʼi fɔrɨ mbɨ ə fîŋ chɔ̀m. 47Ɨ mbɨə nyaʼə bə̀ yiirɨ ə Ŋwiə̀ ɨnɔ̂n. Bə̂d mɨjìm nyaʼa bə̀ ghaʼ mɨ̀mə̌d. Ə̀nùŋɨ̀sɨg wɨə nyaʼə yìə̀ bə̂d mbe nɨ nyaʼə jwɨ̀ rəŋgəʼ əbɔʼ ɨnun mɨ̀mə̌d ɨni jìm.
Currently Selected:
Ɨ̀fàʼì 2: mgo
Highlight
Share
Copy
Want to have your highlights saved across all your devices? Sign up or sign in
© 2013, Cameroon Association for Bible Translation and Literacy
