Jn 11

Yeso nyaʼa zwemnɨ ə Lazarɔ̀s

1Mbaŋə̀ mɔʼɔ nɨ ɨkum məd nyaʼə Lazarɔ̀s nyaʼə wɔ̀nə̀. Wɨ̀ nyaʼə chub ə Betanì mbɨ ti njàbɨ nɨ tɨkum tɨ mɨ̀mə̌d nyaʼə Mèri mbɨ Màta. 2Mèri we nɨ nobɨ məd nɨ nyaʼə Lazarɔ̀s nyaʼə wɔ̀nə̀ yɨ we nɨ nyaʼa zɔʼ Ə̀nùŋɨ̀sɨg ənɨ mɨwud bə̀ fu ɨwu məd ənɨ ti nyôŋ rɨ ətu. #11.2Mbə̀ zə Jn 12.3; Lk 7.38; Mk 14.3. 3Məyi mbɔ̂ mɨbe nɨ nyaʼə bɔŋgɔb nyaʼa tom ɨkə̂n əmbɨ Yeso ni, “Ə̀nùŋɨ̀sɨg, e sə̀ʼ we nɨ à kaŋ ghaʼ wɨə wɔ̀nə̀.”

4Ənɨ Yeso nyaʼa zu ənû zɔ̂, wɨ̀ nyaʼa ghà ni, “Kaʼ Lazarɔ̀s bɨrɨ kwɨ i ɨmbə̀ʼ əwɔn zɔ̂. Àyɨə zɨə bɨrɨ ghɨ ni bə̂d wumnɨ ə Ŋwiə̀ bə̀ wumnɨ Wan Ŋwìə̀.”

5Yeso nyaʼa ghaʼ ə Màta, ghaʼ aŋgɔb məd bə̀ ghaʼ ə Lazarɔ̀s. 6Àyɨə ənɨ wɨ̀ nyaʼa zu ni Lazarɔ̀s wɨə wɔ̀nə̀, wɨ̀ nyaʼa wɨrɨ chub ɨni be əsɨ ze nɨ wɨ̀ nyaʼa əŋgu. 7Ənɨ ɨni mbɔ̂ be nyaʼa fə che i, wɨ̀ nyaʼa ghà əmbɨ mbi mə̀mə̀ə̀nɨ̀-ɨnû ni, “Tɨ wɨrɨ bə̀ndɨ̀ wò ə Jùdeyà.”

8Mə̀mə̀ə̀nɨ̀-ɨnû mbe nyaʼa gha ɨ bɔ ni, “Əchwiə̀-ɨnû, chəi əgha ə kɨrɨ sa nɨ mɨ̀Jû nyaʼə kə̀b tumbɨ əwe ənɨ əti, əne à wɨə kɨrɨ kəb wo əŋgu ə?”

9Yeso nyaʼa wììrɨ̀ ni, “Ɨmbə̀ʼ mɨ̀awà wum chɔ̀b rɨ̀be mbɨ ɨŋga əni ə mɔʼ ə? À mɨ yeʼ nɨ wə̀d ə yèn əziə, chəi ənɨ tɨ̀ wɨ̀ te əwu ənɨ əghɨ ə mɔʼɔ, ɨmbə̀ʼ ɨghəm nɨ ɨ wɨə zə ɨzeŋɨ zeŋɨ we nɨə te ɨŋga ɨsɨg. 10Àyɨə wə̀d mɔʼɔ mɨ yèn ɨzimɨ, wɨ̀ bɨrɨ te ɨwu ənɨ ɨghɨ ə mɔʼɔ ɨmbə̀ʼ ɨghəm nɨ chəi ɨsɨ ə zeŋə.” 11Wɨ̀ nyaʼa ghɨ əne, ghà əmbɨ mɨ̀mə̌d ni, “A sə̀ʼ we nɨ mbɨə tɔŋ ənɨ ə Lazarɔ̀s fə feŋ əŋgwenɨ, àyɨə mə bɨrɨ wò nɔ əməd.”

12Mə̀mə̀ə̀nɨ̀-ɨnû mbe nyaʼa wììrɨ̀ ɨ bɔ ni, “Ə̀nùŋɨ̀sɨg, wɨ̀ mɨ fə feŋ əŋgwenɨ njɨ wɨ̀ bɨrɨ bɔtɨ i.” 13Yeso wɨə nyaʼə ghà ɨmbə̀ʼ ɨvɨ məd, àyɨə mbɨ nyaʼə kɔndɨə ni ɨ wɨə gwenə. 14Əne Yeso nyaʼa sɨ ghà əmbɨ mɨ̀mə̌d əsaŋ əsaŋ ni, “Lazarɔ̀s fə kwɨ, 15àyɨə ɨmbə̀ʼ ə ɨghəm, mə ghaʼ ɨchî nɨ chə nyaʼa i əmɨ əŋgu, ɨmbə̀ʼ mbə̀ che ənjìm ənû zɔ̂ benɨ. Tɨ̀ wo əsɨ məd.” 16Tomas, nɨ mbɨ nyaʼə bə̀ tɔŋ ənɨ ə Didimùs, əne yɨ ni, wan ŋwìə̀, nyaʼa ghà əmbɨ mə̀mə̀ə̀nɨ̀-ɨnû mbə ni, “Tɨ̀ bə wò mbɨ Ə̀nùŋɨ̀sɨg, ɨmbə̀ʼ à mɨ yeʼ ənû nɨ wɨ̀ bɨrɨ kwɨ, tɨ̀ bə̀ kwɨ mbɨ məd!”

Yeso yɨə wə̀d we nɨə zwemnɨə bə̂d bə̀ nàʼ ɨ̀tènɨ̀

17Ənɨ Yeso nyaʼa pe əŋgu, wɨ̀ nyaʼa zə ni Lazarɔ̀s nyaʼa fə sɨ ɨŋga sì ɨni kwè. 18Ɨ nɔʼ rɨ ə Betanì wò ə Jèrusalèm yɨə nyaʼa ɨghabɨ mɨ̀kilometà mɨ̀tad. #11.18Əne yɨ ɨghabɨ mɨ̀mail mɨ̀be. 19Mɨ̀Jû nɔnɔʼ nyaʼa nɔ̀ʼ rɨ ə Jèrusalèm wò əsɨ Màta mbɨ Mèri ɨ nəərɨ mɨ̀mə̌d ɨmbə̀ʼ ɨchî nɨ nobɨ mɨ̀mə̌d nyaʼa kwɨ. 20Ənɨ Màta nyaʼa zu ni Yeso wɨə yeʼe, wɨ̀ nyaʼa jwɨ̀ wò bòm əməd, àyɨə Mèri nyaʼa chub ɨŋga nəb. 21Màta nyaʼa ghà əmbɨ Yeso ni, “Ə̀nùŋɨ̀sɨg, à kɨə kəʼ əgha njɨ chəi mɨ nobɨ kwɨ. 22Àyɨə mə kyerɨ ni ka à bei tɨ̀nîn, ənû ə mɔʼɔ ze nɨ à biirɨ əmbɨ ə Ŋwiə̀, wɨ̀ bɨrɨ ghɨ ɨ ne.”

23Yeso nyaʼa ghà ɨ bɔ ni, “E nobɨ bɨrɨ wɨrɨ zwemə.”

24Màta nyaʼa wììrɨ̀ ɨ bɔ ni, “Mə kyerɨ ni wɨ̀ bɨrɨ wɨrɨ zwemə əni ze nɨ sɨ nwìə̀.”

25Yeso nyaʼa ghà ɨ bɔ ni, “Mɔ̌ yɨə wə̀d we nɨə zwemnɨə bə̂d bə̀ yeʼ we nɨə nàʼ ɨ̀tènɨ̀. Wə̀d we nɨ ben əmɨ bɨrɨ wɨrɨ chub ɨkǎ, ka wɨ̀ bè kwɨ i. 26Kaʼ wə̀d mɔʼɔ we nɨ yeʼ i ɨkǎ nɨ ben əmɨ bɨrɨ nɔ kwɨ i. À ben ənû zɔ̂ ə?” 27Màta nyaʼa wììrɨ̀ ɨ bɔ ni, “Ee, kyɨ Ə̀nùŋɨ̀sɨg, mə ben ni àwɔ̀ yɨə Wə̀d we nɨ Ŋwìə̀ zɔʼɔ, bə̀ ben ni àwɔ̀ yɨə Wan Ŋwìə̀ we nɨ nyaʼa wo yeʼe ɨŋga ɨsɨg.”

Yeso nyaʼa chweŋ mɨsɨ

28Ənɨ Màta nyaʼa gha ənû zɔ̂, wɨ̀ nyaʼa wò tɔŋ ə Mèri, aŋgɔb məd, nyeʼ chùmbɨ̀ ɨ bɔ ni, “Əchwiə̀-ɨnû wɨ əgha. Ɨ wɨə tɔŋ əwe.” 29Ənɨ Mèri nyaʼa zu əne, wɨ̀ nyaʼa gàd əwu əwən nɔ̀ʼ wò əsɨ məd. 30Chəi Yeso nyaʼa kɨrɨ nyɨ ɨŋga əsɨ ze. Ɨ wɨə nyaʼa kɨrɨ əsɨ ze nɨ Màta nyaʼa bòm əməd. 31Ənɨ mɨ̀Jû mbe nɨ nyaʼa ɨŋga nəb mbɨ Mèri, nəərɨ əməd, nyaʼa zə ɨchî nɨ wɨ̀ nyaʼa gad əwu əwən nɔ̀ʼ rətiə jwɨ̀ ɨsɨg, mbɨ nyaʼa beenɨ əbɔʼ məd. Mbɨ nyaʼa kɔndɨ ni ɨ wɨə wò di ətu ɨsì.

32Ənɨ Mèri nyaʼa wò əsɨ ze nɨ Yeso nyaʼa əŋgu, pè zə əməd, wɨ̀ nyaʼa gù ɨban ɨwu məd ghà ni, “Ə̀nùŋɨ̀sɨg, à kɨə kəʼ əgha njɨ chəi mɨ nobɨ kwɨ.”

33Ənɨ Yeso nyaʼa zə ɨchî nɨ wɨ̀ nyaʼə dìə̀, bə̀ zə ɨchî nɨ mɨ̀Jû mbe nɨ nyaʼa mbɨ məd nyaʼa bə̀ dìə̀, ənû ze ə nyaʼa betɨ əməd bə̀ tɔb əməd kwàʼ rɨŋgəʼ. 34Əne wɨ̀ nyaʼa biirɨ ni, “Mbə nuŋ əvɨ əməd ɨŋga sì wi ə?”

Mbɨ nyaʼa wììrɨ̀ ni, “Ə̀nùŋɨ̀sɨg, yeʼe zə.”

35Yeso nyaʼa chweŋ mɨsɨ.

36Mɨ̀Jû mbe nyaʼa zə əne ghà ni, “Mbə̀ zə ɨchî nɨ wɨ̀ nyaʼa kaŋ ghaʼ əməd!”

37Àyɨə mbɨ mɔʼɔ rəbɔʼ mɨ̀mə̌d nyaʼa ghà ni, “Wɨ̀ nyaʼa ghɨ̀ ni mbaŋə̀ ze nɨ nyaʼa fɨgə wɨrɨ kɔ zə ɨsɨ, əne chəi ənɨ tɨ̀ wɨ̀ kə̀ʼ ghɨ̀ ni tɨ Lazarɔ̀s kwɨ i ə?”

Yeso nyaʼa zwemnɨ ə Lazarɔ̀s

38Ənû ze ə nyaʼa yì bètɨ̀ ə Yeso, əne wɨ̀ nyaʼa wò ətu ɨsì ze. Ɨsî we yɨə nyaʼa ɨsum. Mbɨ nyaʼa kubrɨ ɨchû ɨsum we ənɨ ɨti. 39Ənɨ Yeso nyaʼa pè əŋgu, wɨ̀ nyaʼa ghà ni, “Mbə̀ chɨ ɨti wɔ̂!”

Màta nɨ nyaʼə njàbɨ mbaŋə̀ ze nɨ nyaʼa kwɨ, nyaʼa ghà ɨ bɔ ni, “Ə̀nùŋɨ̀sɨg, mə kyerɨ ni ɨfɔ wɨə sɨə jwɨ̀ə̀, ɨmbə̀ʼ ɨghəm nɨ rə̀chɔ̀ŋ yɨ ɨni kwè nɨ wɨ̀ fə kwɨ.”

40Yeso nyaʼa ghà ɨ bɔ ni, “Ɨmbə̀ʼ mə kə̀ʼ gha ɨ ne ni à mɨ benɨ, à bɨrɨ zə ɨka Ŋwiə̀ ə?” 41Mbɨ nyaʼa chɨ̀ ɨti we. Əne Yeso nyaʼa neŋ ɨkaŋ ghà ni, “Mɨ Mbǎʼ, məben-əwe ɨchî nɨ à fə zu ənû ze nɨ mə̀ gha ɨ ne. 42Mə kyerɨ ni à wɨə zu ɨnû mbe nɨ mɨə ghà ɨ ne ɨghəm jìm, àyɨə mə kə̀ʼ ghà əzɔ̂ ɨmbə̀ʼ bə̂d mbɔ̂ nɨ təmbɨ ɨban num, ɨmbə̀ʼ mbɨ ben ni à yɨ àwɔ̀ nyaʼa tom əmɨ.” 43Ənɨ wɨ̀ nyaʼa gha ənû zɔ̂, wɨ̀ nyaʼa kyeŋ rɨkǎ ghà ni, “Lazarɔ̀s, jwɨə yeʼe!” 44Lazarɔ̀s nyaʼa jwɨ̀, kɨrɨ mbɨ tɨbabɨ ngywɨ̌ te nɨ mbɨ nyaʼa nib ɨwu məd mbɨ ɨbɔ məd fɔrɨ mbɨ ze nɨ mbɨ nyaʼa nib ɨfě məd əŋgu. Ənɨ wɨ̀ nyaʼa jwɨ̀ əne, Yeso nyaʼa ghà əmbɨ bə̂d mbe nɨ nyaʼa əŋgu ni, “Mbə̀ za tɨbabɨ ngywɨ te, sàŋ ni wɨ̀ wò i.”

Mbɨ nyaʼa taŋ mɨnaŋ ɨmbə̀ʼ zwiirɨ ə Yeso

(Mt 26.1-5; Mk 14.1-2; Lk 22.1-2)

45Mɨ̀Jû nɔnɔʼ rəbɔʼ mbe nɨ nyaʼa wo chwi ɨfě əmbɨ Mèri nyaʼa zə ənû ze nɨ Yeso nyaʼa ghɨ̌, əne mbɨ nyaʼa ben əməd. 46Àyɨə mbɨ mɔʼɔ rəbɔʼ mɨ̀mə̌d nyaʼa wò əsɨ mɨ̀Farisiî, pè ghà ənû ze nɨ Yeso fə ghɨ̌. 47Əne bə̂d kyeŋ mbe rɨ ə mbàn Ŋwìə̀ mbɨ mɨ̀Farisiî nyaʼa tɔŋ ɨfetɨ mə̀saʼ əbeŋ ghà ni, “Tɨ kɨə kaŋ wo ghɨ ye ə? Mbaŋə̀ zɔ̂ zɨə ghɨ̀ ɨnû yiirɨ nɔnɔʼ! 48Tɨ̀ mɨ sàŋ ni wɨ̀ wo ɨmbì ənɨ əkwɨ ɨchî wɔ̂, njɨ wə̀d jìm bɨrɨ ben əməd, əne məRom bɨrɨ yeʼe nimnɨ a mbàn Ŋwìə̀ bə̀ nimnɨ a əbeŋ.”

49Ənɨ mbɨ nyaʼa ghà əne, wɨ mɔʼɔ rəbɔʼ mɨ̀mə̌d, nɨ ɨkum məd nyaʼə Kaifàs, nɨ nyaʼa ətu ɨgwɨ ə bə̂d mbàn Ŋwìə̀ əghəm əwù ze, nyaʼa ghà əmbɨ mɨ̀mə̌d ni, “Mbə̀ yɨə kàŋ ɨneŋ! 50Chəi mbə̀ kyerɨ ni zɨə bɔ̀ŋ ni wə̀d mɔʼ kwɨ ɨgwɨ ətu ə bə̂d chè ɨchî nɨ əbeŋ əjìm ə bɨrɨ nim ə?” 51Chəi wɨ̀ nyaʼa ghà ənû zɔ̂ ənɨ i ɨghəm, àyɨə ɨchî nɨ wɨ̀ yɨə nyaʼə ətu ɨgwɨ ə bə̂d mbàn Ŋwìə̀ əghəm əwù ze, wɨ̀ nyaʼa gham ɨghabɨ ə wə̀d ɨ̀kə̀n Ŋwìə̀ ni Yeso bɨrɨ kwɨ ɨgwɨ ətu əbeŋ mɨ̀Jû. 52Chəi wɨ̀ bɨrɨ kwɨ àmei ɨgwɨ ətu mɨ̀mə̌d, wɨ̀ berɨ bɨ kwɨ ɨmbə̀ʼ fɔtɨ bɔn Ŋwiə̀ mɨ̀jìm mbe nɨ jaŋ ɨŋga ɨsɨg.

53Ɨ kɔ rɨ əni ze, mbɨ nyaʼa kɔ taŋ mɨnaŋ ɨmbə̀ʼ zwiirɨ ə Yeso. 54Əne chəi Yeso nyaʼə wɨrɨə yèn əsaŋ əsaŋ əkaʼ mɨ̀Jû. Wɨ̀ nyaʼa nɔ̀ʼ wo əsɨ ze nɨ mbɨ nyaʼə tɔŋ ənɨ ə Efrèm, nɨ nyaʼa ɨban ɨbad rɨkwàʼi. Wɨ̀ nyaʼa pè chub əŋgu mbɨ mbi mə̀mə̀ə̀nɨ̀-ɨnû.

55Nyùmə̀ Əchwɨ̂ ə Che-ɨgun nyaʼa fə tiinɨ, əne bə̂d mɨ̀nɔnɔʼ nyaʼa nɔ̀ʼ rɨŋga ɨsɨ mbe nɨ nyaʼa ɨban ɨban wò ə Jèrusalèm ɨmbə̀ʼ zeŋnɨ ə ɨnyod, bɔŋ mbɨ sɨə jɨg əchwɨ̂ ze. 56Mbɨ nyaʼə kə̀b ə Yeso, əne mbɨ nyaʼə ghàə̀ mbənə mbənə ənɨ mbɨ nyaʼa fetɨ ɨŋga mbàn Ŋwìə̀ ni, “Mbə kɔn əzən ni yè ə? Ni ka wɨ̀ bɨrɨ yeʼe i ənɨ əchwɨ̂ zɔ̂ ə?” 57Bə̂d kyeŋ mbe rɨ ə mbàn Ŋwìə̀ mbɨ mɨ̀Farisiî nyaʼa fə ghà ni wə̀d mɔʼɔ mɨ kyerɨ əsɨ ze nɨ Yeso yeʼ əŋgu, wɨ̀ ghɨ mbə̀ kyerɨ, ɨmbə̀ʼ mbə̀ gywɨ əməd.

Currently Selected:

Jn 11: mgo

Highlight

Copy