Lk 21

Əghɨ nɨ ɨku əyi nyaʼa chəmnɨ ə Ŋwiə̀ əŋgu

(Mk 12.41-44)

1Yeso wɨə nyaʼa ɨŋga mbàn Ŋwìə̀, əne wɨ̀ nyaʼa nɔ̀ɔ̀rɨ̀ ətu zə ɨchî nɨ bə̂d mbɔ̂n nyaʼə zɨ̀ ɨkab ɨŋga rɨkub ze nɨ mbɨə zɨə ɨchəmnɨ Ŋwìə̀ ɨŋga. 2Wɨ̀ nyaʼa bə̀ zə ɨku əyi kwaŋ mɔʼɔ nɨ nyaʼa zɨ mɨ̀fraŋ tân mɨ̀be #21.2Ɨŋga 'Ə̀ŋwàʼnɨ̀ ə Ŋwiə̀ à yɨ ni “mɨ̀kɔpà be.” Kɔpà yɨ ɨkab nɨ nyaʼa kə chè ɨkab jìm ɨŋga Izre. ɨŋga rɨkub ze. 3Wɨ̀ nyaʼa zə əne ghà ni, “Mə ghà rəsìʼ ɨ nən ni ɨku əyi kwaŋ wɔ̂ fə zɨ̀ ɨkab ɨŋga rɨkub ze chè bə̂d mbə mɨ̀jìm. 4Bə̂d mbə mɨjìm fə nàʼ ɨkab tɨ̀ ənɨ wɨ̀ nɔnɔʼ, àyɨə məd we nɨ yeʼ əyi kwaŋ fə kùtɨ̀ ə̀bàmɨ̀ zɨ̀ ɨkab jìm we nɨ wɨ̀ berɨ.”

Yeso nyaʼa ghà ɨmbə̀ʼ ɨchî nɨ mbɨ bɨrɨ nɨ saʼ mbàn Ŋwìə̀

(Mt 24.1-2; Mk 13.1-2)

5Bə̂d mɔʼɔ nyaʼə ghà ɨmbə̀ʼ mbàn Ŋwìə̀, ɨchî nɨ mbɨ bɔm yèʼ ənɨ əti əka ɨnùn fɔrɨ ənɨ ɨghɨ mbe nɨ mbɨə chəmnɨ ə Ŋwìə̀ əŋgu. Yeso nyaʼa ghà ni, 6“Ɨchî nɨ mbə̀ə zə ɨghɨ mbɔ̂, ɨni mɔʼɔ bɨrɨ yeʼe nɨ chəi ɨti mɔʼ bɨrɨ chub ɨgun wɨ cherə. Mbɨ bɨrɨ kɔd əti ze əjìm ə si.”

Mə̀mə̀ə̀nɨ̀-ɨnû Yeso bɨrɨ zə ŋgəʼ, mbɨ bə̀ nwèndɨ̀ tɨkyerɨ-ɨwu mɨ̀mə̌d

(Mt 24.3-14; Mk 13.3-13)

7Mə̀mə̀ə̀nɨ̀-ɨnû Yeso nyaʼa biirɨ ɨ bɔ ni, “Əchwiə̀-ɨnû, ənû zɔ̂ ə kɨə wò ghɨ̀ əwù zi ə? Ənweenɨ ze nɨ bɨrɨ chwi ni nyùmə̀ fə kùʼ nɨ ənû zɔ̂ ə bɨrɨ ghɨ̀ kɨə zi ə?”

8Wɨ̀ nyaʼa wììrɨ̀ ni, “Mbə we əwən ɨmbə̀ʼ tɨ wə̀d mɔʼɔ ghɨ i ni mbə̀ febə, ɨmbə̀ʼ ɨghəm nɨ bə̂d mɨ̀nɔnɔʼ bɨrɨ yeʼe nɨŋ mɨ ɨkum yènə̀ ghàə̀ ni, 'Mə yɨ wɨwən!' fɔrɨ ni, 'Nyùmə̀ fə tiinɨ!' Tɨ̀ mbə beenɨ ə əbɔʼ mɨ̀mə̌d. 9Ənɨ mbə̀ zu ni ɨbeŋ mbɨə màʼə̀ bid, bə̀ zu ni bə̂d ɨŋga ɨbeŋ mbɨə chɔbə, tɨ̀ mbə̀ bɔ ə, ɨmbə̀ʼ ɨghəm nɨ ɨnû mbɔ̂ berɨ be ghɨ̀, àyɨə chəi ɨsɨg bɨrɨ kɨrɨ nwi ənɨ ə nyùmə̀ we.”

10Yeso nyaʼa yì ghà əmbɨ mɨ̀mə̌d ni, “Ɨbeŋ bɨrɨ maʼ bid mbɨ ɨbeŋ cherə. Ɨbeŋ nɨ mɨfɔ̂n ə tùmbɨ̀ə̀ bə̀ màʼ bid mbɨ ɨbeŋ cherə nɨ mɨfɔ̂n ə tùmbɨ̀ə̀. 11Si bɨrɨ wùd kwàʼ rɨ̀kǎ, njì kǎ kǎ mbɨ ɨwɔn rɨbɔ̀ŋ bɨrɨ jwɨ̀ ɨsɨ ɨsɨ, ənû nɨ bə̂d bɨrɨ neŋ bɔ mbɨ ɨnweenɨ ɨnû yiirɨ bɨrɨ jwɨ̀ rɨkaŋ. 12Àyɨə bɔŋ ɨnû mbɔ̂ jìm sɨə ghɨ̀ə̀, mbɨ bɨrɨ gywɨ əwən, nwèndɨ̀ tə rɨkyerɨ-ɨwu, nàʼ əwən ni mbɨ saʼ ɨŋga nəb rɨ ə̀kàtɨ̀, zɨ̀ əwən ə ndəŋ bə̀ nɨŋ əwən wò ɨfě mɨfɔ̂n mbɨ ɨfě mɨ̀gɔmnà ɨmbə̀ʼ əmɨ. 13Əzɔ̂ ə bɨrɨ yeʼ əpan ɨ nən nɨ gha ɨkə̂n chɔ̀m. 14Mbə̀ fə nùŋ ɨŋga tə fîŋ ni chəi mbə bɨrɨ nwìʼ ɨnyod ɨmbə̀ʼ ɨchî nɨ mbə̀ bɨrɨ chɨ ɨnû rɨ ɨgwɨ nən, 15ɨmbə̀ʼ ɨghəm nɨ mə bɨrɨ naʼ ɨŋgam fɔrɨ ɨwe ɨ nən nɨ chəi wə̀d mɔʼɔ rəbɔʼ mbə bə̂d pə̀n we tɨ̀ wɨ̀ təm mbɨ nən kɨ̀ bè ton ɨŋgam we. 16Mbə mɨ̀mbǎʼ mbɨ mbə mɨ̀nɨ̌ŋ, mbə bɔŋgɔb, ə ɨnəbɨ mbɨ mbə mɨ̀sə̀ʼ bɨrɨ fen əwən, mə̀tùmbɨ̀ bə̂d bə̀ zwiirɨ mbɨ mɔʼɔ rəbɔʼ nən. 17Bə̂d mɨ̀jìm bɨrɨ ban əwən ɨmbə̀ʼ əmɨ. 18Àyɨə chəi nyôŋ ətu mɔʼ rɨ ɨgwɨ mbə ɨtu bɨrɨ nim. 19Mbə mɨ nyìʼ, mbə bɨrɨ jɨg ɨ̀tènɨ̀ rəsìʼ.

Yeso nyaʼa ghà ɨmbə̀ʼ ɨchî nɨ mbɨ bɨrɨ chəkɨ ə Jèrusalèm

(Mt 24.15-21; Mk 13.14-19)

20“Ənɨ mbə zə ni mɨnɔ̂n mɨ̀sɔgyɨ̀ fə kad ə Jèrusalèm, mbə̀ kyerɨ ni nyùmə̀ we nɨ mbɨ bɨrɨ chəkɨ ə Jèrusalèm fə tiinɨ. 21Əne bə̂d mbe nɨ yeʼ ə Jùdeyà berɨ nod wò ɨkaŋ rɨwum, mbe nɨ yeʼ ɨŋga əbeŋ berɨ jwɨ̀. Tɨ mbe nɨ yeʼ ɨban ɨban nyɨ ə ɨŋga əbeŋ, 22ɨmbə̀ʼ ɨghəm nɨ ɨŋga ɨni mbe, Ŋwìə̀ bɨrɨ sə ɨtəm, əne zɨ̀ ɨchə ɨgwɨ ə bə̂d ɨmbə̀ʼ ɨnû rɨbɔ̀ŋ mɨ̀mə̌d. Əne yɨ ɨmbə̀ʼ ɨnû jìm mbe nɨ mbɨ nyaʼa ŋwaʼnɨ jwɨ ənɨ rəsìʼ. 23Ŋgəʼ bɨrɨ nyɨ ɨgwɨ məyi mbe nɨ yeʼ rɨ̀bùmə̀, bə̀ nyɨ ɨgwɨ mbe nɨə nyɔŋə bɔn ɨŋga ɨni mbe! Ŋgəʼ rɨbɔ̀ŋ bɨrɨ yeʼe ɨgwɨ ə si, Ŋwìə̀ bə̀ sə ɨtəm əbɔʼ mɨ̀Jû. 24Bə̂d mɔʼɔ bɨrɨ kwɨ ɨchû ɨbi. Mbɨ bɨrɨ nɨŋ mbɨ mɔʼɔ ənɨ ɨ̀bòʼò wò ɨŋga ɨbeŋ jìm. Bə̂d mbe nɨ kaʼi mɨ̀Jû bɨrɨ baŋ ə Jèrusalèm, tùmbɨ̀ mɨ̀mə̌d bə̀ nyèm mɨ̀mə̌d pè ənɨ ɨni mbe nɨ Ŋwìə̀ nyaʼa nuŋ ni ɨnû mbɔ̂ bɨrɨ ghɨ fə yeʼe mì i.”

Wan Wə̀d bɨrɨ wɨrɨ yeʼe

(Mt 24.29-31; Mk 13.24-27)

25“Ɨnweenɨ bɨrɨ jwɨ̀ ənɨ ɨmɨg bə̀ fɔrɨ ənɨ rɨtəmɨ. Ŋgəʼ bɨrɨ nyɨ ɨŋga ɨbeŋ jìm ɨgwɨ ə si, ɨtu bə̂d bɨrɨ bùùrɨ̀ ɨghabɨ ɨchî nɨ rɨ̀bàà mbɨ mɨnib nɨə nɔ̀ʼə̀ swiʼə ə jùʼə̀. 26Bə̂d bɨrɨ gu nə̀ŋ ɨmbə̀ʼ ɨbɔɔ fɔrɨ ɨmbə̀ʼ ɨkɔndɨ ɨmbə̀ʼ ɨnû mbe nɨ bɨrɨ yeʼe ɨgwɨ ɨsɨg, ɨmbə̀ʼ ɨghəm nɨ Ŋwìə̀ bɨrɨ chɨ ɨzwî mbe nɨ yeʼ ɨkaŋ. 27À yɨ ənɨ ə nyùmə̀ we nɨ mbɨ bɨrɨ zə Wan Wə̀d nɨə yeʼe ɨŋga pàʼ, zə ɨka we nɨ wɨ̀ berɨ bə̀ zə ɨwumnɨ kyeŋ we nɨ wɨ̀ bə̀ berɨ. 28Ɨnû mbɔ̂ mɨ kɔ ghɨ̌, mbə̀ nɔ mbə ɨtu neŋ ɨkaŋ, ɨmbə̀ʼ ɨghəm nɨ nyùmə̀ we nɨ mbɨ bɨrɨ choʼ mbə ɨtu fə tiinɨ.”

Ənû nɨ tɨ̀ bə̂d kwembɨ rɨ ənɨ əzed ə fîg

(Mt 24.32-35; Mk 13.28-31)

29Yeso nyaʼa ghà ənû ə mɨgɨ zɔ̂ əmbɨ mɨ̀mə̌d ni, “Mbə neŋ əzed ə fîg bə̀ nèŋ ɨzed jìm. 30Mbə mɨ zə ənɨ rɨfuʼ fi ə sɨə jwɨ̀ə̀, mbə̀ kyerɨ ni ɨchɨ fə tiinɨ. 31Əne bə̂, mbə mɨ zə ənɨ ɨnû mbɔ̂ ə ghɨ̀ə̀, mbə̀ kyerɨ ni ənû ɨfɔ̂n ə Ŋwiə̀ ə fə tiinɨ.

32“Mə ghà rəsìʼ ɨ nən ni kaʼ ɨghəm bə̂d wɔ̂ bɨrɨ che i, zɨ rɨ tɨ̀ ɨnû mbɔ̂ jìm fə ghɨ. 33Ɨkaŋ fɔrɨ si bɨrɨ chè, àyɨə ka mɨ ɨŋgam bɨrɨ nɔ che ətu ə̀kǒ.”

Zɨə bɔ̀ŋ nɨ chub ɨkyèʼe

34“Mbə̀ we ə ni tɨ mbə̀ zɨ ə tə fîŋ ənɨ ənû nɨ jɨg əku, ənɨ ənû nɨ nɔ be bə̀ fɔrɨ ənɨ ənû ɨmbə̀ʼ ɨghɨ rɨŋga ɨsɨg, njɨ əni ze ə bɨrɨ saʼ yeʼe ɨgwɨ nən ɨchî nɨ ətam ə gywɨ̀ə̀ nyam, 35ɨmbə̀ʼ ɨghəm nɨ əni ze ə bɨrɨ yeʼe ɨgwɨ ə bə̂d mɨ̀jìm mbe nɨ yeʼ ɨgwɨ ə si. 36Mbə̀ chub ɨkyèʼe ənɨ mɨ̀nyùmə̀ jìm, kɔŋgɨ ə Ŋwiə̀ ni mbə̀ berɨ ɨka nɨ nod ɨnû jìm mbe nɨ bɨrɨ ghɨ̀. Mbə̀ bə̀ kɔŋgɨ ni mbə mbe tɨ̀ mbə təm ɨfě Wan Wə̀d.”

37Yeso wɨə nyaʼə chwi ɨnû ɨŋga mbàn Ŋwìə̀ ɨni jìm. À sɨ ɨkwirɨ kwirɨ, ɨ wɨə nyaʼə jwɨ̀ə̀ wò ni ɨkaŋ Ɨwum mɨ̀Olìf. 38À sɨ ɨsɔsɔ, bə̂d mɨ̀jìm mbɨə nyaʼə wò əsɨ məd ɨŋga mbàn Ŋwìə̀ ɨmbə̀ʼ zu ɨnû mbe nɨ wɨ̀ nyaʼə ghàə̀.

Currently Selected:

Lk 21: mgo

Highlight

Copy