Yokana 12

Yesu bamuwakha Kamafura nga ali i Besaniya

(Matayo 26.6-13; Mako 14.3-9)

1Ni byaba nga byaramileyo bifukhu bisesaba khukhwoola khu Mayiiya ke Khuubirakho, Yesu woola i Besaniya, esi alamusila Lazaaro khukhwaama mu khufwa. 2Bakhalabana, bamuteekhelayo she shiilo. Maliza niye uwakaanisayo she khulya isho. Lazaaro aba mutweela khu baaba khu shikabilo she biilyo.

3 # Luka 7.37,38 Lwanyuma Malyamu wabukula ikyupa iye kamafura kakawunya bulayi, ke bukusi bwe angaaki, wakahakha khu bikyele bya Yesu. Wabisiimulila litsuune lyeewe. Intsu yoosi yetsula khuwunya bulayi khwe kamafura ako.

4Ne mutweela khu baleekelwa ba Yesu ulaangibwa Yuda Isikalyoti, uwaba atsya khulyamo Yesu luwomelo, lwanyuma waaloma ari, 5“Khulwashiina kila kamafura kano kakhakulisibwilemo tsidinari nga bitoondo bitaru, batsikabila bataambi?” 6Yuda s'aloma aryo bari khulwekhuuba abe enaanayo isi bataambi ta, ne khulwekhuuba aba umwiifwi. Niye uwasutatsaka iwootswa, ate nga ebaatsaka tsinusu tsitsakwatsakamo.

7Yesu waaloma ari, “Ni mumulekhe. Lekha ebiikhile kamafura ako, khulwe shifukhu she khusiikhibwa khwase. 8#Maka 15.11Babaandu bataambi muli ni nabo busheele, ne simuli ni nase tsindaalo tsoosi ta.”

Luwomelo lwe khukhwiira Lazaaro

9Nga ibyo bili biryo, lituuli lye Bayudaaya lyamanya liri Yesu ali i Besaniya. Betsayo, ne akhuba ndi khulwa Yesu yenyene ta, ne ni khubona khu Lazaaro isi Yesu alamusa khukhwaama mu bafu. 10Baryo Basaayi bakhulu bakhala kamakyesi ke khukhwiira Lazaaro naye. 11Khulwekhuuba Bayudaaya bakali baaba batsya isi Yesu nga bamufukiilila, naluundi khulwa Lazaaro.

Yesu enjila mu Yerusalemu ni lubuyi

(Matayo 21.1-11; Mako 11.1-11; Luka 19.28-40)

12Ne shifukhu shisheelakho, kutuuli kwe babaandu babaaba beetsile khu mayiiya, ni bawulila bari Yesu ali khu ntsila etsa i Yerusalemu, 13#Zab 118.25,26bakhongola tsisakya tsye kamashendu baatsya khumwakaanila nga balomela angaaki bari, “Hosana, ali ni tsikhabi uyo uwiitsa mu lisiina ly'Omukasya. Wele awe Umuyiinga wa Isiraeli tsikhabi.”

14Yesu wanyoola isikilya imoosi, waakikhalakho, nga ni sharonebwa mu byaronebwa bikhosefu shiri,

15 # Zek 9.9 “Mukharya ta, inywe babaandu be mu Sayuuni;

Bona Umuyiinga wenywe alikho etsa

nga wikhaale khu sikilya imoosi.”

16Mu khunyoowa baleekelwa beewe baalekha khumanya shino ta; ne lwanyuma nga Yesu waamalile khuweebwa shiriifwa, ulwo bashebulila bari bibiindu bino byaronebwa nga biwaamba khu niye. Naluundi nga bino byoosi byakholebwa khu niye. 17Ni lituuli lye babaandu babaabawo ni naye nga enyusa Lazaaro mu ŋani luundi wamulamusa khukhwaama mu bafu, baboola ibyo byoosi byeesi baabona naluundi byeesi baawulila. 18Babaandu bakali khulwekhuuba baaba bawuliile bari Yesu wakholile she kamakaanga shino, baryo baatsya khumwakaanila. 19Bafarisaayo baloma bonyene na bonyene bari, “Ni mubone, mbaawo sheesi khulikho khunyala khukhola ta! Lola shiibala shoosi shilikhumulondelela.”

Bayonaani baweentsa Yesu

20Mu baandu babeetsa khu mayiiya khukhwisaaya, mwabamo balala Bayonaani. 21Nibo beetsa isi Filipo, uwaba uwama i Besusaida, mu Galilaaya, bamuloomba bari, “Musakhulu, khukana khubona Yesu.” 22Filipo naye waatsya waboolelakho Andereya. Baryo boombi lwanyuma baatsya baboolela Yesu. 23Lwanyuma Yesu welamo ari, “Isaawa yoolele isi Umwaana w'Omuundu ashiile khufumisibwilamo. 24Ilala, ilala, imbaboolela ndi, imiitso ye iŋaano ni khakwa mwiloba yaafwa ta, irama nga ili imiitso indweela yonyene. Ne n'imela, isaala bumiitso bukali. 25#Mat 10.39; 16.25; Mako 8.35; Luka 9.24; 17.33Umuundu yeesi ukana buulamu bweewe, alibufwilwa. Ne umuundu ubiyila buulamu bweewe mu shiibala shino, alibwibiikhila anyoole buulamu bubukhawawo ta. 26Umuundu yeesi uli umwakaanisi wase, ashiile khukhunondelela ise. Ni nase isi ndi, umwakaanisi wase naye niyo isi aliba. Uyo yeesi uli umwakaanisi wase, Paapa alimuwa shiriifwa.”

Yesu akanikha khubiwaamba khu khufwa khweewe

27Yesu weloosela ari, “Ari kumwoyo kwase kweyembelele. Ne ari inome shiina? Inome ndi Paapa n'umbonese mu saawa yino? Ne taawe, shino nisho shishandeera khukhwoola khu saawa yino. 28Paapa, n'ufumise lisiina lyoowo.”

Lwanyuma likono lyama mwikulu nga liloma liri, “Nalifumisile khaale, naluundi indilifumisa.” 29Ne babaandu babaabawo nga beemilewo ni bawulila likono, baloma bari, “Ibeele khukuula khwe ifula.” Ne babaandi baloma bari, “Malayika ama khukanikha ni naye.”

30Yesu wilamo ari, “Likono ilyo likanikhile khulweenywe, ne akhuba khulwase ta. 31Ari imbuka niyo yino, iye khukhalila shiibala shino kumusaango. Umuwuli uwe shiibala shino anatimisibwa arusibwe ibulafu. 32Ne nase n'indiniinisibwa angaaki khurura khu shiibala, indihaaya babaandu boosi imbare isi samweene.” 33Shino aashiloma nga okesanisa khuufwa khwa saambo shiina khweesi alifwamo.

34 # Zab 110.4; Isay 9.7; Ezek 37.25; Dan 7.14 Lituuli lyeelamo liri, “Ifwe khwawulila mu makaambila keefwe khuri Kristo alibawo bifukhu byoosi. Ne iwe shiina shikhulomesa shiri Umwaana w'Omuundu ashiile khuniinisibwa angaaki? Umwaana w'Omuundu yuno, niye naanu?”

35Yesu wabeelamo ari, “Buwaanga mushiili ni nabwo, ne mu mbuka injeekhe. Ni mukyende nga mushiili ni buwaanga, nga shishiilima shishiili khubawaamba ta. Umuundu ukyendela mu shilima s'amanya esi atsya ta. 36Nga mushiili ni buwaanga ni mufukiilile buwaanga, nio manya mube babaana be buwaanga.” Yesu n'amala khukanikha bino, waarurawo waatsya wabebisakho.

Khuulekha khufukiilila khwe Bayudaaya

37Akhaba nga Yesu akhola bye kamakaanga bikali biryo mu moni tsye Bayudaaya, sibamufukiililamo ta. 38#Isay 53.1Shino shaba nga sholelesa bibyaronebwa mu muŋoosi Yisaaya shiri,

“Umukasya, naanu uwafukiilila buurume bweefwe?

Naluundi, kumukhono kwa Wele kwe kamaani kwabimbulilwa khu naanu?”

39Ni khulwe ilomo yino, sibaanyala khufukiilila ta, khulwekhuuba Yisaaya waloma ahandi ari,

40 # Isay 6.10 “Wele wababofwaasa tsimoni tsaabwe.

Naluundi waakhola kimyoyo kyaabwe khuuba kimihandalafu,

nio balekhe khubona ni tsimoni tsaabwe ta,

namwe nio balekhe khumanya ni kimyoyo kyaabwe ta,

khulwekhuuba beetsa khushuukha,

ise nabawonesa.”

41Yisaaya aloma aryo lwekhuuba abona shiriifwa sha Yesu; aryo wamukanikhakho. 42Ni batweela khu baraangilisi bamufukiililamo, ne khulwe khuurya Bafarisaayo, balekha khubuula ta, bari lukana beetsa khubekalawo khutsya mu ntsu iye khukhwisaayilamo. 43Khulwekhuuba bakana shiriifwa shabwe khukhwaama mu baandu, khufuurisa khukhwaama isi Wele.

44Lwanyuma Yesu waalomela angaaki ari, “Umuundu n'afukiilila mus'iise, s'afukiilila ise senyene ta, ne aba afukiilila ni nooyo uwanduma. 45Uyo uwunondelela ise, abona uyo uwanduma. 46Ise nayiitsa mu shiibala nga buwaanga, nio buli muundu uwufukiilila ise alekhe khurama mu shilima ta. 47Ne isi umuundu yeesi uwulila bilomo byase, ne walekha khubitsiilakho ta, ise s'imukhalila kumusaango ta. Lwekhuuba ise shineetsa khukhalila shiibala kumusaango ta, ne njeeba khushiwonesa. 48Umuundu yeesi uwuuntsikaana ise, walekha khufukiilila bilomo byase ta, ali n'umukhalila kumusaango. Shilomo shase shisheene sheesi naloma nisho shishiilimukhalila kumusaango khu shifukhu shishakamayo. 49Ise s'inganikha khulwe bunyala bwase ta, ne Paapa umweene uwandumana niye uwundakila byeesi naakha khuloma; n'isaambo iye khubilomamo. 50Ni nase namanya ndi kamakaambila keewe niko bulamu bubukhawawo ta. Byeesi Paapa andumana khukanikha, nibyo bibyeene byeesi inganikha.”

Currently Selected:

Yokana 12: LPE

Highlight

Copy