Yokana 16

1Yesu weloosela waaloma ari, “Naababooleele bino nio mulekhe khuwamo kamaani mu bye khufukiilila khweenywe ta. 2Babaandu kane babekalewo inywe khukhwaama mu ntsu iye khukhwisaayilamo, naluundi imbuka ilyoola isi umuundu yeesi ubeera inywe alyambaasa ari alikho akhola byeesi Wele akana. 3Babaandu balikhola bibiindu bino khulwekhuuba sibaamanya Paapa, namwe sibayiimanya ise ta. 4Ne ise nababooleele bino, nio inyaanga iye bikholwa ibyo nga yoolile, mushebulile muri ise nabareewula.

Buuraambi bw'Omwoyo Umukhosefu

“Sinababoolela bibiindu bino byoosi khukhwaama makiboole ta, khulwekhuuba naba nga ndi ni nanywe. 5Ne ari ndi khuutsya isi uyo uwandumana. Ne khus'inywe mbaawo namutweela uwundeebile ari, ‘Ulikho wutsya waheena’ ta. 6Ne khulwekhuuba naababooleele bibiindu bino, kimyoyo kyeenywe kyetsuule kumutaambo. 7Ne mbaboolela mu ŋali ndi, khuutsya khwase khubayeeta nywe. Khulwekhuuba ise ni ndekha khuutsya ta, Umuyeeti s'aliitsa ta. Ne ise n'intsya, indyakaanisa Umuyeeti isi muli. 8Umuyeeti uyo n'aliitsa, alyokesanisa buŋaŋafu isi babaandu be mu shiibala khu biwaamba khu byoonako, ni khubiwaamba khu bukwalaafu, ni khukhala khwe kimisaango. 9Sibali batuufu khu biwaamba khu byoonako ta, khulwekhuuba sibaafukiilila ise ta. 10Sibali batuufu khu biwaamba khu bukwalaafu ta, khulwekhuuba ise ndi khuutsya isi Paapa, ni nanywe singane mumbonekho luundi ta. 11Sibali batuufu khu biwaamba khu khukhala khwe kimisaango ta, khulwekhuuba umuwuli uwe shiibala shino, naye baamala khaale khumukhalila kumusaango.

12“Ise ishiili ni bibiindu bikali bye khuubaboolela, ne simunyala mwabiwaamba byoosi ari ta. 13Ne Umwoyo uwa ŋali n'aliitsa, uyo urumbula bya ŋali bibiwaamba khu Wele, alibaraangilila inywe aboolese mu bya ŋali byoosi. Khulwekhuuba niye s'alikanikha khulwe bunyala bubweewe ta, ne khurusakho ndi alikanikha ibyo byeesi aba wawuliile, naluundi alibaboolela ibyo bibiitsya khubawo. 14Umweene uyo akhantsisemo ise shiriifwa, khulwekhuuba byeesi alibaboolela inywe, alibyaamisa khu byase. 15Ibyo byoosi byeesi Paapa ali ni nabyo, bibyase. Nashiryo kila imbaboolela inywe ndi, byeesi Umwoyo alibaboolela inywe, alibyaamisa khu byase.”

Kumutaambo kukuulikyela kumwikhoyo

16Yesu weloosela waaloma ari, “Mu mbuka ifwiiti iri, singene mumbone luundi ta; ne kane nga imbuka yabirirekho ifwiiti, kane mumbone.”

17Batweela khu baleekelwa beewe kila baloma bari, “Shiina kila alikho aloma aryo? Ari mu mbuka ifwiiti singene mumbone ta; naluundi ari mu mbuka ifwiiti kane mumbone? Ari khulwekhuuba ndi khuutsya isi Paapa?” 18Kila bereeba bari, “Amanyisa shiina ni imbuka ifwiiti? Ifwe sikhumanya sheesi alikho ta.”

19Yesu washimanya ari bakana khumureeba, kila abalomela ari, “Mulikho mwireeba shiina shisheene sheesi ise imanyisile ninomile ndi, ‘Mu mbuka ifwiiti simunaambona ta, naluundi mu mbuka ifwiiti, kane mumbone?’ 20Ilala, ilala, imbaboolela ndi inywe mukhalile luundi mukhaakhupe kimibala, ne shiibala nga shikhoya. Inywe muliba mu mutaambo, ne kumutaambo kwenywe kulikalukha kwikyele kumwikhoyo. 21Umukhasi nga wolile mu mbuka iye khusaala, aba mu mutaambo, khulwekhuuba imbuka yeewe iba yoolile. Ne n'amala khusaala, ebilila butsiina khulwe kumwikhoyo kw'omuundu usaalikhile mu shiibala. 22Ni nanywe muli muryo; ari muli mu mutaambo, ne ise n'indibabona inywe luundi, kimyoyo kyeenywe kiliba ni kumwikhoyo, ate mbaawo ulibarusakho kumwikhoyo kwenywe ta.

23“Ne shifukhu isho ni shilyoola, simulinoomba shishiindu shoosi ta. Ilala, ilala, imbaboolela nywe ndi, ni muliloomba shishiindu shoosi mu lisiina lyase, Paapa alishibawa. 24Khukhwoolisa ari mushiili khuloomba shishiindu shoosi mu lisiina lyase ta. Ni muloombe, kane mufune, nio kumwikhoyo kwenywe kube kumwitsufu.”

Yesu waamala khuuwula bye khu shiibala

25Yesu waaloma luundi ari, “Ibyo naabibabooleele nga inaambisa tsisimo. Ne inyaanga ineetsa isi ikhalibaboolela nga inaambisa tsisimo ta; nga mbaboolela lubuula bibiwaamba khu Paapa. 26Khu shifukhu isho muliloomba mu lisiina lyase, ne ise s'imbalomela ndi ise ikhabaloombele inywe isi Paapa ta. 27Khulwekhuuba Paapa umweene abakana inywe. Abakana inywe khulwekhuuba inywe mungana ise, naluundi mwafukiilila muri ise naama isi Wele. 28Naama isi Paapa neetsa mu shiibala. Ne ari indikhuulekha shiibala intsya isi Paapa.”

29Baleekelwa beewe baaloma bari, “Ari ulikho uloma lubuula, ne akhuba mu simo ta. 30Ari khwaamanyile khuri wamanya buli shiindu, shiili bari uliinda bakhureebe bireebo nio ta. Khulwa shino, ari khufukiilila khuri iwe waama isi Wele.”

31Yesu waabeelamo ari, “Ari mufukiilila? 32Mu mbuka ikhali iye aleeyi ta, ilala mweesi bakhaabasalanise, nga buli mutweela elukhila ingo weewe, nashiryo muliindekha senyene. Ne s'indi senyene ta, khulwekhuuba Paapa ali ni nase. 33Nababoolele ibyo, nio mube ni lukoosi, nga mwaramile mu butweela ni nase. Kane shiibala shibareerere khutaambisibwa, ne ni mube banyindaalifu. Ise naamalile khuwula shiibala.”

Currently Selected:

Yokana 16: LPE

Highlight

Copy