Yokana 18

Yesu bamuwaamba

(Matayo 26.47-56; Mako 14.43-50; Luka 22.47-53)

1Awo Yesu n'amala khuukanikha bilomo bino, waarura ni baleekelwa beewe, baambukha khakheetsi kheesi balaanga bari Kidironi. Ibweene iyo yabayo kumukuunda, mweesi Yesu ni baleekelwa beewe baatsya. 2Yuda uwalya mu Yesu luwomelo abe waamanya shiifwo sheenesho, khulwekhuuba Yesu atsyaatsakayo tsifuunda tsingali ni baleekelwa beewe. 3Aryo Yuda waatsyayo mu mukuunda ukwo, nga waraangilile kumukaanda kwe basilikhale, ni babakaanisi babaandi khukhwaama isi basaayi bakhulu ni Bafarisaayo. Baaba basutile tsitaala, ni tsisaso, ni bye busoolo. 4Yesu n'amanya byoosi bibiitsya khumukholekhakho, umweene weerusa ibulafu, waabareeba ari, “Naanu esi mulikho muweentsa?”

5Baamwiilamo bari, “Yesu, uwe Nazareesi.”

Yesu waabaloma ari, “Ise niy'oyu.”

Ni Yuda uwamulyamo luwomelo naye aba weemile ni nabo. 6Ne Yesu n'abaloma ari, “Ise niy'oyu,” boosi beelayo shinyumanyuma baakwa aasi.

7Luundi ndi Yesu waabareeba ari, “Naanu esi mulikho muweentsa?”

Baamuloma bari, “Yesu uwe Nazareesi.”

8Yesu waabaloma ari, “Imbabooleele ndi ise niy'oyu. Nashiryo noola mumeentsa ise, khayo babaandu bano babe.” 9Shino shakholekha nio shilomo sholelese sheesi aaloma ari, “Ise naakhukosakho na mutweela khu beesi waamba ise ta.”

10Nga bishiili biryo, Simoni Petero, uwaba abe ni lurima, waalusoowolayo, waatseyakho khukhuru khwe kumukhono kumulayi, khw'omukulwa w'Omusaayi ufuura bukhulu. Lisiina ly'omukulwa yuno, lyaba bari Maluko. 11#Mat 26.39; Mako 14.36; Luka 22.42Yesu waaloma Petero ari, “Ni wiise lurima lwoowo mu shilaalo shalwo. Shino nisho shikopo she butsiina sheesi Paapa ambeele. Shingane ishinywe ta?”

Yesu ayilibwa wa Anasi

12Lwanyuma, kumukaanda kwe basilikhale n'umukhulu waabwe, atweela ni babakaanisi be Bayudaaya, bawaamba Yesu bamubowa. 13Banyoowa baamuyila wa Anasi, uwaba paapawe w'omukhasi uwa Kayafa. Kayafa niye uwaba umusaayi ufuura bukhulu kumwiiko kwen'ekwo. 14#Yok 11.49,50Naluundi yaba Kayafa mwene uyo, uwawa Bayudaaya kamakyesi ari abe umuundu mutweela wafwa khulwe babaandu boosi, shifuura.

Petero ekaana Yesu

(Matayo 26.69-70; Mako 14.66-68; Luka 22.55-57)

15Khu mbuka yino, Simoni Petero n'umuleekelwa ukuundi, baloonda khu Yesu. Ne khulwekhuuba abe umuleekelwa yuno aba waamanyikhana isi Umusaayi ufuura bukhulu, baamufukiilisa wenjila mu lwaanyi lw'Omusaayi umukhulu, atweela ni Yesu. 16Petero waarama nga waaliindile ibulafu, amulyaango. Aryo umuleekelwa yuno abe esi umusaayi umukhulu aamanya, waarura ibulafu, waakanikha isi umukhaana uwaba aliinda khu shilibwa, wenjisa Petero mu lwaanyi. 17Umukhaana umuliindi yuno waareeba Petero ari, “Iwe nawe s'uli mutweela khu baleekelwa b'omusaani uyu?”

Petero wekaana ari, “Taawe.”

18Babakaanisi ni basilikhale baaba beemile awo nga boora kumulilo kweesi baaba baasile, khulwekhuuba imbuka yaba iye bunyifu. Petero naye aba weemile ni nabo nga oora kumulilo.

Umusaayi ufuura bukhulu areeba Yesu

(Matayo 26.59-66; Mako 14.55-64; Luka 22.66-71)

19Ibyo nga bili biryo, Umusaayi ufuura bukhulu wareeba Yesu bibiwaamba khu baleekelwa beewe, ni ndeekela yeewe. 20Yesu wamwilamo ari, “Ise nakanikhatsaka isi shiibala shoosi lubuula. Naleekelatsaka busheele mu ntsu tsye khukhwisaayilamo, ni mu Lisaayilo Likhulu, esi Bayudaaya boosi babuusanila. Sinalomatsakakho shishiindu shoosi mu shimoonyo ta. 21Lwashiina undeeba? N'ureebe babaandu babaambuliilisatsaka ise byeesi nabalomatsaka. Nibo baamanya byeesi naloma.”

22Yesu n'amala khuloma bino, mutweela khu basilikhale uwaba wemikhile ambi awo, wamukhupa luuyi, nga aloma ari, “Iyo niyo isaambo isi wiilamo Umusaayi ufuura bukhulu?”

23Yesu wamwiilamo ari, “Noola ise inomele buubi, n'untsokese buubi bwase. Ne noola inomele bulayi, lwashiina kila ukhupa?” 24Lwanyuma Anasi wamwakaanisayo wa Kayafa, Umusaayi ufuura bukhulu, nga ashiili umubowe.

Petero ekaana Yesu luundi

(Matayo 26.71-75; Mako 14.69-72; Luka 22.58-62)

25Bino biba biryo, Simoni Petero aba nga ashiimikha oora kumulilo. Baamureeba bari, “Ni nawe s'uli mutweela khu baleekelwa b'omusaani uyu?”

Ne Petero wekaana nga aloma ari, “Taawe.”

26Lwanyuma mutweela khu bakaanisi b'omusaayi ufuura bukhulu, nga aba umulebe w'omusaani isi Petero akhalakho khukhuru, wamutsuntsumilisa ari, “Ise sinakhuboone ni naye mu mukuunda?”

27Indi luundi Petero wikaana. Ni khu saawa nyene iyo, itwaya yakholookha.

Yesu nga ali mu moni tsa Pilato

(Matayo 27.1-2,11-14; Mako 15.1-5; Luka 23.1-5)

28Lwanyuma Bayudaaya baarusa Yesu wa Kayafa, baamuyila muungo mwa Gafana. Bubwiile bwaba kumutikhinyi, mu mamilimili. Ne Bayudaaya baalekha khwinjila mu lwaanyi lwa Gafana ta, khulwekhuuba abe she kumusilo, bari nio banyalise khuulya Kamayiiya ke Khuubirakho.

29Aryo Pilato waarura ibulafu isi baaba, wabareeba ari, “Musaango shiina kweesi mufunaana umuundu yuno?”

30Nabo beelamo bari, “Umusaani yuno alekha khukhola buubi bwoosi, khali sikhwamureerire is'uli ta.”

31Pilato wabeelamo ari, “Mwabeene ni mumuyile mumukhalile kumusaango nga kamakaambila keenywe ni kaloma.”

Ne Bayudaaya bamwiilamo bari, “Ifwe sikhufukiilisibwa khukhwiira umuundu yeesi ta.” 32#Yok 3.14; 12.32Shino shakholekha shiryo nio ilomo ya Yesu isi aaloma yoolele, nga okesana khuufwa khweesi atsya khufwamo nga ni khuli.

33Lwanyuma Pilato welayo luundi mu lwaanyi lwe kimisaango, walaanga Yesu, waamureeba ari, “Iwe uli Umuyiinga we Bayudaaya?”

34Yesu waamwiilamo ari, “Shino ushiloma khu lwoowo wamweene, namwe iliyo babaandi babaakhubooleele baryo khus'ise?”

35Pilato waamwiilamo ari, “Ise ndi Umuyudaaya? Babaandu be linaambo lyoowo ni Basaayi bakhulu nibo babaakhuntsakaanisile isi ise. Shiina sheesi ukholile?”

36Yesu waaloma ari, “Buyiinga bwase sibuli bwe mu shiibala shino ta. Buba bubuuli bwe mu shiibala shino, khali babakaanisi baase basoolanile, indekha khuwaanibwayo mu mikhono kye Bayudaaya ta. N'enga ni shili, buyiinga bwase sibuli bwa khuno ta.”

37Pilato waamureeba ari, “Khuumanya uli Umuyiinga?”

Yesu waamwiilamo ari, “Iwe niye ulomile uryo, uri ise ndi Umuyiinga. Isho nisho shishakila ise naasaalikha. Naluundi neetsa mu shiibala, ndi nio imboolele bya ŋali. Buli muundu yeesi urekeeresa bya ŋali, awulila likono lyase.”

38Pilato waamureeba ari, “Ŋali nisho shiina?”

Yesu bamukhalila kwe khuufwa

(Matayo 27.15-31; Mako 15.6-20; Luka 23.13-25)

Ne Pilato n'amala khuumureeba aryo, waarura luundi waatsya isi Bayudaaya, waabaloma ari, “Ise s'imbona ilomo yoosi ikila mwafunana umusaani uyu kumusaango ta. 39Ne ili isaambo yeenywe ise khuubalekhuulila umubowe mutweela khu bifukhu bye Kamayiiya ke Khuubirakho. Ari mukana imbalekhuulile Umuyiinga we Bayudaaya?”

40Ne boosi bayokesela angaaki, baaloma bari, “Akhuba umusaani yuno ta. Ne akhali iwe n'ukhulekhuulile ifwe Baraba!” Baraba aba umunuuli.

Currently Selected:

Yokana 18: LPE

Highlight

Copy