Luka 21

Shiwaanwa sha namulekhwa

(Mako 12.41-44)

1Yesu wenyusa tsimoni waabona bayindifu nga bara biwaanwa byaabwe mu sanduuku iye Lisaayilo Likhulu. 2Aryo waabona namulekhwa umutaambi nga naye aramo bu nusu bweewe bubili bwonyene. 3Yesu waaloma ari, “Ilala imbaboolela ndi, namulekhwa yuno umutaambi wareeremo shikali khufuurisa babaandi babaramile boosi. 4Lwekhuuba bano boosi babukuule khu bikali byeesi bali nabyo baara mu sanduuku, ne umukhasi yuno mu butaambi bweewe, waawaanileyo byoosi by'ali nabyo bye buulamu bweewe bwoosi.”

Yesu akanikha khu khwonakisibwa khwe Lisaayilo Likhulu

(Matayo 24.1-2; Mako 13.1-2)

5Ulwo batweela khu baleekelwa beewe ni baaba bakanikha khu Lisaayilo Likhulu, nga ni lyaba lyayombekhebwa bulayi, ni kamabaale kamamiliwu naabi, ni nebyo bibyawaanibwayo isi Wele; Yesu waaloma ari, 6“Bino byoosi byeesi mubona ari, imbuka kane yoole, esi akhalibonekhawo ni libaale na litweela lilirama nga lyemile khu lyashe ta. Kamabaale kano koosi katsya khutuumibwa aasi.”

Bukosi ni khutaambisibwa

(Matayo 24.3-14; Mako 13.3-13)

7Baryo bareeba Yesu bari, “Umuleekeli, bino byoosi bilibawo liina? Naluundi khabonelo shiina khakhalyokesana khari ibyo byoosi bili aambi khukhwoolelesebwa?”

8Yesu welamo ari, “Ni mwitsililise, mulekhe khukosaasibwa ta. Lwekhuuba bakali baliitsa mu lisiina lyase, nga baloma bari, nibo ise, luundi nga baloma bari, ‘imbuka yoolile.’ Mukhabaloondelelatsaka ta. 9Ne ni muliwulila busoolo ni khutabukha, mukharyatsaka ta. Bibiindu bino byoosi byaakha khunyoowa khubawo, ne intsakamo shiili iyawangu ta.”

10Lwanyuma waalooselakho ari, “Linaambo lilinyukhila linaambo lyashe, ni buyiinga bulinyukhila buyiinga bubuundi. 11Ilibawo khunikina khukali khwe shiibala, ni mu bifwo bikali mulibamo intsala ni tsindwaale. Naluundi ilibawo bibiriisa bikali, ni bye kamakaanga khukhwaama mwikulu.

12“Ne bino byoosi nga bishiili khubawo ta, balibawaamba inywe, babakubyeenge, babawaaneyo mu muntsu tsye khukhwisaayilamo, ni khubowebwa mu mapuusu. Balibayila isi bayiinga n'isi bawuli lwe lisiina lyase. 13Ne yino iliba ikhabi yeenywe khubawa nibo bujulilwa. 14#Luka 12.11,12Kale muryo ni mumalilile mu myoyo kyeenywe khulekha khurya ta, nga mwaambaasa muri kane mwiwotsekho muryeena ta. 15Lwekhuuba ise samweene indibawa inywe bilomo ni kamakyesi byeesi basiku beenywe bakhalinyala khukhaandisa namwe khubiloba ta. 16Inywe mulilibwamo luwomelo ni basaali beenywe, ni babandaayeenywe, ni balebe beenywe, ni basaale beenywe. Ni babaandi khwiinywe baliribwa. 17Babaandu boosi balibabiiyila lwe lisiina lyase. 18Ne mbaawo ni lutsuune lwe khu mirwe kyeenywe na lutweela lulihela na khafwiiti khoosi ta. 19Mukhwikhalilikha khweenywe mulinyoola buulamu.

Yesu akanikha khu khwonakisibwa khwa Yerusalemu

(Matayo 24.15-21; Mako 13.14-19)

20“Ne ni mulibona Yerusalemu nga shebotokhelelwe ni kamaye ke basilikhale, ulwo mumanya muri khuhela khwasho khuli aambi. 21Ulwo babaaliba mu Yuda baakha belukhile mu bisiintsa bye tsingoongo; ne ibo babaaliba mu shiriimba bashiruremo; ni naabo babaaliba mu shaalo bakhenjila mu shiriimba ta. 22#Hos 9.7Lwekhuuba bino nibyo bifukhu bye shitaambiso khukhwoolelesa bibyaronebwa. 23Isi bakhasi babaaliba bisoombo, ni naabo babaaliba nga banuunisa mu bifukhu ibyo, nga kuliba kumutaambo. Lwekhuuba ilibawo kumutaambo kumukali mu shiibala, ni lirima lya Wele isi babaandu be linaambo lino. 24Baliribwa ni lurima, luundi baliyilibwa nga babowe mu manaambo koosi, ni Yerusalemu shilisambililwa ni Banaambo khukhwoolesa imbuka yaabwe inyene iyarobolebwa n'iliwakho.

Khukhwiitsa khw'Omwaana w'Omuundu

(Matayo 24.29-31; Mako 13.24-27)

25 # Isay 13.10; Ezek 32.7; Yow 2.31; Bimb 6.12,13 “Ne alibawo bubonelo khu nyaanga ni khu mweesi, ni khu nieniesi, ni khu shiibala kamanaambo koosi kaliiba mu khwiyembelela, ni khuurya lwe khuwoolela ni khukululukha khwe nyaantsa. 26Babaandu baliyengukhaka lwe shiriisa, ni lwe khukhwiyembelela ibyo byoosi bibiitsya khubawo mu shiibala shoosi, lwekhuuba kamaani ke mwikulu kalitengasibwa. 27#Dan 7.13; Bimb 1.7Khu mbuka iyo, nio babone Umwaana w'Omuundu nga etsila mu namufweeli ni kamaani ni shiriifwa shikali. 28Ne bino byoosi ni biba nga birakikha khubawo, mukangamukha mwinyuse kimirwe kyeenywe, lwekhuuba khuwonesebwa khweenywe khuba khuli aambi.”

She khukhwiyika khu kusaala ku figi

(Matayo 24.32-35; Mako 13.28-31)

29Lwanyuma Yesu waababoolela lusimo luno ari, “Ni mubonele khu kusaala ku figi ni khu bisaala bibiindi byoosi. 30Muryo ni mubona nga bisisinakho luundi kamasaafu, mumanya muri biseela bye kumunaane bili aambi. 31Musaambo niyo ndweela, ni nanywe ni mulibona ibyo nga bibawo, mumanyatsaka muri Buyiinga bwa Wele buli aambi.

32“Ilala imbaboolela ndi kumuboolo kuno sikuliwawo na khafwiiti ta, khukhwoolesa ibyo byoosi ni bilibawo. 33Likulu ni shiibala biliwawo, ne bilomo byase sibiliwawo na khafwiiti khoosi ta.

Mwaakha khuuba meeso

34“Ni mwiliinde kimyoyo kyeenywe kilekhe khukhwimalila khu mulyulyu, ni khumeela, ni khukhwiyembelela bibiindu bye mu bulamu buno ta, nio shifukhu isho shilekhe khuboolakho nga akhumanya ta. 35Lwekhuuba shilyoola khu baandu be mu shiibala shoosi nga kumureko. 36Ni nashiryo, ni mube meeso imbuka yoosi, nga muloomba Wele busheele, nio munyale khukhwilukha ibyo byoosi bibiitsya khubawo, ni khunyalisa khukhwimikha mu moni tsy'Omwaana w'Omuundu.”

37 # Luka 19.47 Aryo Yesu buli shifukhu kumuusi ekhalatsaka mu Lisaayilo Likhulu nga aleekela, ne ni bwelabulatsaka aruratsaka n'atsya khu lukiingi lulaangiwa bari lwe kimisaala Kimizeyituni. 38Babaandu boosi bawuunatsaka kumutikhinyi khuutsya is'ali mu Lisaayilo Likhulu khumurekeeresa.

Currently Selected:

Luka 21: LPE

Highlight

Copy