Buraambi 4
4
Petero ni Yohana bayilibwa mu lukhobo lukhulu
1Baarume Petero ni Yohana ni baaba nga bashikanikha isi babaandu, basaayi atweela n'umukhulu we liye liliinda khu Lisaayilo Likhulu, ni Basadukaayo, beetsa isi bali, 2beetsa nga bakhalale bari lwekhuba abe baarume balikho baleekela babaandu, nalundi nga belwatsa bari khubirira mu Yezu iliwo khulamukha khwe baafu. 3Baryo bawamba baarume Petero ni Yohana, babara mu mapuusu khukhwoolesa khu shifukhu shishelakho. Lwekhuba abe bulikho bwilabula. 4Ne bakali khu baandu babawulila bilomo bafukiilila, ni bukali bwaabwe bweloosela khukhwolesa babaandu bikana nga biraano.
5Antsye ni bwasha, baraangilisi be babaandu, ni basakhulu, atweela ni baleekeli be kamakaambila ka Musa, babusanila atweela mu Yerusalemu. 6Beetsa atweela ni Anasi umusaayi ufuura bukhulu, ni Kayafa, Yohana ni Alekizanda, ni babaandi babaaba beenda y'omusaayi umukhulu. 7Baryo ni baamala khukhwiiimisa baarume Petero ni Yohana akari abwe, babareeba bari, “Mwiimile khu bunyala shiina, namwe mwiimile khu lisiina lya naanu khukhola shino?”
8Kila Petero nga wetsuule Umwoyo Umukhosefu abaloma ari, “Inywe bawuli be babaandu atweela ni basakhulu, 9noola mulikho mukhureebelesa ifwe shaleelo lw'ebyo bibiwaamba khu shiindu shilayi shishakholebwa khu musaani uwakataala, ni khumanya musaambo shiina yeesi umusaani yuno awonesebwamo, 10khayo shimanyikhane isi inywe mweesi ni babaandu boosi ba Isiraeli shiri, umusaani uyo awonesebwa mu lisiina lya Yezu Kristu uwe Nazareti. Umweene uyo isi inywe mwabeene mwatsaangilila khu musalaba ne Wele wamulamusa khukhwaama mu bafu. Shili khulwo mweeneyo kila umusaani yuno emile mu moni tseenywe nga wawonisibwile. 11#Zab 118.22Yezu mweeneyo niye isi bibyaronebwa bikhosefu bilomakho bili,
‘Libaale lyeesi babombekhi bekaana,
lyakalukhile khuuba nga nilyo likhulu lye musoonda.’
12Nalundi mbaawo buwonesi khubirira mu mundu ukuundi yeesi ta, lwekhuba mbaawo lisiina liliindi asi e likulu lyeesi babaandu banyala babiriramo bawonesebwa ta akhali lya Yezu.”
13Baryo babaandu be mu lukhobo ni baabona nga Petero ni Yohana bali bebumanyilifu bukali, ate nga bashimanya bari bali busa babaandu ba busheele, abe babakhafunakho buleekele ta, beyaanga naabi. Ne bakyelawo bashifuumbula bari, babaandu bano babakho ni Yezu. 14Ne ni babona umusaani uwawonesebwa nga wemilewo, be lukhobo bakoraana she khukhwiilamo. 15Ne nga balakiile baarume khurura ibulafu we lukhobo, be mu lukhobo bekuta bonyene nga baloma bari, 16“Babaandu bano kane khubakhole khuryeena? Lwekhuba shamanyikhiile ilala lubuula isi babekhali be mu Yerusalemu boosi shiri, she kamakaanga shikhulu shakholikhile khubirira mu nibo, nalundi mbaawo isaambo yeesi khunyala khwashikanamo ta. 17Ne khubona khuri shishiindu shino sishisalanila mu baandu ta, kane khubareewule balekhelewo khukanikha mu lisiina lino lundi.”
18Baryo be mu lukhobo babalaanga bakobolayo mukari, babareewula khulekha khwilayo na khafwiiti khukanikha lundi mu Lisiina lya Yezu ta. 19Ne Petero ni Yohana babelamo bari, “Inywe mwabeene ni mukhalewo noola shili shilayi mu moni tsa Wele khukhola sheesi inywe mukana mu shifwo she khukhola byeesi Wele akana. 20Lwekhuba ifwe sikhunyala khwasila busa ta, akhali ifwe khuli ni khukanikha khwiibyo byeesi khuboone nalundi byeesi khuwuliile.”
21Baryo be mu lukhobo ni baamala khuriisariisa baarume musaambo tsitsiindi, babalekhuula baatsya, nga si babona isaambo ikiindi iye khubawa shitaambiso ta, lwekhuba baarya babaandu. Lwekhuba babaandu boosi baaba babuyila Wele khu lw'ebyo byoosi bibyaba byakholikhile. 22Umuundu yeesi khabonelo khano khe khuwona khakholekhakho aba afuurisa mu miiko kamakhumi kane kye bukhulu.
Bafukiilisi mu Yezu baloomba Wele khubawa kamaani
23Baryo nga babalekhuulile, baarume Petero ni Yohana baatsya isi bashaabwe, bababoolela byoosi byeesi basaayi bakhulu ni basakhulu baloma. 24#Luky 20.11; Neh 9.6; Zab 146.6Ne ni bawulila bino, basutila atweela kamakono kaawe isi Wele, baloma bari, “Umukasya uwe kamaani, iwe uwabuumba likulu ni shiibala, ni inyaantsa ni bibinyoolikhanamo byoosi, 25#Zab 2.1,2waba nga ubirira mu Mwoyo Umukhosefu wakanikha khubirira mu kuuka weefwe Daudi, umwakaanisi woowo uri,
‘Lwashiina kila kamanaambo katimaana?
Lwashiina kila kamanaambo kambaasa bibikhalimo ta?
26Bayiinga be mu shiibala benyukha ni kamaani,
ni bawuli babusanila atweela, khukhaandisa Umukasya,
ni khukhaandisa umurobole weewe
Uwatsukhiwakho kamafura.’
27 #
Luk 23.7-11
Mat 27.1,2; Mrk 15.1; Luk 23.1; Yoh 18.28,29 Lwekhuba mu ŋali, mu shiriimba shino, Herode ni Pontiyo Pilato, atweela ni Banaambo ni babaandu be mu Isiraeli, babusana atweela bakhaandisa Yezu, umwakaanisi woowo umukhosefu yeesi watsukhakho kamafura, 28nga bakhola byeesi kumukhono kwoowo ni nengarengekha yoowo ni byaba, byeesi waŋoonaŋoona khaale uri bibewo. 29Ne ari Umukasya, n'ubone khuriisariisa khwawe, ukhuwe ifwe babakaanisi boowo kamaani ke khukanikha shilomo shoowo ni bunyindalifu bwoosi, 30nga iwe wamweene ukolola kumukhono kwoowo khuwonesa balwaale, ni bubonelo ni bye kamakaanga bibikholekhela khubirira mu Lisiina ly'omwakaanisi woowo Umukhosefu Yezu.”
31Baryo ni baamala khuloomba, shiifwo sheesi babusanilamo shoosi shatengasibwa naabi, boosi betsusibwa n'Umwoyo Umukhosefu, barakikha khukanikha shilomo sha Wele ni kamaani koosi.
Bafukiilisi babanyoowa
32 #
Bur 2.44,45 Ari lituuli lye babaandu babafukiilila mu Yezu lyaba ni kumwoyo mutweela ni bulamu butweela. Nga mbaawo na mutweela uloma ari bibiindu byeesi aba nabyo bibyeewe khubweewe ta, ne khurusakho byoosi babikabananila atweela. 33Nga baraambisa kamaani kamakali, baarume bawanayo bujulisi bwaabwe khu khulamukha khwa Yezu khukhwaama mu bafu, ni bubweela bwa Wele bwe kamakana bwababakho boosi. 34Mu lituuli lyaawe abe mbaawo uwikoomba shishiindu shoosi ta, lwekhuba bakali babaaba ni kamaswa, namwe tsiintsu, babikulisaka, bareera byeesi bamisamo, 35babiwanayo isi baarume, babikabananisamo isi babaandu khulondekhana nga abe buli mutweela n'akana.
36Ni Yozefu isi baarume batwiikha bari, Balunaba (lilimanyisa liri, umuundu uwisamo kamaani), uwaba umu Levi, uwasaalikha i Kupulo, 37akulisa liiswa lyeewe, wareera tsinusu, watsira mu moni tse baarume.
Currently Selected:
Buraambi 4: LCE
Highlight
Share
Copy
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
