Cakirok 43

Wutmin Yozefu jogik i Misir gi Benyamin

1Onyo kec oyido gway i piny. 2Aka munyo peco pa Yakobo jotieko camo ŋano je m'oyido jonyewo wok Misir, Yakobo owaco ri wote ni, “Gik win winyew riwan cemo manok.”

3To Yuda odwoko ni, “Jal ca ociko wan teltel ni, kilayeyo wan neno go kwanyo woko ka wakidho kodi omin wan. 4K'ilaoro wan g'omin wan, wabino loro to wanyewo cemo; 5to k'ikilaoro wan gi go, wakibino loro, rupiri jal ca owaco riwan ni kilayeyo wan neno go kwanyo woko ka wakidho kodi omin wan.”

6Yakobo owaco ni, “Raŋo wikelo ran teko madit to wiwaco ri jalo ni winitie kodi omin win man?”

7Jodwoko ni, “Jalo obedo kanyo penjo kwoŋ wan gi peco mawan, ‘Bawin fodi kwo? Winitie kodi omin win man?’ Gima wawaco rigo obedo radwok ma penji pere. Oyido wanonyal nedi ŋeyo ni go oyido lawaco riwan ni wakel omin wan?”

8Aka Yuda owaco ri bamere ni, “Or jayac kodan, aka wabino kadho dicel. Kenyo ongoye kwoŋ wan ŋata bino riyo kec. 9Aciko kwo paran won, aka i penjan go. K'akidwoko go bongin maber, aŋat'abino tero apuse kicutho. 10Kabedi oyido wakikuro hongo malac, dinyo watieko kidho to wadwoko dirio.”

11Kenyo Yakobo bajo owaco rijo ni, “K'inen ripo bedo ameno, ere kethi win ranyak moro mabeyo ma lowo me i kutiyin mewin, aka witer ri gavana, vini m'othwo, gigipiny maŋwe kur, mo kic, segonya kodi yath alimond. 12Ter win bende pesa mirundi ario, rupiri ripo widwoki pesa m'odwok riwin i dhok kutiyin mewin. Kono oyido obedo kibenga. 13Ter win omin win bende aka ay win wigik bongi jacwo no. 14Weyi Were Majameni je womiy win wor ruwaŋ go, ŋey wodwoki riwin Benyamin kodi Simeo. Ka ripo akeŋ nyithindho paran, ripo akeŋ jo.”

15Ameno wutmere jokwanyo mic kodi pesa mirundi ario, aka joay to joloro Misir kodi Benyamin. Kenyo, jocungo ruwaŋ Yozefu. 16Munyo Yozefu oneno Benyamin gi jo, owaco ri ŋeca ma ot pere ni, “Ter win cwo me i ot paran, aka ithumi ogwaŋ t'itedo, rupiri cwo me jolacemo kodan sawa aucel.” 17Ŋeca no otimo paka Yozefu owaco, aka otero cwo no i ot pa Yozefu.

18Munyo oyido itero jo i ot pa Yozefu, jobwok aka jowaco ni, “Okel wan ka ro pesa m'odwok i kutiyin mawan ndir marapena. Jolamonjo wan abwap to jokwanyo punde mawan, to joloko wan ŋecin.” 19Ameno joluwo gi ŋeca ma ot pa Yozefu i dhiot, 20aka jowaco ni, “Jadwoŋ, waloro piny ka nyewo ŋano i weso marapena 21aka munyo watundo i kabedo ma wanind'iye to wayawo kutiyin mawan, pesa pa kisi nyatoro je oyido nitie i dhok kutiya pere; pesa gikululu. Ameno wadwoko gine. 22Doko bende wabino gi pesa man nyewo cemo. Wakuya ni ŋa m'oketho pesa mawan i kutiyin mawan.”

23Ŋeca no odwoko ni, “Aridho riwin, wikiri wibwok; Were mewin aka Were pa bawin ama ripo bedo ni oketho riwin pesa i kutiyin mewin.” Kenyo go okelo Simeo bongi jo.

24Ŋeca no otero jo i ot aka omiyo jo pi ŋey jowolwoki tiendi gin to pidho punde pajo. 25Joyiko mic pajo m'amiyo Yozefu k'otundi sawa aucel, rupiri oyido otiek waco rijo ni jolacemo kanyacel gi go. 26Munyo Yozefu obino peco, jokelo rigo mic m'oyido jonigine i ot, aka jokule rigo piny. 27Yozefu openjo jo kwoŋ kwo pajo aka owaco ni, “Bawin ber, jal m'oti ma wiluwo kwoŋe? Go fodi kwo?”

28Jodwoko ni, “Ŋeca perin bawan fodi kwo.” Aka joguro congi gin jo jokule piny ruwaŋ go.

29Yozefu otiŋo waŋe malo aka oneno omin go Benyamin wod pa min aka owaco ni, “Me a omin win mathin ma wiluwo kwoŋe? Were womiyin silwany wodan.” 30Kenyo Yozefu oeye abwap rupiri cunye oyido opoŋ mar ri omin. Go oyido cegin tur, aka odonjo i kisika pere to ywak. 31Munyo otieko lwoko waŋe, owok, aka odhumere to miyo cik ni wotok cemo. 32Otok ri Yozefu cemo kakende, aka jo bende kakendi gin. Jomisir m'oyido jocemo kenyo otok rijo cemo kakendi gin rupiri oyido jotero cemo gi Joebulaniya paka amien. 33Oyido okethi jo bedo i meza i nywolirok pajo to joŋiyo Yozefu; cako kwoŋ okayo tundo kwoŋ ocoko. Munyo Joneno nger m'oketh'iye jo bedo, joŋiyere i dhier. 34Otok rijo cemo wok i meza pa Yozefu aka otok ri Benyamin cemo maloyo apa wadi dibic. Ameno jocemo to jomedho gi Yozefu cuka jomer.

Currently Selected:

Cakirok 43: DHOCDC

Highlight

Copy