Cakirok 45
45
Yozefu waco ri wutmin ŋata go obedo
1Kenyo Yozefu doko k'onyalo dhumirok ruwaŋ jom'oyido jocungo cegin gi go, aka oywak, “Miy kisi nyatoro wowoki bongan.” Ameno ongoye ŋat'obedo gi go munyo Yozefu nyuthere ri wutmin. 2Aka oywaki malo ma Jomisir jowinjo, aka wac otundo i cel pa kere pa Farawo. 3Yozefu owaco ri wutmin ni, “An Yozefu; baba fodi kwo?” To wutmin jok'onyalo dwoko go, rupiri lworo omako jo swa ro bedo pere kenyo. 4Ameno Yozefu owaco ri wutmin ni, “Mondo core win cegin bongan.” Jocore aka go owaco ni, “Abedo omin win Yozefu ma witana i Misir. 5Aka onyo pama wikiri rembi kosa wopusere rupiri witana an ka, rupiri Were ooran yuwiy win botho kwo pa ji. 6Me nyaka oro mar'ario ma kec i piny; bino bedo oro abic doko ma kilabedo fur kosa keco. 7Aka Were ooran yuwiy win botho win i nger ma dhier me gi neno ni win gi nyikway win wikwo. 8Ameno oyido k'obedo win ama wioran ka, to Were. Go okethan jadhum pa Farawo ma malo, aka aŋat'akuro piny pere gipi; abedo jadhum ma Misir gipi.”
9“Redi win wikadhi malo bongi baba aka wiwaci rigo ni me gima wode Yozefu waco, ‘Were okethan jadhum ma Misir gipi; biye bongan m'ongoye galo. 10Ilabedo iy'adec ma Gosen, kama cegin kodan in gi nyithindho perin, nyikwayin, mwendi, dhok, kodi kisi gim'initie gine. 11Aka kenyo anyalo konyin, rupiri fodi nitie oro abic ma kec ma bino aka akimiti in gi peco perin g'ogwaŋe wiriy kec.’ ”
12Yozefu omedere, “Onyo wijoje, kiri gi in Benyamin, winyalo neno ni me an won Yozefu. 13Wiripo waco ri baba nger ma adwoŋ iye ka i Misir kodi gigipiny je ma witieko neno. Aka redi win wikel go ka.”
14Kenyo opodho i ŋuti omin go Benyamin to ywak, aka Benyamin bende oywaki i ŋute. 15Aka gi pigi waŋe ocwiyo lembi wutmin je. Rumacen ma gime wutmin jocako luwo gine.
16Munyo wac otundo i ot pa Farawo ni wutmin Yozefu jobino, Farawo gi jodhum pere jowinjo maber. 17Aka Farawo owaco ri Yozefu ni, “Waci ri wutmin in jowoyey punde pajo gi ŋano, jodok i piny Kanan. 18Weyi jowokwany bajo gi pecin pajo aka jowodwoki ka. Abino miyo jo lowo maber loyo i Misir, aka jobino bedo gi ma romo maloyo ma kwo i iye. 19Waci rijo bende jowoteri cawila madongo wok Misir ri mon gi nyithindho pajo maŋic jowogwey, aka jowobin gi bajo. 20Jokiri jowodew kwoŋ lim pajo ma jolaweyo cen rupiri gigipiny mabeyo i lowo ma Misir je bino bedo apajo.”
21Wot Yakobo jotimo ameno; aka Yozefu omiyo jo cawila madongo, cungo kwoŋ cik pa Farawo to miyo jo cemo ma woth. 22Ri kisi nyatoro aka ri joje omiyo nangin awira. To ri Benyamin omiyo feza 300 kodi nangin awira abic. 23Odhiro ri bamere punde apar ma jotiŋo gigipiny mabeyo wok Misir, kodi punde ma mon ma jotiŋo ŋano, mugat, kodi cemo ma woth. 24Osewila wutmin aka jodok peco bongi bajo Yakobo i Kanan; aka owaco rijo ni, “Wikiri widhaw i yo.”
25Ameno jokadho malo wok Misir aka jobino i piny Kanan bongi bajo Yakobo. 26Aka jowaco rigo ni, “Yozefu fodi kwo, aka go am'obedo jadhum ma lowo ma Misir gipi.” Cuny Yakobo opodho, rupiri k'onyalo yeyo.
27To munyo jowaco rigo wac pa Yozefu je, aka go oneno cawila madongo ma Yozefu oyido odhiro ma tiŋo go, cunye ogik; 28aka Yakobo owaco ni, “Wodan Yakobo fodi kwo! Me kende a gima d'anokway! Aripo kidho anen go kafodi akitho.”
Currently Selected:
Cakirok 45: DHOCDC
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
