Tim pa Jomoor 10
10
Petero kodi Kornelio
1Onwaŋo nitie dhano i Kasareya m'ilwoŋo ni Kornelio, jasirikale madwoŋ i lwak jolweny ma Roma m'ilwoŋo ni kitipa pa Joitalia. 2Go oyido obedo jadin matek gi ot pere gibe aka jolworo Were. Go oyido miyo kony madit ri jocandi, aka onwaŋo kwayo Were noknok. 3Dho kapa sawa abuŋwen odieceŋ moro, go oneno cal m'omenyere rigo, m'onen'iye malaika pa Were munyo donjo to lwoŋo go ni, “Kornelio!” 4Go omoro waŋe kwoŋ malaika gi lworo aka owaco ni, “Aŋo jadwoŋ?” Ana malaika: “Were ojolo kwayo perin gi tic perin ma konyo ji, aka onyo opoyin. 5Onyo or jomoro i Yopa jowolwoŋ Simon ma nyinge man Petero. 6Go obedo wendo pa Simon ma jajwayi piendere ma bedo dho thengi wakawaka.” 7Gikenyo malaika m'onwaŋo luwo gine okadho, aka Kornelio olwoŋo jotic ma ot pere jario kodi jasirikale, ma bende jadin matek m'onwaŋo obedo acel kwoŋ jokur pere. 8Owaco rijo gim'otimere je to oro jo Yopa.
9Yawere mere kapa sawa aucel m'odieceŋ, munyo jonitie i woth pajo aka onwaŋo joriko Yopa, Petero oidho wi ot kwayo. 10Gikenyo go ocako winjo kec to mito gir'acama; aka munyo fodi itedo cemo, ocako nur to neno cal m'omenyere rigo. 11Oneno polo oyawere aka gimoro oloro m'ocalo suka malac m'ocar piny gi sonda mere aŋwen pa kidho umo piny. 12I suka no onwaŋo nitie le ma piny ma kite je, gigipiny ma mol gi kor gin piny kodi winyin ma malo. 13Dwondi jo moro owaco rigo ni; “Ay malo, Petero, ineki icami!” 14To Petero owaco ni, “K'ameno, Rwoth! Fodi yado akicamo gimoro je m'itero paka gima kicar, kosa ma k'olony.” 15Dwondi jo no odoko oluwo gine ni, “Gima Were otieko lonyo, ikir'ilwoŋo ni gima kicar.” 16Gime otimere didek to idwoko gino i polo.
17Munyo Petero fodi uro dwoŋ cal ma go oneno no, ji ma Kornelio ooro rango kama ot pa Simon nitie iye jotundo kenyo to jocungo dho waŋkac. 18Jolwoŋo gi dwondi jo ma malo to jopenjo ni, “Nitie wendo moro ka ma nyinge Simon Petero?” 19Petero oyido fodi temo niaŋ i dwoŋ cal ma go oneno no to Cuny Maleŋ waco rigo ni, “Kole nitie ji adek ka ma jorangin. 20Am'omiyo yikere ilor, aka ikir'imindaminda m'ikikadho gi jo, rupiri aŋat'aoro jo.” 21Gikenyo Petero oloro to waco rijo ni, “An a ŋata wirango. Wibino raŋo?” 22Jowaco ni, “Jasirikale madwoŋ m'ilwoŋo ni Kornelio ama ooro wan. Go obedo ŋataber ma lamo Were aka Joyuda joworo go swa. Acel kwoŋ jomalaika pa Were owaco rigo nike wolwoŋin i ot pere, wonyali winjo gim'inowaci.” 23Petero orwako jono i ot to jonindo kenyo.
Yawere mere go oyikere to kadho gi jo; aka jowote moro ma jowok Yopa bende jokadho gine. 24Yawere mere jotundo Kasareya kama Kornelio oyido kur'iye go, kanyacel gi wade pere gi merin pere ma go olwoŋo. 25Munyo Petero nyaka donjo i ot, Kornelio oromo gine, to podho dho tiende gi bwonirok. 26Petero owaco rigo woay malo. Owaco ni, “cuny, kole abende adhano adhana.” 27Petero omedere gi luwo kodi Kornelio munyo donjo i ot, kam'onwaŋ'iye ji mathoth ma jocokere. 28Owaco rijo ni, “Wiwegi wiŋeyo maber nike dini pa Jayuda kiyey go riwirok kodi Jopath. To Were otieko nyuthan ni akir'ater dhano moro je paka jakicar kosa ni k'olony. 29Am'omiyo munyo ioro ji lwoŋan abino m'ongoye piem. Onyo wac ran gim'omiyo ilwoŋan.”
30Kornelio owaco ni, “Ndelo aŋwen m'okadho onwaŋo akwayo i ot paran sawa abuŋwen m'odieceŋ. Piyo piyo dhano m'orukere i ruk ma minyin ocungo ruwaŋan. 31Owaco ni, ‘Kornelio! Were owinjo kwayo perin, aka opoyo tic perin ma konyo ji. 32Or dhano moro Yopa wolwoŋi jal m'ilwoŋo ni Simon Petero ma obedo wendo peco pa Simon jajwayi piendere, ma bedo dho thengi wakawaka!’ 33Am'omiyo aoro ji lwoŋin mayot, aka itimo maber bino. Pama onyo wajoje wan ka i nyim Were, wakuro winjo gimoro je ma Rwoth oorin waco.”
Mikwenda pa Petero
34 #
Cik 10:17
Petero ocako luwo ni, “Onyo pama aneno adieri ni Were tero dhano je marom. 35Nyatoro je ma lworo go aka timo gim'otire, go jolo m'ongoye tito nono pere. 36Wiŋeyo fonji ma go odhiro ri ji ma Isiraili, ma tito Wac Manyen Maber ma kelo siem i Yesu Kristo, m'obedo Rwoth pa ji je. 37Wiŋeyo gimadwoŋ m'otimere i Yuda parom, cako Galili, cako kwoŋ batisimo ma Yohana ofonjo: 38Paka Were okonjo kwoŋ Yesu ma Nazareth Cuny Maleŋ kodi meni; paka go okidho kamoro je munyo timo bero gi botho joma two je m'onwaŋo jonitie i acanda pa jwogi, rupiri Were oyido nigi go. 39Wabedo jokony ma joŋeyo gimoro je ma go otimo i piny Yuda kodi i Yerusalem. Joneko go munyo joguro go kwoŋ musalaba. 40To Were ocerino go kwoŋ jom'otho i ndelo mar'adek, to miyo go menyere ri ji. 41Ji je jok'oneno go, to wan ayino ma wabedo jokony ma Were otieko yero. Wacemo odoko waoro gir'amadha kanyacel gine munyo Were otieko cerino go kwoŋ jom'otho. 42Aka go ooro wan fonjo ji Wac Manyen Maber, gi nyutho jo kamaler nike go a ŋata Were oketho thumo banja pa jomakwo gi jom'otho. 43Jotuci wac Were je joluwo kwoŋe, munyo jowaco ni nyatoro je m'oyey go ibino cwako reco pere gi meni ma nyingi go.”
Jopath jolimo Cuny Maleŋ
44Munyo Petero fodi luwo, Cuny Maleŋ oloro kwoŋ joje m'onwaŋo jociko ithi jo jowinjo fonji. 45Joyuda ma joyeyo ma jobino wok Yopa gi Petero jodhier ni Were okonjo mic pere ma Cuny Maleŋ kwoŋ Jopath bende. 46Ato jowinjo munyo joluwo i dhodhok manyen manyakare ka jopako dwoŋ pa Were. Aka Petero owaco ni, 47“Nitie ŋata nyalo geŋo jome kwoŋ batisimo ma pi ma to bende jotieko limo Cuny Maleŋ paka wan?” 48Gikenyo go ooro jo ni wobatisa jo i nyingi Yesu Kristo. Rumacen jokwayo Petero gin ni jowobed'iye gi jo ndelo ma romo.
Currently Selected:
Tim pa Jomoor 10: DHOPE
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
