Tim pa Jomoor 3
3
Botho ŋat'oŋol
1Ndelo moro Petero kodi Yohana oyido jokidho i Ot pa Were sawa abuŋwen m'othieno, i hongo ma kwayo. 2Kenyo, dho Waŋkac Maŋon, paka oyido ilwoŋo, oyido nitie dhano m'oŋol wok i nywolirok pere. Ndiri je bin itiŋo atiŋa ŋato aka ikelo go dho waŋkac me kwayo pesa bongi joma donjo i Ot pa Were. 3Munyo go oneno Petero kodi Yohana jodonjo, okwayo jo ni jowomiy ye go gimoro. 4Joŋiyo go nyatirtir to Petero waco ni, “Ŋiy wan!” 5Gikenyo go oŋiyo jo, munyo geno limo gimoro bongi jo. 6Aka Petero owaco rigo ni, “Angoye gi zahabu kosa feza, t'abino miyin gima an gine. I nyingi Yesu Kristo ma Nazareth, aorin ni woth!” 7Gikenyo Petero omako cinge maracuc to konyo go to ay malo. Piyo piyo no olenge tiendi jalo kodi odondo je jobedo m'ocwiny; 8go opor malo, ocungo gi tiende to cako kisedela gi woth. Gikenyo go odonjo i Ot pa Were gi jo, munyo wotho aka por malo gi pako Were. 9Lwak ji je joneno go munyo wotho aka pako Were. 10Aka munyo joŋeyo ni meno jakwac ma yado bedo dho Waŋkac Maŋon ma Ot pa Were, jouro swa aka jobedo gi dhier kwoŋ gim'otimere rigo.
Fonji pa Petero i Ot pa Were
11Munyo fodi jalo ocwire kwoŋ Petero gi Yohana, ji je jodhier aka joringo bongi jo I Kalikondi pa Solomon, paka oyido ilwoŋo. 12Munyo Petero oneno gime, owaco rijo ni, “Ji ma Isiraili raŋo ma wiuro gime, kosa raŋo ma wicomo waŋ win kwoŋ wan? Wiparo nike gi meni mawan won, kosa ni rupiri waŋeyo lamo Were maber am'omiyo ŋatin wotho? 13#Wok 3:15Kole Were pa Abraham, Isaka, kodi Yakobo, Were pa kwarere mawan, am'omiyo Yesu Jatic pere dwoŋ. Wibolo go i cingi jodhum aka wikwedo go ruwaŋ Pilato, kada munyo Pilato onwaŋo otieko ridho gunyo go. 14#Mat 27:15-23; Mar 15:6-14; Luk 23:13-23; Yoh 19:12-15Kole go oyido leŋ aka ber, to wikwero go, kucel wikwayo Pilato ni wogonyi riwin janek ayino. 15Wineko Won kwo, to Were cerino go kwoŋ jom'otho; aka wabedo jokony ma joneno gime. 16Kole nyingi Yesu kodi yeyo kwoŋ nyinge am'omiyo jal ma wiŋeyo me kilam ama ruwaŋ wijoje.”
17“Onyo pama, wutmera, aŋeyo nike gima win kodi jotel mewin witimo ri Yesu obedo gima witimo ma wikuya. 18Me a gima Were cango owaco gi i dhok jotuci wac pere ni Kristo ripo candere; aka am'omiyo gino otimere adieri i royo me. 19Am'omiyo, ŋuti win reco mewin wigik bongi Were, ŋey reco mewin worey woko, aka ŋey hongo ma kelo lothi manyen wok bongi Rwoth wobin riwin, 20aka go wodhiri riwin Kristo, ma go otieko yero riwin, m'obedo Yesu. 21Go ripo doŋ i polo cuka ndir otundi ma Were odwok'iye gigipiny je i kare, paka Were owaco gi i dhok jotuci wac pere ma cango con. 22#Cik 18:15-18Kole Musa cango owaco ni, ‘Rwoth Were mewin bino dhiro riwin jatuci wac Were ma bino wok kwoŋ ji mewin won paka odhiran bongi win ama. Wiripo ciko ithi win wiwinji gimoro je ma go owaci riwin. 23#Cik 18:19Nyatoro je ma k'owinji wac pere, ibino kwanyo go woko kwoŋ ji pa Were to ireyo go woko.’ 24To jotuci wac Were je wok kwoŋ Samwiri kodi jom'oluwo ŋeye joje ma jobedo gi mikwenda, bende joluwo kwoŋ ndelo agono. 25#Cak 22:18Aka wibedo jolunji gima jotuci wac Were cango joluwo kwoŋe i cikirok ma Were otimo gi kwarere mewin, munyo owaco ri Abraham ni, Abino miyo ji je ma piny silwany wok kwoŋ kodhi perin. 26Am'omiyo Were oyero aka okutho open dhiro jatic pere bongi win won, womiy win silwany munyo wiro wijoje ni wieye woko i yo mewin mareco.”
Currently Selected:
Tim pa Jomoor 3: DHOPE
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
