Tim pa Jomoor 8
8
1Aka Saulo oyeyere gi neki me.
Saulo lwenyo gi kitipa pa jom'oyeyo
Gi i ndelo no won, kitipa pa jom'oyeyo ma Yerusalem ocako nwaŋo acanda malith. Jom'oyeyo je, kwanyo woko jomoor, jotiakere iy'adec ma Yuda kodi Samaria parom. 2Cwo moro ma jomiyere ri Were joyiko Stefano munyo joywako go gi geregere madwoŋ.
3 #
Tim 22:4,5; 26:9-11 To Saulo otemo reyo woko kitipa pa jom'oyeyo munyo wotho i kisi dhiot pa jom'oyeyo ka coko jo, cwo gi mon, aka bolo jo i twec.
Fonjo Wac Manyen Maber i Samaria
4Jom'oyeyo ma okedhi jo jokidho iye je munyo jofonjo Wac pa Were. 5Filipo okidho i tindi ma Samaria to fonjo ji kwoŋ Kristo. 6Lwak ji jociko ithi jo gi cuny jo acel munyo jowinjo fonji pa Filipo gi gir'aura ma go otimo. 7Cuny m'ocido jowok kwoŋ ji madit gi derino madwoŋ; ji mathoth ma jotwo nyaŋinya, kodi jom'oŋol bende jobedo maber. 8Aka kisangala madwoŋ obedo Samaria gipi. 9I tindi no oyido nitie nyatoro m'ilwoŋo ni Simon, ma yado miyo Josamaria dhier gi thieth pere. Go oyido waco nike go ŋatadwoŋ swa, 10aka dhano je i tindi, i kitipa ji ma nger je ociko ithe maber winjo go. Jowaco ni, “Jame a meni pa Were m'ilwoŋo ni, ‘Ma Siragama’ ” 11Go oyido otieko miyo ji dhier gi thieth pere hongo malac swa m'omiyo bin jociko ithi gin winjo go. 12To munyo joyeyo fonji pa Filipo kwoŋ Wac Manyen Maber ma Ker pa Were kodi nyingi Yesu Kristo, aka obatisa jo, cwo gi mon. 13Simon je bende oyeyo, aka munyo otiek kibatisa go, obedo cegin gi Filipo to dhier swa munyo oneno ranyuth madongo kodi gir'aura m'onwaŋo itimo.
14Munyo jomoor ma Yerusalem jowinjo nike ji ma Samaria jotieko jolo wac pa Were, jodhiro Petero gi Yohana rijo. 15Munyo jotundo, jokwayo ri jom'oyeyo nike jowolimi Cuny Maleŋ. 16Ato Cuny Maleŋ onwaŋo fodi k'oloro ri kada ŋat'acel kwoŋ jo; onwaŋo nyaka otiek kibatisa jo i nyingi Rwoth Yesu. 17Gikenyo Petero gi Yohana joketho cingi gin kwoŋ jo, to jolimo Cuny Maleŋ.
18Munyo Simon oneno nike Cuny Maleŋ loro ri ji ka jomoor joketho cingi gin kwoŋ jo, ocwayo pesa ri Petero kodi Yohana 19ka waco ni, “Miyan win bende meni me, aka wangi ka aketho cingan kwoŋ moro go bino limo Cuny Maleŋ.” 20To Petero odwoko ni, “Kadhi itho koro gi pesa perin, rupiri oyido iparo ni inyalo nyewo mic pa Were gi pesa! 21Ingoye gi kabedo i tic mawan me, rupiri cunyin k'otire ruwaŋ Were. 22Am'omiyo ŋuti kwoŋ tim perin marac me, aka ikway Rwoth nike wocwakin kwoŋ paro marac me, 23rupiri aneno ni duro opoŋ i cunyin, aka gimarac otweyin.” 24Simon owaco ri Petero kodi Yohana ni, “Mondo kway win ran Rwoth, ŋey wongoye kada gimoro acel ma wiluwo kwoŋe me ma wotiman.” 25Munyo jotieko niaŋo ji mikwenda pa Rwoth, Petero gi Yohana jogik Yerusalem. Jofonjo Wac Manyen Maber malomalo iy'adec m'omore i Samaria.
Filipo kodi jasirikale ma Ethopiya
26Malaika pa Rwoth oluwo gi Filipo ni, “Yikere ilakidho i royo ma yu Tiendan piny ma wok i Yerusalem aka laro yu Gaza.” 27Me obedo royo ma thim. Gikenyo Filipo oyikere to kadho. I hongo no jatic ma Ethopiya onwaŋo dok yu peco. Ŋati me oyido obedo jasirikale madwoŋ ma kuro dero ŋaŋo pa nyamicala ma Ethopiya m'ilwoŋo ni Kandase. Go oyido owok Yerusalem lamo Were, 28aka onwaŋo dok gi cawila pere munyo soma kitawo pa jatuci wac Isaya malomalo. 29Cuny Maleŋ owaco ri Filipo ni, “Kidhi irom kodi cawila no.” 30Filipo oringo bonge to winjo munyo go soma kitawo pa Isaya; gikenyo openjo go ni, “Iŋeyo dwoŋ gim'isoma no?” 31Ana Jasirikale, “Anyalo nedi ŋeyo dwoŋ mere ma nyatoro k'otito ran?” Go olwoŋo Filipo ni woidhi cawila wobed'iye gine. 32Adec ma randik m'oyido go soma a me:
“Paka rombo m'itero thumo,
kosa nyathi rombo m'ilielo
yer mere, go k'oŋamo dhoke ni luwo.
33I acanda pere odiy go piny i banja.
Ŋa manyalo tito kwoŋ luse pere?
Kole orey woko kwo pere i piny ka ma piyo.”
34Jasirikale owaco ri Filipo ni, “Waci ran, jatuci wac me luwo kwoŋ ŋa me? Kwoŋ go won, kosa ŋatiman?” 35Gikenyo Filipo ocako tito rigo kwoŋ adec ma randik me; otito rigo Wac Manyen Maber mapa Yesu. 36Munyo fodi jowotho i royo, jotundo kama dipi, to jasirikale waco ni, “Kole pi moro ee. Aŋo ma geŋan limo batisimo?” 37[Filipo owaco rigo ni, “Inyalo kibatisa in k'iyeyo gi cunyin je.” Ana go ni, “Ayeyo ni Yesu Kristo obedo Wod Were”]. 38Jasirikale ooro jatic pere juko cawila; gikenyo jario no, Filipo kodi jasirikale jokidho i pi, to batisa go. 39Munyo jowok i pi, Cuny Maleŋ pa Rwoth okwanyo Filipo. Josirikale odoko k'oneno go, to medere gi woth pere, munyo kisangala opoŋ i cunye. 40Filipo opoyo munyo go nitie i Azoto; to wotho i tindi parom munyo fonjo Wac Manyen Maber, cuka otundo Kasareya.
Currently Selected:
Tim pa Jomoor 8: DHOPE
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
