Yohana 16
16
1“Awaco riwin gime aka wikiri wiyengere i yeyo mewin. 2Jobino riemo win woko i kitipa pa jom'oyeyo pa Joyuda, aka ndir bino tundo ma moro je ma neko win bino paro nike ka timo ameno meno tiyo ri Were. 3Jobino timo gigipiny me riwin rupiri jokuya Baba kosa an. 4To awaco riwin gime, ni ka ndir mere otundi, wibino poyo nike atieko luwo riwin kwoŋe.”
Tic pa Cuny Maleŋ
“Akutho akiwaco riwin gime rupiri oyido fodi anitie gi win. 5Pama onyo akidho bongi ŋat'ooran, to ongoye kwoŋ win kada ŋata penjan ni, ‘Ikidho yukune?’ 6Ato paka onyo atuco riwin gime, rembo onyo opoŋ i cuny win. 7To adieri awaco riwin: Bedo gimaber riwin ka akadho, rupiri ka akikadho, Jamiy rieko kilabino bongi win. To k'atieko kadho, nyaka abino dhiro riwin go. 8Aka ka go obino, go bino miyo piny ramirok kwoŋ reco, kodi tiro, kodi thumo banja; 9kwoŋ reco, rupiri jok'oyeyan; 10kwoŋ tiro, rupiri akidho bongi Baba aka odoko wik'onenan; 11kwoŋ thumo banja, rupiri jadhum ma piny ka otiek thumo rigo banja.”
12“Anitie kodi gigipiny man awaca riwin, to gunyo ni fodi wikinyal ciro. 13To ka Cuny mar'adieri obin, go bino nyutho win adieri je. Ato go kilaluwo gi i wiye won, to bino waco riwin gima go owinjo, odoko go bino nyutho win kwoŋ gima labino rumacen. 14Go bino miyan dwoŋ, rupiri go bino waco riwin gimoro je m'okwanyo bongan. 15Gimoro je ma Baba nitie gine meno aparan; am'omiyo atieko waco riwin nike go bino waco riwin gimoro je ma go okwanyo bongan.”
Rem kodi kisangala
16“I hongo macek wikibino nenan; to i hongo macek wibino nenan kendo.” 17Megi kwoŋ jofonjirok pere jopenjere wegi kendi gin ni, “Gime dwoŋ mere aŋo? Go waco riwan ni, ‘I hongo macek wikibino nenan, to i hongo macek wibino nenan kendo.’ Odoko ni, ‘Rupiri akidho bongi Baba.’ ” 18Jomedere gi penjo ni, “Hongo macek me, dwoŋ mere aŋo? Fodi wakiniaŋ gima go luwo kwoŋe?”
19Yesu oŋeyo nike jomito penjo go, riameno owaco rijo ni, “Onyo wiwegi wipenjere kwoŋ gim'awok waco ni, ‘I hongo macek wikibino nenan, to i hongo macek wibino nenan kendo?’ 20Adieri awaco riwin, wibino ywak to wirem, kareno piny sangala. Wibino winjo malith, to winjo malith mewin no bino lokere kisangala. 21I hongo ma nywol, dhako winjo litho, rupiri hongo pere ma candirok otundo, to ka otieko nywolo nyathi pere go wiye wil gi litho ca, rupiri go onyo sangala nike nyathi otieko nywole i piny. 22Meno apaka bende nitie gi win. Pama onyo wiwinjo litho, t'abino neno win kendo, aka cuny win bino poŋ gi kisangala, kiti kisangala ma moro kinyal mayo win.”
23“Ka ndelo no otundo wikibino kwayan gimoro. Adieri awaco riwin, Baba bino miyo win gimoro je ma winokway i nyingan. 24Gunyo ni fodi wikikwayo gimoro i nyingan, kway win aka wibino limo, ŋey kisangala mewin wobedi m'opoŋ.”
Yesu loyo candirok ma piny
25“Awaco riwin gigipiny me g'agecin, to ndir bino tundo ma akibino oro agecin kendo, t'abino luwo riwin nyatirtir kwoŋ Baba. 26Ka ndir no otundo, wibino kwayo go i nyingan; aka akiwaci ni abino kwayo go gimoro riwin, 27rupiri Baba won omaro win rupiri wimaran aka wiyeyo nike awok bongi Were. 28Awok bongi Baba t'abino i piny, aka onyo aeye i piny agik kendo bongi Baba.”
29Gikenyo jofonjirok pere jowaco rigo ni, “Nyaka onyo iluwo nyatirtir, makiweno i agecin. 30Nyaka onyo waŋeyo ni iŋeyo gimoro je; ikiyeny moro wopenjin kendo. Me miyo wayeyo nike adieri iwok bongi Were.” 31Yesu odwoko jo ni, “Onyo nyaka wiyeyo? 32Ndiri bino tundo, aka otieko kiri tundo ma wijoje wibino kedher'iye to dhano je dok peco pere, aka wibino weyan kendan. To akinitie kendan, rupiri Baba nitie kodan. 33Atieko waco riwin gime ŋey wibedi i siem i riwirok kodan. Piny bino miyo wicandere. To bedi win miseni! Atieko loyo candirok ma piny!”
Currently Selected:
Yohana 16: DHOPE
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
