Luka 15
15
Rombo m'orwenyo
(Mat 18:12-14)
1 #
Luk 5:29-30
Ndelo moro jocoki misolo kodi joreco moro jobino bongi Yesu winjo go. 2Gikenyo Jofarisayo kodi Jondiko jocako kigeŋisa ni, “Ŋati me jolo joreco aka cemo kiri gi jo!” 3Am'omiyo, Yesu oluwo rijo iy'ageca ama: 4“Ŋa kwoŋ win ma ka nitie gi rombo miya acel, aka acel rwenyi, kiwey piero abuŋwen g'abuŋwen i sa to kidho rango m'orwenyo ca cuka onwaŋ? 5Aka ka otieko nwaŋo rombo no, tiŋo i goke gi kisangala. 6Gikenyo ka otundo peco lwoŋo merin gi joger pere munyo waco ni, ‘Biye sangala win kodan, rupiri atieko nwaŋo rombo paran m'oyido orwenyo.’ 7Ameno bende awaco riwin, kisangala bino asirok i polo maloyo ro ŋat'acel ma ŋuto reco pere loyo ji m'otire piero abuŋwen g'abuŋwen ma kiyenyere rijo ŋuto kendo.”
Pesa m'orwenyo
8“Kosa dhako mene ma ka nitie gi nusu pesa ma siringi apar to rwenyo acel, kicwiny tala, to yweyo ot, to rango maber swa iye je cuka nwaŋo? 9Aka k'onwaŋo pesa no, lwoŋo merin gi joger pere kanyacel munyo waco rijo ni, ‘Biye sangala win kodan, rupiri anwaŋo pesa paran m'oyido orwenyo.’ 10Ameno bende awaco riwin, kisangala nitie ri jomalaika pa Were ka jagimarac acel oŋuto reco pere.”
Jayac m'oyido orwenyo
11Yesu omedo waco ni, “Jal moro oyido nitie gi wote ario; 12wode mathin owaco ri bamere ni, ‘Baba, miyan pama lim je m'aripo lunjo.’ Gikenyo bajo opoko go lim pere. 13Ndelo okadho manok, to wode mathin no coko lim pere je m'onwaŋo go nitie gine, to kadho wiloka mabor, to nyeko woko lim pere no i kwo marac. 14Aka munyo ocowo nyeko woko gimoro je, kec madwoŋ odonjo i piny no to go bedo ma bu gimoro. 15Gikenyo go okidho bedo paka misemeli pa nyatoro i piny no to miyo go tic kwayo mbiji. 16Aka go d'osangala camo amola majanjal ma mbiji camo, to moro ongoye m'omiyo go gimoro. 17To munyo oparo i cunye, owaco ni, ‘Kole jotic pa baba je jonigi cemo ma jocamo denge to doŋ; to raŋo m'akidho tho kec ama! 18Alaay mayot t'adok bongi baba t'awaco rigo ni, baba, atieko nyeko ruwaŋ Were kodi i waŋin. 19Pama akiripi kad'alwoŋa ni wodin kendo; teran paka acel kwoŋ jotic perin.’ 20Gikenyo go oay mayot to cako woth ma dok bongi bamere.”
“To munyo fodi go nitie bor ye gi peco, bamere oneno go; wor opoŋ i cunye to ringo, to podho i kor wode to cwiyo lembe. 21Gikenyo wode owaco ni, ‘Baba, atieko timo gimarac i nyim Were kodi i nyimin. Pama akiripi kad'alwoŋa ni wodin.’ 22To bamere olwoŋo jotic pere munyo waco ni, ‘Redi win! Keli win ruk mabeyo je wirwaki rigo. Rwaki win rigo peta i lwet cinge gi war i tiende; 23aka kidhi wikel rwath dhiaŋ ma cwe no wineki, aka weyi konon wacam kalima. 24Kole wodan me oyido otieko tho to pama onyo kwo; onwaŋo otieko rwenyo to pama onyo onwaŋere.’ Gikenyo to kalima cakere.”
25“I hongo no wode madwoŋ oyido nitie i ndelo. To munyo dwoko aka oyido cegin riko peco, owinjo wer gi miel. 26Gikenyo olwoŋo jatic acel to penjo go ni, ‘Aŋo ma timere?’ 27Jatic odwoko ni, ‘Omerin am'odwoko peco, aka benin oneko rwath ma cwe ca, rupiri wode odwoko maber, kendo m'olama.’ 28Omin madwoŋ nge omako to kwero kiri donjo i ot; gikenyo bamere owok woko to temo naŋo go ni wodonji. 29To go odwoko bamere ni, ‘Neni! Atieko tic rin kweth oro me je, ma kicayin kada dicel, to kole ongoye kada nyathi diel m'imiyan nike bende atimi ye gine kalima ri merin paran. 30Aka wodin m'onyeko lim perin gi mon ma jotana delkwoŋ jo i timo giwickwot me, am'onyo odwoko peco t'ineko rigo rwath dhiaŋ ma cwe!’ 31Bamere odwoko go ni, ‘Wodan, kole ndelo je in kodan peco ka, aka gimoro je man gine meno aperin. 32Aka oyido ripo ni watim kalima wasangala ye; kole omin in me onwaŋo otieko tho, to pama onyo kwo; onwaŋo otieko rwenyo, to pama onyo onwaŋere.’ ”
Currently Selected:
Luka 15: DHOPE
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
