GENESIS 28
28
Si Jacob Gipaadto ni Isaac kang Laban
1Unya gitawag ni Isaac si Jacob ug iyang gipanalanginan siya, ug gipahimangnoan siya, “Ayaw pangasawa sa usa sa mga babaye nga Canaanhon. 2Tindog ug lakaw ngadto sa Padan-aram, sa balay ni Betuel nga amahan sa imong inahan ug pangasawa didto gikan sa mga anak ni Laban nga igsoon sa imong inahan. 3Ug ang Dios nga Labing Gamhanan sa tanan magpanalangin kanimo ug maghimo kanimo nga mabungahon ug magpadaghan kanimo aron ikaw mahimo nga usa ka panon sa mga katawhan. 4Ihatag unta niya ang panalangin ni Abraham nganha kanimo ug sa imong kaliwat uban kanimo aron mapanununod nimo ang yuta nga imong gilangyawan nga gihatag sa Dios kang Abraham.” #Gen. 17:4-8. 5Busa si Jacob gipalakaw ni Isaac ug siya miadto sa Padan-aram, ngadto kang Laban nga anak ni Betuel nga Aramhanon ug igsoon ni Rebecca nga inahan ni Jacob ug ni Esau.
Si Esau Nangasawa na Usab
6Karon nakita ni Esau nga si Isaac nagpanalangin kang Jacob ug iyang gipalakaw siya ngadto sa Padan-aram sa pagpangasawa ug nga sa iyang pagpanalangin kang Jacob iyang gipahimangnoan siya, “Ayaw pangasawa sa usa sa mga babaye nga Canaanhon.” 7Ug nakita usab niya nga mituman si Jacob sa iyang amahan ug sa iyang inahan ug miadto sa Padan-aram. 8Busa nakita ni Esau nga ang mga babaye nga Canaanhon wala makapahimuot kang Isaac nga iyang amahan. 9Busa miadto si Esau kang Ismael ug nangasawa ug dugang sa iyang mga asawa, kang Mahalat nga anak ni Ismael nga anak ni Abraham, ug igsoon nga babaye ni Nebaiot.
Ang Damgo ni Jacob Didto sa Betel
10Ug si Jacob mibiya sa Beer-seba ug mipadulong sa Haran. 11Unya miabot siya sa usa ka dapit ug mipabilin didto sa tibuok nga gabii kay misalop na ang adlaw. Ug mikuha siya ug usa sa mga bato niadtong dapita nga iyang gibutang ilalom sa iyang ulo ug mihigda siya aron matulog niadtong dapita. 12#Juan 1:51. Ug nagdamgo siya nga dihay usa ka hagdan nga gipatindog sa yuta ug ang tumoy niini miabot sa langit. Ug ang mga anghel sa Dios nagsaka-kanaog niini. 13#Gen. 13:14-15. Ug didto ang Ginoo nagtindog sa ibabaw niini, #28:13 sa ibabaw niini o tupad kaniya. ug miingon, “Ako mao ang Ginoo, ang Dios ni Abraham nga imong amahan ug ang Dios ni Isaac. Ang yuta nga imong gihigdaan ihatag ko kanimo ug sa imong kaliwatan. 14#Gen. 12:3; 22:18. Ug ang imong mga kaliwat mahimong sama sa abog sa yuta ug mokatap kamo ngadto sa kasadpan, sa silangan, sa amihanan ug sa habagatan. Ug pinaagi kanimo ug sa imong kaliwatan panalanginan ang tanan nga mga kabanayan sa yuta. 15Tan-awa, ako mag-uban kanimo ug magbantay kanimo bisan asa ikaw moadto ug ikaw pabalikon nako niining yutaa kay ako dili mobiya kanimo hangtod nga matuman nako ang akong gisulti kanimo.” 16Unya nakamata si Jacob gikan sa iyang pagkatulog ug miingon, “Ang Ginoo ania gayod niining dapita ug ako wala mahibalo niini.” 17Ug nahadlok siya ug miingon, “Pagkamakalilisang niining dapita! Kini walay lain kondili ang balay sa Dios ug kini mao gayod ang ganghaan sa langit.”
18Busa si Jacob mibangon sayo sa pagkabuntag ug gikuha niya ang bato nga iyang gibutang ilalom sa iyang ulo ug kini gipatindog niya ingon nga usa ka haligi ug iyang gibuboan ug lana ang ibabaw niini. 19Ug kadtong dapita ginganlan niya ug Betel#28:19 BETEL: Sa ato pa, balay sa Dios. apan sa sinugdan ang ngalan niadtong lungsora Luz. 20Ug si Jacob naghimo ug usa ka panumpa, nga nag-ingon, “Kon ang Dios mag-uban kanako ug magbantay kanako niining dalana nga akong gilaktan ug maghatag kanako ug kan-onon ug bisti nga isul-ob, 21ug nga ako makabalik nga malinawon ngadto sa balay sa akong amahan, ang Ginoo mahimo nga akong Dios. 22Unya kining batoha nga akong gipatindog ingon nga usa ka haligi mahimong balay sa Dios. Ug sa tanan nga imong gihatag kanako, ihatag gayod nako ang ikapulo kanimo.”
Currently Selected:
GENESIS 28: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
