Matááyo 15
15
Hemuumurit Waaˈgiet ubaa nyatalaam gálaat hol ká eiyye
1Aalé gál Farisaay ubaa gál gálaat nyatalaam oonisuoká ˈdáá tikiˈd Yerúsalem gáá yimie, Yíésu ˈdú sedhe, mú heete, kieye, 2Háteka lalikú nyátál karukúnno hí gáál af kí hay-, hátlé ke ˈguom ma kônyká ke gil ˈjiˈjidheká haychéel? gaalí yie. 3Yíésu gáál ˈdéé hol ˈdú nie, kieye, Tá itín háteka hí hemuumurit Waaˈgiet gíl sug ki hayche-, hí nyátálkícho el gaa igiˈdáal? 4Waag hé hoteká kieye, ˈJaakú ubaa ˈjiekú kiikíawo,#15:4 Yíéˈdími 20:12; Hemuumurít ˈDéé Hótlé 5:16 he chie. Héétí geđi úba kieye, Máá ˈjaalle yíekaʼ, ˈjielle yíekaʼ chaacharoká gaalí yeeso,#15:4 Yíéˈdími 21:17; ˈDeemano Gál Levi 20:9 he chie. 5Tá itín hí gálaat he oonisicha-, hí kieye, Máádhat ˈjaalle yíekaʼ, ˈjielle yíekaʼ geeyo-, kieye, Yáá hé onnônyka ko ka shigieká ko ma ká shiginy, hé kinaallá Waago yú shigia, gáál yegetká, hí kí ˈdúwáal! 6Hééllá in kín yaalmit gál gáál ˈdaloká ke ki kikiatkâ? Itín it nyátálkícho ˈderneyche, hí ˈdeeny Waaˈgiet eesheyche. 7It halúg gál ˈduuˈdúwaká hol hođicháal! ˈDeeny héle Waag hí Yisááya ka shiiche-, Yisááya hí veereká gon ˈdaakíchoka hé ˈduwa, 8giri Waag kieye,
Gálallá taalle afo ye ki memeye,
gerle hé tág ye gaa fág.
9Gaal hállééllá ye vivita.
Gaal he onisinylé gálaat oonisuoká
he he onisiny taalle gálaat hí metle kí mumuroká,#15:9 Yisááya 29:13
chieká.
Hé innum Waaˈgietka máádhat ˈdeđeneyoká
10Yíésu nyesebich hol ˈdú vie, kieye, Ye af nee kóo, ˈdeenyééllá eiy naatíe. 11He hé níínní máádhat a geer higilo-, máádhat ˈdeđeneyoká mán, hé máádhat ageer yé gáá ˈdeˈdeenká in tákáma máádhat ˈdeđeneye, Yíésu hí yie.
12Aalé gál láliká Yíésu ˈdu gáá yimie, kieye, Gál Farisaay hát ˈdeenykú néballá kó kimisate? gaalí mú yie. 13Yíésu gáál geey, kieye, Ameeny ˈguor ˈJaa chia úr ijoká hí ma fíinyká, lulle ˈJaachú hidh ˈgar haí babaa. 14Gál Farisaayallá hayyíe, gálallá he gál bala maaman-, gállé bala maamanká gil met chichiratká. Tá máá bala mánká máállé bala mánká gíl mé chiˈdeka, gaal hullaalle đo ˈguoˈd hai ki okoˈde, muí gáál yie.
15Aalé Bétiro Yíésu heete, kieye, Ebá he hol ki ekenyééllá nyí eiy kí naʼ, yie. 16Yíésu kieye, Itín úba it ˈdaalim hí he eiy ki nannasatká mân? 17It he lullé máádhat a geer higiloká hát mú geer gaa nannaat-, tá ˈdaa baaˈdiet yé ki ˈdeˈdeenká múog? 18Tá hé máádhat a geer yé gáá ˈdeˈdeenká he hé máádhat geer gaa ijoká. Hé kinaallá in máádhat ˈdeđeneye. 19Hé máádhat a geer yé gáá ˈdeˈdeenká he tawuny ˈdeewká, máádhat oosó, hol ˈdú herginy, hol buraa, héétí buraa ubaa hódho, tá máádhat méé ˈdeeneny. 20Hé kinaallá in máádhat ˈdeđeneye. Máádhat gil ma ˈjian-, tá ˈguom koeyka, hé kinaallá hé mú ma ˈdeđeneny, Yíésu hí gáál yie.
Min kídh Yuuˈdi muuninyká iiy yeenlé
21Yíésu ál kinaal gaa kie, ˈjien Turo ubaa ˈjien Siˈdon léslé mé nie. 22Aalé min kídh Kanaan-, lés kinaal gaa iđe mare mú ˈdu gáá chimie, af gaa guđoká ˈdéé ki hote, kieye, Máá Guđo, Iny ˈDawuˈdallo!#15:22 Iny ˈDawuˈd hélle kieye, máá ˈbíl íl ˈDawuˈd. Geer hí ko ye ˈdú guat, inichú hé tág aryáán hí ˈgaaˈgaate! chie. 23Tá Yíésu hé ˈdeeny níínní min hol ˈdú nieká mán. Aalé gál láliká Yíésu af ki helie, gaal kieye, Min gáál el gaa igiˈdo-, tá koˈdam ˈdaˈdichóóllá ali má gaa aríyyo? yie. 24Yíésu kieye, Yú ˈbíl íl Yisirayel tákáma gálle Waag hí ye ali ˈdu gáá kaayye. Gál kinaallá he wala bađay-, yú ˈdu gáá riebeká, yie.
25Aalé min đo Yíésu bala kí ˈdiiyye, mú ˈgas met les kurram gaa ˈdoyye, kieye, Máá Guđo, ye ˈdú ˈjé! chie. 26Yíésu min ˈdéé hol ˈdú nie, kieye, Um ki ˈguom af gáá egew-, ˈguom ki chier shiguoká hé tagle muuniny, yie. 27Min kieye, Máá Guđo, táglé hogoto! Tá chier hé úba ká yiimet, gállé hí hoteká ˈguomlé les ki okodmuoká les gaa shugunat, kokuo, chie. 28Aalé Yíésu min geey, kieye, Minnééllo! Iiy yeenkú hé tág guđo, he hí hát feˈdeká ˈdie, yie. Ini giriká đo aadh ˈgás kinaal gaa biiyye.
Yíésu gál burnayká bisie
29Yíésu ál kinaal gaa kie, Bás Galilaaya in nadhe, mu gúm feˈjie, yíéđie. 30Nyésébích ilishká mú ˈdu gáá yimie, gaal gál héljoká, gál in maamanká, gál ˈgas maamanká, ubaa gál af maamanká, tá gál burnay-, basham ˈguoká lulle ká sisidhe, gáál Yíésu ˈgasle met fie, gáál Yíésu hí bisie. 31Aalé gál af maamanayká ˈdeem huogodhe-, gál héljoká bie-, gál ˈgas maamanayká hol gaa seeseme-, gál in maamanayká úba biiy gaa argeká, nyesebich đo af gil hí fame, gaal Waag Yisirayel meey.
Yíésu gál shíí afur-, af ˈdaab gúúđo ˈguoká gololie
32Yíésu lalille ká vie, kieye, Yáá tág gálallá geer hí ye ˈdú gudhdhe, gáál kulich seđe nyí hol a rayye, gaal káána hé kokuoká hé mán. Yáá gáál hatallá haađuo-, gaal seseen-, gaal le hursam les ˈdaraanká ma fediny, yie. 33Mú lalille kieye, Múún ˈbakate ki ija, ˈguom gál burnay ˈdááballóóllá gaa ˈdoyyoká ále ki gáá egee? yie. 34Yíésu gáál heete, kieye, Balashá mia hí ˈgayya? yie. Gaal kieye, Balashá tiiya ubaa beeny iraam mán mare tákáma nyí ˈgayya, yie. 35Aalé Yíésu nyesebich les iđie. 36Yíésu balasha tiiyaká ubaa beeny giriká eedhdhe, Waag ˈgielmít hol ˈdú nie, balashá eiy ˈgiˈgidhie, balashá lalille shie, lali hí gálaat eiy gise. 37Gálaat lulle gololte, heyie. ˈGuom gaalí ˈdú heyie-, ka ˈgisateká illam tiiya koch koch. #15:37 Illamééllá kulidhe gaalí gaa dhaay. 38Gál ˈguom kinaallá koeyká lúl ke gál ˈdiet ubaa um taak gaa eeyka, gál yaab shíí afur. 39Aalé Yíésu gáál eiy galieká đo kadich hile, lés Magaˈdan mé nie.
Currently Selected:
Matááyo 15: dsh
Highlight
Share
Copy
Want to have your highlights saved across all your devices? Sign up or sign in
Bible Translation and Literacy
