Matááyo 24
24
Yíésu ˈBíl Waaˈgiet ˈgieˈginyle hodhe
1Yíésu ˈBíl Waaˈgiet yé gaa ˈdie-, sesemeká lalille hí af ˈbóíy ˈdú nie, giri ˈBíl Waaˈgiet ényle hát ˈdisach hí midhabká mú aargisuoká. 2Aaléka, Yíésu gáál yiete, kieye, It ényallá lullééllá argiyyâ? Yú hí hé ˈdúwaká geeye, hééllá lulle ha gaalí ˈgieˈgia, hé wár níínní wár eiy ˈdug ˈdú ˈgiisatká mán, gáál yie.
Manyjasiny ubaa oosó
3Hééllá el ˈdaal, Yíésu Gúm Saano Salabká ˈdú yíéđie mú lalille tákámle mú ˈdú sedhe, mú yiete, kieye, Ebá nyí ka géesh, hééllá lulle bár máre he ali kí ˈdeeme? Tá kuun hol ka naankú ubaa biiy el met ˈdaˈdle bárlé ali kí ˈdeennoká meete yé ká ˈdeeme, nyí ki kiimisata? gaalí yie.
4Yíésu gáál ˈdéé hol ˈdú nie, kieye, Hol ˈdeeˈdemíe, ha máádhat hí nyimísan. 5Gál burnayká meenychú hai kí yiimedhe, gálaat hai geđia, kieye, Yú he Kirísto,#24:5 Af Heberewka Kirísto he Messíya. Messíya hélle kieye, Máá Waag hí salab mé ki liiyye-, Waag hí kansím koyyeká. hai yeedhe. Gaal gál burnayká hai baađisia. 6Oosom fayamle ubaa oosom hemle haí maalla. Tá haí bírginy! Hééllá yiem hai ká ˈdeeme, tá les el ˈdaˈdle hé geđ igiˈdo. 7Kidh hollo hol yeese, kansimano lesam met eiy ki ˈgiiyyoká hollo hol cheese. Biiy alb burnayká kuoˈd ubaa les motiny haí gáá ˈdeenne. 8Hééllá lulle kulle hát geer veerit erkob-, min verennoká he ká yaalla.
9Af kinaallá itín ha gaalí ˈgiiliˈgaa, gál hí maanyjasuoká gil ger ha gaalí fafaa, ha gaalí yeese, ˈdaa meenychú ˈdugaka kidh met lulle haí neebeedhe. 10Gál burnay-, ye iiy yieká el af hai ye gaa taama, gaal gál ye iiy yeen ka ˈguoká hai neebeedhe, gáál hem hai gaa siidha. 11Gál burnay hođomlé-, hol gál Waag hí ˈdeem ka shigichoká hođuo-, gálaat baađisuoká yiem hai ká ˈdeeme. 12Tá ˈdaa giri hé ˈdeđewká les ˈdú iilishanatká, gielmit gálaat hí hol ka ˈguoká hai gaanata. 13Tá máá hééllá lulle mé ki chirsat-, ˈjíig he mé đig yeetká Waag haí rianna. 14Tá Fayam Midhab-, Guch Waaˈgietallá les geer lulle ha gaalí gaa ˈdiyime, giri kidh met lulle hí mamaloká. Af kinaallá in biiy el met ˈdaˈdle ali kí ˈdeenne.
15Aaléka, hé súm gaa nyakarich-, Waag hí néb-, ˈBíl Waaˈgiet ˈdeđeneyoká ˈBíl Waaˈgiet geere gaa yaalká haí aargiˈda.#24:15 ˈDániel 9:27; 11:31; 12:11 Hééllá ˈdeenyle hé máá Waag hí ˈdeem ká shigiche-, ˈDániel léká hí huogodhe. Máá ˈdeenyééllá tuoyoká hí ˈdéé eiy naasat. 16Hé hat kinaallóóllá hí argiyyeka, gál lés Yuuˈdia gaa ijoká hí gumano kar ˈdú ˈdano. 17Máá ˈbílle ˈdug ˈdú ijoká hai léen,#24:17 Ény gál Yuuˈdi bar kinaalloká hé met hursam gaa ˈbaarasso-, gálaat hí ˈdú yíéđianká. ˈbíl híliny, shókódích hí ˈbíl geer gaa ijoká ka shúúnan. 18Máá forich gaa ijoká hai é hol ˈdú náan, đafaraamle shúúnan.
19Hoba! Af kinaal ebá ˈdeg ger ˈgayyoká ubaa ˈdeg um hí ot ki ˈgieká ki ˈdéen! 20Waag roogonóo, bár hí kar gaa ˈdaraanno kinaal hai af ˈdeenyietká, muuninyka, Kúlích Hef ˈGisanká onnôny. 21Af kinaallá manyjasiny súm ˈdeew-, ameeny Waag les ka kuonneká kálta gálaat il hí ma árginy-, tá gálaat geđi il hí ma aargirinyká biiy hai gáá ˈdeenne.
22Tá Waag har rám ka chiimetóóllá iraam ma rinyka, máá níínní les ˈdug ˈdú ijoká mán. Tá Waag gállé waarateká ˈdaalle ˈdugaka, rám kinaallá Waag iraam haí rianna.
Gál hođomléká biiy yiem hai gáá ˈdeeme
23Af kinaallá máádhat hí geey-, kieye, Ebá dhaayyíe, Kirísto hállá! muuninyka, Hártá! hí yieka, haí mú af iiy chéen. 24Biiy gál hođomlé-, hol Kirísto ká hođuo-, ubaa gál hođomlé-, gál Waag hí ˈdeem ka shigichoká hol ká hođuoká yiem haí gáá ˈdeeme. Gálallá hé farguogo-, gálaat il hí aargiˈdo-, gálaat hí af ˈdaˈdaboká hai ekemeye. Hé gaalí ekemeyóóllá har hé gaalí hát gaa ˈguoká onnônyka hé gál Waag hí waarateká úba bađisie. 25Aaléka onnóo, yáá biiy hátlé đéém taalallá hí geey.
26Tá har gaalí geey-, gaal kieye, Bá dhaayyíe, Kirísto ˈbakat álle gaa ija, gaalí yieka, haí bííy kinaallá mé níiny. Tá har gaal kieye, Mu ˈbílallá gaa ija, gaalí yieka, gáál héllé hí geđuoká haí iiy chéen. 27Hát ir he ˈdaa baryo gaa birgeka, bololle ˈdaa aadho gaa verenóóllá, yáá Iny Máádhátallá ˈjímchú úba hát tikiˈdééllá hai yeedhe.
28Ál hé kufeká hí iifoká in tére hí hol ˈdú hegelle.
Yíésu ˈjímle yaalmitlé
29Manyjasiny bar kinaalloká el me hí ˈgidheka, aadh đo hai ongʼoroyye, ˈguiy đo édhum hai ˈdabe, hidhino đo úr hai gáá ookodmoˈde, Waag hé farguogo-, úr gaa ˈgieká hai muotisiche.#24:29 Yisááya 13:10; 34:4 30Aalé hé gálaat yáá Iny Máádhátallá ˈjímchú aargisuoká úr ha gaalí gaa aargira. Aaléka, kidh met lullé les gaa ijoká hai beeme. Gaal yáá Iny Máádhátallá hát nyáˈdow kí yiimet-, fargogínt ubaa ˈduuw guđoká kí leledhoká hai aargira. 31Gál chia urru-, ˈgassoká faˈd súm ére léká hai ˈdarama, gáál biiy ˈdinnam afuraalle ali ha yú ˈdú fafaa, giri gál chia yú waaˈdeká gaalí hol ˈdu gáá shugunoká.
32Ebá kinnach ˈdímlé ka ˈdeˈdeenká kí he gaa onnot. Kinnach kolm éíy taakaká ubaa gurf ká layka, it af saano hí gaa higisoká hát ka ˈjobonteká óg. 33Hát tikiˈdééllá hé hatallóóllá lulle hí argiyyeka, ˈjímchú hát ka ˈjobondhe-, yú karaf kí ˈdeenká it óg. 34Yú hí hé ˈdúwaká geeye, gálallá#24:34 Gálallá amú he gál Yuuˈdi, muuninyka, he Waag gállé waarateká. hé les ma gaa bebeny, ˈdaab hééllá lulle ali ma kí ˈdíinyká. 35Úr ubaa les el met haí ˈgiidha. Tá ˈdeenychú íín hé el met hí ma ˈgiˈgin, Yíésu hí lalille yie.
Tág ˈdée, Yíésu hol ká naanle ití muog
36Yíésu geđi lalille geey, kieye, Tá kúlích kinaallá ubaa aadh ˈgásle Waag gállé ˈgasso-, urruká yíekaʼ, yáá Ínyííl yíekaʼ, hé máá níínní hí ogká mán. ˈJaachú tákáma hí og. 37Yaalmit giri héle bár Nowaká in yáá Iny Máádhátallá ˈjímchú bárle úba hí cheedhe. 38Bár giri Nowa kinaallá bie hátlé les lulle er ma súonyká, gálaat hé he kokoey, ubaa he igime, hé hol shugunne, in ˈjíig kúlích Nówa hí kadich gaa hileká đig. 39Gaal hát he hí kí hilééllá hé moonnoy, in đo bie ká rue, hí uune. Aaléka yáá Iny Máádhátallá ˈjímchú úba hát kinaallá hai yeedhe. 40Af kinaallá, gál yááb naama-, les gugusoká, mú tikiˈd Waag haí gaa egeete, máátí hai ká ˈgiita. 41ˈDeg naama-, yierim roroyyoká, min tikiˈd Waag haí gaa egeete, minnéétí hai ká ˈgiisata.
42Aaléka, met hí ˈdú ˈgie, yáá Máá kíchia Guđóóllá kúlích gáá ˈjeˈjeenká ití muog. 43Tá máá ˈbíl léká kúlích máá buraalléká hí gáá yiimetká onnônyka, mu hát me hí ˈdú yaal-, ˈbílle máá hí el fufuro-, hí gaa buruanká mánká it óg. 44Aaléka, itín úba tagano ˈdée! Yáá Iny Máádhátallá aadh ˈgás hí ye ki muogká ha gáá ˈjeeme, Yíésu hí gáál yie.
Gédéch ˈdúwaká ubaa gédéch ˈdeewká hugumanollé
45Aalé Yíésu gáál heete, kieye, Gédéch ˈdúwa-, ˈdaallé-, hújíchle hát ˈdabaanká nannuoká he gédéch máre? Gédéch kinaallá he gédéch máállé guđoká hí gede éíy taaka met gaa koyka, géde ˈguom aleđuđugul urgúa gaalí gaa shiguoká gaa shiguoká. 46Tá gédéch kinaal máállé guđoká hí af kí ˈdie-, hújíchle tág gaa yaalka, ebá geer hí súm gaa meedhe! 47Yú hí hé ˈdúwaká geeye, máá guđo kinaallá héllé lulle ˈguoká gédéchlé kinaallá mé hai ki kokoo.
48Tá gédéch muí gede éíy taaka met gaa koyká har he ˈdeenítaka, hát he taawuoká kieye, Máá chia guđoká hé ál ˈjob ma gáá ˈjeeminyo, he yeedhe, 49đo gállé géde-, he mé ki yaalká hai tuutune, gál bersham hí fafaanká hollo hol ˈdoy, gáál he ˈgarro hol koey, gáál bersham ˈgarro hol iigime. 50Tá gédéch kinaallá aadh ˈgas ubaa kúlích he muogká máállé guđoká haí gáá ˈjeeme. 51Mú máállé guđo kinaallá mú hát ˈdeđewká he hai ki ekemeye, mú gál hol ˈdug gáá sasaloká hurt hai ki laama. Ál kinaallá he ál gálaat hí gaa bebeen-, hí kach hol amet gaa ˈginianká, Yíésu hí gáál yie.
Currently Selected:
Matááyo 24: dsh
Highlight
Share
Copy
Want to have your highlights saved across all your devices? Sign up or sign in
Bible Translation and Literacy
