Matááyo 6
6
Gál he maamanká hát ke ˈdú ˈjeˈjeenká
1Yíésu geđi gáál geey, kieye, Af giri hí hé midhabká ekemeychoká hol ˈdeeˈdemíe! Haí tawuny gálle gálaat hí aargiro-, hí memeyoká ˈgíiny. Har hí hát kinaal ekemesetoka, it hé shiicho-, ˈJaa kíchia úr ijoká onnônyka hí shigieká ma aargiriny. 2Aaléka, kúún har gál he hí ki ˈgierˈgereká he shigichoka, ha faˈd af gaa kóon, ˈdiyíminy. Ha hát gál hol egew-, ény ˈdiiyiminyká ubaa ˈjien hursam gálaat he gaa shiguo-, gálaat hí memeyoká fedóóllá chéen. Yú hí hé ˈdúwaká geeye, gál hol egew-, hatallóóllá héllé shiichoká hé lésallá gaa argééllá tákáma. 3Tá kúún af giri hé kua shiichoká máá he hí ki ˈgierˈgereká shigichoká, gíl kua naanietká héllé ekemeyoká ha gíl kua ˈjíbachká hí onnôny, 4giri hé kua shiichóóllá kúólle af hí ko ki ˈgiidhoká. ˈJaa kua úr ijoká hé kaany gaa ijoká argóóllá hé kua midhab-, ekeycheká shíícholle hai ko shigia.
Waag hí vivisatoká
5Af giri hí Waag vivisatoká haí hát gál hol egewallá chéen. Gál kinaallá Waag vivisatká ény ˈdiiyiminyká ubaa ˈjien hursam lođuđaat gaa ˈdeˈdeen-, gálaat hol aargisuoká he fede. Yú hí hé ˈdúwaká geeye, gál hol egewallá hé héllé shiichoká arge. 6Waag vivisatoká, ˈbílkú geer af ki kúo, ˈJaa kua máá hí argo-, mánká vísso. Hát kinaallá ˈdiiyyeka, ˈJaa kua hé gaalí ma arginyká argoká, hé shiicho hai ko ká shigia. 7Waag hí vivisataká haí ˈdeem nyag maamanká hógon, hí ááy gáá nannîny. Yaalmit kinaallá gál Waag muogká hí ekemete. Gaal hát taawuoká ˈdeemlé burnay-, he hogodhóóllá kerka Waag hí mamalla. 8Haí hát gaal íín chéen, ˈJaakícho hé hí ki ˈgierˈgereká hátlé hí ma ruogóninyká hé óg. 9Aaléka, hatallá Waag viivitíe,
ˈJaa kínyaa úr ijóóllo, meenykú gaalí meeyo!
10Guchkú hí lésallá ká chimet.
Hát feˈdo-, gaalí úr gaa ekemeyóóllá,
gálaat úba hí lésallá gaa eekemeyo.
11Kúlíchallá ˈguom kínyaa nyí nyuoˈdo-,
nyí ka shigichoká nyí ka shíish.
12Hé nyí ˈdeeđeneycheká ˈdaalleka nyí ˈdú ˈjé,
hát tikiˈde nyiin gál nyí he ki ˈdeeđeneyká nyí ˈdú ˈjiiyyééllá.
13Hé ˈdeđew-, maralle nyí ˈgayyaká nyí af gaa táátaʼ,
nyí Sátan ka río.
[Hééllá he ˈdaa giri gúch, ubaa fargogínt,
tá meeny gálaat hí ko memeyoká
lulle taalle bííyyo kuun hí léká!
Iiy-hí, he hí hát kinaallá yeet.] #6:13b ˈDeeny biiy el ˈdaˈd muos hí ˈdinnam ˈgíéllá hé warˈgasam heleká ˈbaal gaa mán.
14Har gálaat hí he ki ˈdeeney-, tá hí ˈdú ˈjiiyyeka, ˈJaa kíchia úr ijoká itín úba haí ˈdú ˈjeeme. 15Tá gálaat hí he ki ˈdeeney-, hí ma ˈdú ˈjiinyka, ˈJaakícho hé hí ma ˈdú ˈjeeminy, hé ˈdeđew-, hí eekemeycheká ađaable hí ma gaa egeny.
Af hisan
16Aalé hí af higisata-, hí Waag visan mé verenneká haí hát gál hol egew-, hol af gaa guogosuo-, hát af hiteká gálaat aargisúóllá haí ˈdíiny. Yú hí hé ˈdúwaká geeye, gál hol egewallá hé héllé shiichoká arge. 17Aaléka, af giri hí af higisataká innum ˈjidhdhíe, innum salab gíl gaa naatíe, 18giri af hisankícho gálaat hí ma kiimisan-, ˈJaa kíchia gálaat hí ma arginyká tákámle hí ógká. Aalé ˈJaa kíchia af hisan kíchia kaany gaa iđoká argoká hé shiicho haí shigia.
Kamúr úr ki hony
19Aaléka haí kamur guđo-, aadh ˈdaatika guur ubaa kos hí ˈdeđeneyo-, ál gaa iđoká gál buraa léká hí ˈgieˈguo-, hí buruanallá, haí lésallá ki hôny. 20Aaléka, kamur guur ubaa kos hí ma ˈdeđeneny-, állé gál buraa léká hí ma ˈgieˈginy-, hí ma gaa buruminyká úr ki hoyyíe. 21Ál kamurkú hí gaa iđoká in tawunykú úba hí gaa iđa.
22In he gon nyátáállé. Har inkú ˈdabíntaka, gónkú lulle édhumo he ˈgayya. 23Tá in har ko ˈdeđíntaka, gónkú lulle af kinaalka, húˈdo he chie. Aaléka, har édhúm kuun ko gaa ijoká húˈd yieka, huˈd kinaallá ebá súm ˈdéen! 24Gedech hé gáál naam hí ma liileen, ˈdaa giri kálmaréél mú tikiˈd neebeet-, máátí geelneetká, muuninyka, mú tikiˈd giel-, máátí eesheyoká. Itín it ˈgas eiy ma kokony, Waag gedelle ubaa kamúr gedelle ma chegen.
Haí geer mare ˈgíiny
25Aaléka, yú hí geeye, taalle hí les iđáállá, hé hí kokonyoká yíekaʼ, hé hí igiannaká yíekaʼ, đafaraam hí gónkícho fafaataká yíekaʼ, gerle haí gaa ˈdeđénen. Les ke gaa ijóóllá hé éíy taaka súm ˈguom ˈdú ˈdúwaká hé biiy gaa ijoká, muunîny? Héétí, gón kúnnaallá hé éíy taaka súm đafaraam ˈdú ˈdúwaká hé hegesetoká, muunîny? 26Kimir úr gaa seseennoká ebá ki fuˈjée, hé ˈguom he fafiyyo-, mumurat-, bush fafaatká mán, in ˈJaa kíchia úr ijoká hí wawaya. Tá itín it kimír ˈdúúw ˈdú ˈgayyaká, muunîny? 27Itín mááya sídhle ˈdú neeyka, sídhle á níínni mare úba mé ˈdeerneye?
28Tá háteka đafaraam hí fafaataká gerle hí gaa ˈdeđenetal? Ebá ísh lesiet kállányle dhaayyíe. Iish hé hujich ma nanniny, ubaa hé kírre ma susuny. 29Tá yú hí geeye, Sólomon giri kánsích ˈdúwaká onnoyká đafaraamlé fafadhdheká hé bís ˈdabaan-, iish kállányle hí ˈgúóllá mannay. 30It Waag iiy yeen hí ninníil! Waag har ísh halúg kúlíchal les gáá ˈdeˈdeen-, aadh ˈdaatika gaalí ˈjiet gaa verenóól in hatal buukaycha, mu bukam hatallo-, bis kallany a mé ˈdaatíká hé úba hí ma ki buukany?
31Aaléka, haí geer mare ˈgíiny, hí kieye, Meete nyí kokonyo? Meete nyí igianna? Meete nyí fafaata? hí chégen. 32Hééllá lulle gál Waag muogká hí ˈgar aayaˈga. Tá ˈJaa kíchia úr ijoká íín hééllá lulle hát hí feˈdoká hé óg. 33Aaléka, erkob Guch Waaˈgiet ubaa hé Waag hí itín gaa feˈdoká hol gaa ˈgeˈgedhée, hé hí feˈdééllá lulle ha muí shigia.
34Hé berikaká gerle haí gaa ˈdeđénen, beríka hí tákámle hol ˈdú aayaˈgiyya. Kulich lulle hé ilshle ˈgayyo, Yíésu hí gáál yie.
Currently Selected:
Matááyo 6: dsh
Highlight
Share
Copy
Want to have your highlights saved across all your devices? Sign up or sign in
Bible Translation and Literacy
