MGA BINUHATAN 6
6
Ang Pito Ginapili
1Karon sa sining mga adlaw sang nagadugang ang kadamuon sang mga gintoton-an, nagkumud ang Greciahanon nga mga Judio batok sa mga Hebreo bangud nga wala matatapi ang ila mga balong babayi sa pagpanagtag adlawadlaw. 2Kag ang napulog duha nagtawag sang kadam-an sang mga gintoton-an kag nagsiling, “Indi nagakaigo nga bayaan namon ang polong sang Dios sa pag-alagad sa mga latok. 3Busa, mga kauturan, pili kamo sing pito ka lalaki sa tunga ninyo nga maayo sing kadungganan, nga puno sang Espiritu Santo kag sang kaalam, nga matangdo ta sa sining buluhaton. 4Apang magapadayon kami sing malig-on sa pangamuyo kag sa pagpanghikot sang polong.” 5Kag ang pinamolong nila nagpahamuut sang bug-os nga kadam-an, kag ginpili nila si Esteban, tawong puno sang pagtoo kag sang Espiritu Santo, sanday Felipe, kag Procoro, kag Nicanor, kag Timon, kag Parmenas, kag Nicolas, isa ka pinaliso nga taga-Antioquia. 6Ini sila ginpaatubang nila sa mga pinadala, kag nagpangamuyo sila kag ginpandungan nila sila sang ila mga kamut.
7Kag ang polong sang Dios nagtubo; kag ang kadamuon sang mga gintoton-an nagdugang sing tama gid sa Jerusalem, kag isa ka daku nga kadam-an sang sacerdote nagmatinumanon sa pagtoo.
Ang Pagdakup kay Esteban
8Kag si Esteban, nga puno sang bugay kag gahum, naghimo sing dalagkung kalatingalahan kag mga tanda sa tunga sang katawohan. 9Niyan ang iban nga taga-sinagoga sang mga Napatimawa (nga ginatawag sing subong), kag sang mga taga-Cirene, kag sang mga taga-Alejandria, kag sang mga gikan sa Cilicia kag sa Asia, nagtindug kag nagpakigsuay kay Esteban. 10Apang wala sila makasarang sa pagsumpung sang kaalam kag sang Espiritu sang iya pagpamolong. 11Niyan ginsutsut nila ang mga tawo, nga nagsiling, “Nabatian namon sia nga nagpamolong sing pasipala batok kay Moises kag sa Dios.” 12Kag ginsugyot nila ang katawohan kag ang mga tigulang kag ang mga escriba, kag nagpalapit sila sa iya kag gindakup nila sia kag gindala sa corte, 13kag ginbutangan nila sing dimatuud nga mga saksi nga nagsiling, “Ining tawo wala mag-untat sa pagpamolong batok sining balaan nga duug kag sa kasogoan; 14kay nabatian namon sia nga nagasiling nga ining Jesus nga Nazaretnon magaguba sining duug, kag magaliwat sang mga kinabatasan nga ginhatag ni Moises sa aton.” 15Kag ang tanan nga naglingkod sa corte, nga nagapaungut sang ila mga mata sa iya, nakakita sang iya nawung subong sang nawung sang manugtunda.
Currently Selected:
MGA BINUHATAN 6: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
