Хьунухь 30
30
1Рахил лагьайтӀа, Якьубаз аял хаз жезвачирди акваз, вахал пехилвал ийиз амай. «Заз аялар це, – лугьудай ада Якьубаз, – тахьайтӀа зун рекьида!» 2Амма Якьуба, хъел акатна, адаз жаваб гудай: «Зун Вичи ваз аялар тагузвай Аллагь яни?»
3«Ингье зи лукӀ Билгьа, – лагьана Рахила, – гьадахъ галаз хьухь, зи метӀел къведай аял хурай. Гьадан куьмекдалди кьванни заз аялар жеда!»
4Рахила вичин лукӀ Билгьа адаз пуд лагьай паб яз гана. Якьуб Билгьадихъ галаз жез хьана. 5Ам руфунал залан хьана ва ада Якьубаз хва хана.
6«Аллагьди чун кьетӀ авуна, – лагьана Рахила. – Адаз гьакъикъатдани зи минетдин ван хьана ва заз хва багъишна». Гьавиляй ада гададиз Дан#30:6 Дан – чувуд чӀалалди «хийирдин дуван» гафуниз мукьва я. тӀвар гана.
7Билгьа мадни руфунал залан хьана ва Якьубаз мад са хва хана. 8«Аллагьдин куьмекдалди за вахахъ галаз акъажунар авуна, – лагьана Рахила, – ва адал гъалиб хьана». Гьавиляй ада гададиз Нифтали#30:8 Нифтали – чувуд чӀалалди «женг» гафуниз мукьва я. тӀвар гана.
9Вичиз мад аялар техжедайди акур Лияди Якьубаз кьуд лагьай паб яз вичин лукӀ Зилпа гана. 10Зилпади Якьубаз хва хана. 11«Кар туькӀвена!» – лагьана Лияди. Гьавиляй гададиз ада Гад#30:11 Гад – чувуд чӀалалди «Бахтуни гъун, агалкьун» гафуниз мукьва я. тӀвар гана.
12Зилпади Якьубаз кьвед лагьай хва хана.
«Гьикьван зун бахт авайди я! – лагьана Лияди. – Бахтавар лугьуда заз папари!» 13Гададизни Ашер#30:13 Ашер – чувуд чӀалалди «бахт» гафуниз мукьва я. тӀвар гана.
14Са гъилера къуьлер гуьзвай вахтунда, Рувеназ чуьлдай къевер#30:14 Къев чувудрин адетра кӀанивилин лишан яз кьабулнава. жагъана, ва абур вичин диде Лиядиз хкана. Рахила Лиядивай тӀалабна: «Ви хциз жагъай къеверикай заз це».
15«Ваз завай гъуьл къакъудун тӀимил хьанани? Гила зи хциз жагъай къеверни жуваз къахчуз кӀанзавани?» «И йифиз, – хиве кьуна адаз Рахила, – и къеверихъ галаз дегишун яз, гъуьл вахъ галаз къаткида».
16Няниз Якьуб чуьлдай хтайла, Лия адан вилик экъечӀна ва икӀ лагьана: «Зи патав ша. За вун зи хциз жагъай къеверихъ вахавай маса къачуна».
И йифиз Якьуб Лиядихъ галаз къаткана. 17Аллагьди мад адан минетрихъ яб акална: ам мад руфунал залан хьана ва Якьубаз вад лагьай хва хана.
18«Им, – лагьана Лияди, – за гъуьл жуван къаравушдихъ галаз паюн себеб яз, Аллагьди зав ахгакьарнавай пай я». Ва ада хцел Исахар#30:18 Исахар – чувуд чӀала – «пишкеш ава» я тушни «итим кьун (са кар патал)» манаяр аваз гъавурда акьазва. тӀвар эцигна.
19Лия мад гъилера руфунал залан хьана ва Якьубаз ругуд лагьай хва хана.
20«Аллагьди заз гъилин ачухвилелди ганва! – лагьана ада. – Гила кьванни гъуьлуь зун хкажда, за адаз ругуд хва ханва эхир!» Ва хцел Забулун#30:20 Забулун – чувуд чӀала – «савкьват» я тушни «кьабулун» манаяр аваз гъавурда акьазва. тӀвар эцигна.
21Ахпа Лияди руш хана ва адал Дина тӀвар эцигна.
22Амма Аллагьди рикӀелай Рахилни алуднач, адан минетрихъ яб акална ва адан руфун аял хаз жедайди авуна. 23Рахил руфунал залан хьана, хва хана ва лагьана: «Аллагьди зун биябурвиликай хкудна».
24Ада хцел Юсуф#30:24 Юсуф – чувуд чӀала – «мадни сад гурай» я тушни «ада алудна» манаяр аваз гъавурда акьазва. тӀвар эцигна ва тӀалабна: «Реббиди заз мадни са хва артух авурай!»
Якьуб чӀехи девлетдин иеси хьун
25-26Юсуф хьайидалай кьулухъ Якьуба Лабаназ лагьана: «Заз зи папар ва аялар галаз кӀвализ, ватандиз хъфидай ихтияр це. Мад ваз хъсан чида хьи, за ваз абур паталди гьикьван къуллугъ авунатӀа!»
27«Ви вилерай заз майил ая! – лагьана адаз Лабана. – Вун себеб яз захъни Реббидин хийир-дуьа галайди заз фал вегьена чир хьанва. 28Лагь кван ваз гьихьтин гьакъи кӀандатӀа? За ваз гуда».
29«Ваз чида кьван, – жаваб гана Якьуба, – за ваз гьикӀ къуллугъ авунатӀа, зи девирда ви суьруьяр гьихьтинбур хьанатӀа. 30Зун атайла, ви маларин кьадар са акьван гзафди тушир, гила гьикьван ава! Килиг гьикӀ Реббиди зун атуникди ваз хийир-дуьа авунатӀа! Амма за жуван хизан патал мус кӀвалахун лазим я?»
31«Де лагь кван ваз гьакъи гьикьван кӀанзаватӀа?» – жузуна Лабана.
«Заз вавай кӀандай са затӀни авач, – жаваб гана Якьуба. – Зун ви лапагар идалай кьулухъни хуьз, абуруз ем гуз гьазур я – амма са шартӀуналди. 32Ша зун къе фена вири суьруьйриз килигда, абурук квай гьар жуьредин рангунин, тӀехвер квай ва чӀулав хипер, ва гьакӀни тӀехвер квай ва гьар жуьредин рангар какахьнавай цӀегьер вавай хкудиз жедайвал. Ихьтин гьайванар зи гьакъи жеда. 33Ваз зи турусвал кьил акъудна чирун регьят акъвазда: идалай кьулухъ, вун атана, за гьакъи яз вуч къачунватӀа килигайла, зав тӀехвер ва лекеяр алачир цӀегь, я тушни чӀулавди тушир хеб гваз жагъайтӀа, абур вавай чуьнуьхнавайбур яз гьисаба».
34«Икьрар я, – лагьана Лабана. – Гьа вуна лагьайвал хьурай».
35Амма гьа и юкъуз Лабана цӀару ва тӀехвер алай вири кьунар, гьар жуьредин рангарин лекеяр ва тӀвехер квай, яни лацу гелер квай, вири цӀегьер, вири чӀулав хипер хкудна, абур вичин рухвайрив вахкана, 36абурни Якьубакай пуд йикъан мензилдин рекьиз яргъаз хьана.
Якьуба Лабанан амай гьайванар хуьзвай. 37Ада къавахдин, бадамдин ва чинардин таза хилер къачуна, ва абурулай чкалдин гуьтӀуь зулар алудна кӀарасдал кьван кьецӀил авуна. 38Чкал аладарнавай тӀвалар ада малари яд хъвадай латара эцигна, яд хъваз атай цӀегьер и тӀвалариз килигдайвал – гьа и вахтунда абур гьалдарни жезвай. 39Гьалдарунин вахтунда цӀегьер зулар алай тӀвалариз килигун себеб яз, абуруз жезвай бацӀиярни цӀарубур, жуьреба-жуьре рангаринбур ва тӀвехер алайбур тир. 40И хипер Якьуба кьилди авуна, абур Лабанан суьруьйрик квай цӀаруни чӀулав гьайванриз килигдайвал элкъуьрзавай.
Гила Якьубаз вичин суьруьяр авай, ва ада абур Лабанан суьруьйрикай кьилди хуьзвай. 41Къуват квай гьайванар гьалдардай чӀавуз Якъуба латара, абур и тӀваларин патав сад садаз ядайвал, абур гьайванрин вилерик жедайвал, тӀвалар эцигзавай. 42Амма зайиф гьайванар гьалдардай чӀавуз, ада тӀвалар эцигзавачир. Гьа икӀ, зайиф гьайванар Лабаназ жезвай, къуват квайбур – Якьубаз.
43Якьуб халис вар девлет авай касдиз элкъвена, адахъ хиперин ва цӀегьерин суьруьяр, къаравушар, лукӀар, девеярни ламар пайда хьана.
Currently Selected:
Хьунухь 30: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
