Хьунухь 36
36
Эсаван несилар
1Ингье вичиз Эдамни лугьузвай Эсавакай ва адан несилрикай ихтилат.
2-3Эсава вичиз къенанви кьве руш – хети Эланан руш Ада ва гьиви Цибганан хтул Анадин велед Агьалибамади, – гьакӀни Исмаилан руш, Небаятан вах Басмат пабвиле къачуна. 4Адади Эсаваз – Элифаз, Басмата – Регуил хана. 5Агьалибама – Яуш, Ялам ва Къарагь. Ибур Эсаван Къенанда хьайи рухваяр я.
6Эсава вичин папар, рухваяр, рушар, вичин вири инсанар, вичин вири мал-къара, вичи Къенанда гъилиз гъайи мал-девлет кӀватӀ хъувуна маса патахъ, вичин стха Якьубакай яргъал жедайвал хъфена 7Абуруз акьван гзаф мал-девлет авай хьи, санал уьмуьр тухуз абуруз дарискъал тир: абур пун кутуна ацукьнавай чилер, нехирарни фикирда кьуртӀа, кьве касдиз бес жезмачир.
8Эсава Сеир дагъдин дуьзенра уьмуьр тухуз акъвазна. Эсав – им Эдам я.
9Ингье вичи Сеир дагъдин дуьзенра диб кутур эдамийрин бан-буба Эсавакай ва адан несилрикай ихтилат.
10Эсаван рухваяр: Адади хайи Элифаз ва Басмата хайи Регуил.
11Элифазан рухваяр: Теман, Умар, Сефу, Гатам ва Къеназ.
12Тимнади, Элифазан кьвед лагьай папа, адаз Амалехъ хана.
Ибур Эсаваз Ададилай амукьай несилар я.
13Регуилан рухваяр: Нахат, Зерагь, Шамагь ва Мизагь.
Ибур Эсаваз Басмата хайи несилар я.
14Цибганан руш, Анадин эвлед Агьалибамади Эсаваз Яуш, Ялам ва Къарагь хана.
15Ингье Эсаван несилрикай хьайи сихилар.
Эсаван сифте хва Элифазан несилар: Теманан сихил, Умаран сихил, Сефудин сихил, Къеназан сихил, 16Къарагьан сихил, Гатаман сихил ва Амалехъан сихил. Ибур Элифазан сихилар, Ададин несилар я. Абуру Эдамдин чилел уьмуьр тухузва.
17Эсаван хва Регуилан сихилар: Нахатан сихил, Зерагьан сихил, Шамагьан сихил ва Мизагьан сихил. Ибур Регуилан несилар, Эсаваз Басмата хайи несилар я, абуру Эдамдин чилел уьмуьр тухузва.
18Эсаваз Агьалибамади хайи несилар: Яушан сихил, Яламан сихил ва Къарагьан сихил. Ибур Агьалибамадин, Эсаван папан, Анадин рушан сихилар я.
19Эсаван (гьам Эдамни я) несилар ва абурун сихилар гьа ибур я.
Сеиран несилар
20И уьлкведа уьмуьр тухузвай гьуриви Сеиран рухваяр: ЛатӀан, Шабал, Цибган, Ана, 21Дишун, Эцер ва Дишан. Ибур Эдамдин чилел уьмуьр тухузвай Сеиран несилар тир гьурийрин сихилар я.
22ЛатӀанан рухваяр: Гьуригь ва Гьемам. ЛатӀанан вахан тӀвар Тимна тир.
23Шабалан рухваяр: Галван, Манахат, Гебал, Шефа ва Анам.
24Цибганан рухваяр: Аягь ва Ана. Вичиз, буба Цибган ламар хуьдайла, кьурумда кузвай чешме жагъай гьа Ана.
25Анадин веледар: Дишун ва Анадин руш Агьалибама. 26Дишанан рухваяр: Гьемдан, Эшбан, Итран ва Керан.
27Эцеран рухваяр: Билгьан, Загьаван ва Акъан.
28Дишанан рухваяр: Ус ва Аран.
29-30Сеир уьлкведа уьмуьр тухвай гьурийрин сихилар ихьтинбур я: ЛатӀанан сихил, Шабалан сихил, Цибганан сихил, Анадин сихил, Дишунан сихил, Эцеран сихил ва Дишанан сихил.
Эдамдин пачагьар
31Ингье гьеле Исраилдин рухвайрихъ пачагьар пайда жедалди Эдамда агъавал авур пачагьар.
32Эдамда Бегъаран хва Белади гьакимвал авуна. Адан меркездин тӀвар Дингьава тир. 33Бела кьейила, адан чкадал Басрадай тир Зерагьан хва Ябаб хьана. 34Ябаб кьейила, пачагьвал Теманан несилрин уьлкведай тир Гьушама авуна. 35Гьушам кьейила, адан чкадал пачагь Бедадан хва, вичи Магьабдин дуьзенлухра мидиянвияр кукӀварай Гьададакай хьана. Адан меркездин тӀвар Гавит тир. 36Гьадад кьейила, адан чкадал пачагь Масрекъадай тир Самладикай хьана. 37Самла кьейила, адан чкадал пачагь Эфрет вацӀал алай Регьабатдай тир Шаулакай хьана. 38Шаул кьейила, адан чкадал пачагь Ахбаран хва Багьал-Гьананакай хьана. 39Ахбаран хва Багьал-Гьанан кьейила, адан чкадал пачагь Гьадаракай хьана, адан меркездин тӀвар Пагу тир, адан пабни Ме-Загьабан руш МатӀредан велед МегьетӀабел тир.
Эдамдин сихилар
40Ингье Эсаван сихилар, абурун тухумар, хуьрер ва тӀварар тирвал.
Тимнадин сихил, Галвадин сихил, Ятетан сихил, 41Агьалибамадин сихил, Элаян сихил, Пинанан сихил, 42Къеназан сихил, Теманан сихил, Мибсаран сихил, 43Магдиилан сихил ва Ираман сихил. Эдамдин сихилар ва абурун ихтиярда авай уьлкведин хуьрер гьа ихьтинбур я. Эдамвийрин бан-бубани – Эсав я.
Currently Selected:
Хьунухь 36: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
