Хьунухь 37
37
Юсуфни адан стхаяр
(37–50 кьилер)
Юсуфан ахварар
1Якьуб Къенанда – виликдай вичин бубади масанай атана уьмуьр тухвай уьлкведа – бине кутуна ацукьна.
2Ингье Якьубан хизандикай ихтилат.
Юсуфан цӀерид йис тирла, ада стхайрихъ галаз лапагар хуьзвай – Билгьадинни Зилпадин рухвайриз кумекар гуз – ва абуру ийизвай чӀуру крарикай бубадиз ахъайзавай. 3Юсуф хайила, Якьубан яшар хейлин хьанвай, гьавиляй Якьубаз вичин вири рухвайрилай гьам гзаф кӀандай, – адаз гьатта гьар жуьредин рангарин перемни багъишнавай. 4Стхайриз, бубадиз Юсуф чпелай гзаф кӀанзавайди акурла, Юсуф акьван такӀан хьана хьи, адаз гьич са къени гафни хълагьиз жезмачир.
5Са гъилера Юсуфаз ахвар акуна. Ада ам стхайриз ахъайна, абурузни ам авайдалайни гзаф такӀан хьана. 6«Яб це, – лагьана ада, – заз ахварай вуч акунатӀа! 7Гуя чна чуьлда цуьлер кьазва ва зи цуьл дуьз акъвазна, куь цуьлери лагьайтӀа ам элкъуьрна юкьва туна, адаз икрам авуна!» 8«АкӀ хьайила вун чаз пачагьвал ийиз гьазур я ман? – жаваб гана стхайри. – Чи винел чӀехиди жез?» Ва ам авайдалайни гзаф такӀан хьана – гьам адан ахварар, гьамни ада абур ахъаюн себеб яз. 9Юсуфаз лагьайтӀа мад са ахвар акуна, ва ада ам мад стхайриз ахъайна: «Заз ахварай гуя заз ракъини, вацра ва цӀусад гъетре икрам ийиз акуна!» 10Ада вичин ахвар бубадизни стхайриз ахъаяйла, бубади адаз ахмурар авуна: «Ваз аквазвайди вуч ахвар я? Вуч я, чун вири – гьам зун, гьам ви диде, гьамни ви стхаяр – вири атана пел чилив агакьдайвал ваз икрам авунани?»
11Стхаяр Юсуфал гзаф пехил хьана, амма бубади адан ихтилат рикӀел хвена.
Стхайри Юсуф Мисридиз маса гун
12Са гъилера стхаяр бубадин лапагар хуьз Шехемдин къерехрив гвай чилерал фена. 13Исраила Юсуфаз лагьана: «Ви стхайри хеб-мал Шехемдин патарив хуьзва. Ша за вунни абурун кьилив ракъурин». «Зун гьазур я», – жаваб гана Юсуфа. 14«Алад фена килиг, – лагьана ада, – абурун ва лапагрин гьал гьикӀ ятӀа. Элкъвена хтайла, заз ахъая».
Бубади Юсуфаз сагърай лагьана ва, Хеврандин дере туна, Юсуф Шехемдиз фена. 15Ина адал са кас гьалтна. «Вуна ина вуч жагъурзава?» – хабар кьуна ада чуьл тирвал къекъвезвай Юсуфавай. 16«За жуван стхаяр жагъурзава, – жаваб гана Юсуфа. – Абуру хеб-мал гьина хуьзватӀа заз лагь ман». 17«Абур инай хъфенва, – лагьана а касди, – заз абуру чеб Датандиз фида лагьай ван хьанай».
Юсуф стхайрин гуьгъуьниз фена, ва абур Датандин патарив жагъана. 18Абуру Юсуф гьеле яргъа аваз кьатӀанвай ва, ам гьеле мукьув къведалди, стха кьинин икьрардал атанвай. 19«Ингье чи ахварар аквадайди къвезва! – лагьана абуру сада садаз. – 20Ам рекьида, фуруз гадарда, ва ам вагьши гьайванри кукӀварна лугьуда. Килигин адан ахварар гьикӀ кьилиз акъатдатӀа!» 21Рувеназ и рахунрин ван хьана ва Юсуф хиласиз кӀан хьана. «Ам кьиникь герек туш, – лагьана ада. – 22Ивияр экъичун квез я? Жуван гъилералди рекьидалди, ам ингье атӀа кьурумдин юкьвал алай а фуруз гадара».
Гьакъикъатда адаз, Юсуф хиласна, бубадив ахгакьариз кӀанзавай.
23Юсуф стхайрин патав агакьнамазни, абуру адал алай жуьребажуьре рангарин перем хъуткьунарна алудна, 24вични кьуна фуруз гадарна. Фур ичӀиди тир: ана яд авачир. 25Стхаяр анжах фу нез ацукьнавай, абуруз Гилеад галай патахъай исмаилийрин карван пайда хьайиди акуна – абурун девейри Мисридиз хуш ни галай шкьакьар, ладан ва мелгьам тухузвай.
26 Ягьуда вичин стхайриз лагьана: «Стха кьиникай чаз вуч хийир ава? Экъичай иви чуьнуьхуниз мажбур жеда. 27Ам исмаилийриз маса гайитӀа, хъсан жеда, чи гъилерни михьи яз амукьда. ГьикӀ хьайитӀани ам чи стха я эхир, хайи иви». Стхаяр рази хьана. 28Тажирар мукьув атайла, стхайри Юсуф фурай акъудна ва ам исмаилийриз гимишдин къад шекъелдихъ маса гана, абуруни ам Мисридиз тухвана.
29Рувен хтана фурун патав фейитӀа – Юсуф амач! Ва хажалатдин лишан яз ада вичин парталар къазунна. 30«Гада амач! – лагьана Рувена стхайрин патав хтана. – Бес зун? Зун бес гила гьиниз фин?»
31Стхайри Юсуфан перем къачуна, кьун тукӀуна ва перем кьунан ивидай кьацӀурна. 32Ахпа ам бубадин кьилив хкана ва лагьана: «Ингье чаз вуч жагъанатӀа! Килиг – им ви хцин перем яни-тушни?» 33Якьуб килигна ва адай гьарай акъатна: «Зи хцин перем! Ам вагьши гьайванрин сарари кӀус-кӀус авуна! КукӀварна, Юсуф кукӀварна!»
34Ва вичел алай парталар къазунна, ятуррал анжах шихинин са кӀус алукӀна, Якьуба гзаф йикъара хцихъ шел-хвал авуна. 35Рухваярни рушар теселли гуз адан кьилив атана, амма Якьубаз секин жез кӀанзавачир. «Ваъ, – лугьудай ада. – Хцихъ шел-хвал ийида! Шехьиз-шехьиз хцин патав агъа дуьньядиз эвичӀда!» Ва Юсуфахъ шел-хвал авун давамарнай.
36Мидиянвийри и вахтунда Юсуф Мисридиз тухвана ва ПатӀифараз маса гана – ам фиръавандин чӀехи къуллугъдал алай кас тир, яракь гвай къаравулрин кьил.
Currently Selected:
Хьунухь 37: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
