Хьунухь 39
39
Юсуф ПатӀифаран кӀвале
1Юсуф Мисридиз гъана, ва ина ПатӀифар тӀвар алай мисривиди – фиръавандин чӀехи къуллугъдарди, яракь гвай къаравулрин чӀехиди – ам исмаилийривай маса къачуна 2Ребби Юсуфахъ галаз тир, ва адахъ гьар са карда агалкьунар авай.
Юсуф иесидин кӀвале уьмуьр тухузвай, 3ва мисривиди Ребби Юсуфахъ галаз тирди кьатӀана – Юсуфа вуч ийиз хьайитӀани, Реббиди адан гъил кьадай.
4Юсуфаз иесидин вилерай майилвал жагъана, адакай адан ихтибар ийизвай лукӀ хьана, иесиди Юсуфаз вичин кӀвалин вири серенжемар кьиле тухудай къуллугъ гана ва вичихъ авай-авачир вири Юсуфан ихтиярда туна. 5Гьа чӀавалай Юсуф себеб яз мисривидихъ гьам кӀвале, гьамни чуьлда авай вири затӀарал Реббидин нуьсрет алаз хьана. 6Иесиди вичихъ авай-авачир вири Юсуфан ихтиярда туна. Гила мисривидиз амайди са тӀуьнни хъун тир.
Юсуф гьам чинал, гьамни буй-бухахдал атайла гуьрчегди тир. 7Гьавиляй иесидин папа вичин вил адал эцигна ва лагьана: «Захъ галаз къатук». 8Амма Юсуфа ваъ лагьана ва адаз ихьтин жаваб гана: «Сагьибди вичихъ авай-авачир вири зи ихтиярда тунва, ва вичи кӀвале са куьнални гуьзчивал хъийизмач, вучиз лагьайтӀа вири за ийизва. 9За и кӀвале адахъ галаз барабар яз серенжем ийизва. Заз къадагъа тир са затӀни авач – са валай гъейри: вунни адан паб я. Бес за икьван чӀуру кӀвалах гьикӀ авурай ва Аллагьдин вилик гунагь кардиз гьикӀ рехъ гурай?»
10Йикъалай юкъуз ада ам чӀалал гъизвай, амма Юсуф адахъ галаз хьунал рази жезвачир. 11Ингье са гъилера вичин са кӀвалах аваз Юсуф иесидин кӀвализ атайла, кӀвалени и вахтунда маса лукӀарикай садни авачир, 12ада Юсуфан парталрилай кьуна ва мад лагьана: «Захъ галаз къатук». Вичин парталрикайни гьадан гъиле туна, Юсуф акатай патахъ къекъечӀна ва кӀваляй чукурна. 13Ада, Юсуф къецел катна хъфенвайди ва адан парталар вичин гъиле амайди акурла, 14къаравушриз эверна ва икӀ лагьана: «Килиг садра: и иври иниз чун русвагь авун патал гъанвайди яни! Адаз атана зал гуж гъалиб ийиз кӀанзавай! За гьарайна. 15За гьараяр, цӀугъар ийиз акурла, ам тадиз экъечӀна – гьатта вичин парталарни зав туна – кӀваляй катна!»
16Ада гъуьл кӀвализ хкведалди Юсуфан парталар вичив туна, 17ва гъуьлуьзни гьа и гафар тикрарна: «Атана зи кьилив ви лукӀ иври – вуна ам иниз зи намусдик хкӀадай крар авун патал гъанвайди я! 18За гьарай-вургьай туна. Ам гьатта вичин парталарни туна кӀваляй экъечӀна катна!»
19Папан и гафарин ван хьайила – ингье килиг кван, ви лукӀраз заз вуч ийиз кӀанзавайтӀа – Юсуфан сагьибдин хъиле цӀай кьуна. 20Ада Юсуф кьуна къазаматдиз вегьин эмирна – пачагьди къазамат авунвай ксар авай чкадиз.
Юсуфа къазаматда ахвариз баянар гун
Гьа икӀ Юсуф къазаматдиз аватна. 21Амма Ребби адахъ галаз тир ва адаз вичин мергьемет малумарна: ам къазаматдин гьакимдин вилерай майилвал жагъана. 22Ада вири къазаматар Юсуфан ихтиярда туна. Вири затӀарин сан-гьисабдин патахъай Юсуфа жаваб гузвай, 23къазаматдин чӀехидавай гила Юсуфа идара ийизвай са куьникайни фикир тавуртӀа жезвай – Ребби вич Юсуфахъ галаз тир ва гьар са карда адан гъил кьазвай эхир!
Currently Selected:
Хьунухь 39: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
