Хьунухь 40
40
1И вакъиаяр хьана са къадар вахтар алатайла, Мисридин пачагьдиз чехир цадайди ва фу чрадай кас чпин иесидин вилик гунагь квайбур хьанай. 2Фиръавандик вичиз мукьва авунвай и ксарикай – чехир цадайбурун ва фу чрадайбурун чӀехибурукай – пис хъел акатна 3ва абур яракь гвай къаравулрин чӀехидан кӀвале туькӀуьрнавай ва виче Юсуфни ацукьарнавай къазаматда тур лагьана эмирна. 4Яракь гвай къаравулрин чӀехида Юсуф абуруз къуллугъ авун патал тайинарна. Вахтар къвез алатна 5ва са йифиз кьве къазаматдизни – пачагьдиз чехир цадайдаз ва фу чрадайдаз – ахварар акуна. Гьар садаз вичин, кьилдин мана авай ахвар акуна. 6Пакамахъ атай Юсуфаз абурук къалабулух квайди акуна.
7«Куьн куь къайгъудик кутунва?» – жузуна Юсуфа.
Юсуфахъ галаз санал адан сагьибдин кӀвале къазаматда тунвай фиръавандин мукьуванри 8жаваб гана: «Чаз ахварар акунва, амма абурун мана гудай кас авач». «Мана гун – Аллагьдин патай ганвай пай тушни кьван, – лагьана Юсуфа. – Ахъая куь ахварар».
9Чехир цадайбурун чӀехида вичин ахвар Юсуфаз ахъайна: «Заз ахварай зи вилик ципицӀдин чӀере кваз акуна. 10Адал пуд цуьрц алай. Абур чӀехи жез эгечӀна, цуьквер пайда хьана, ципицӀар битмиш хьана. 11Зи гъилени фиръавандин сукӀра ава. За кулар атӀана сукӀрадиз чуькьвена миже хкудна ва фиръавандив вугана».
12«Ингье ви ахварин мана, – лагьана адаз Юсуфа. – Пуд цуьрц им пуд югъ я. 13Пуд югъ алатайла, фиръаванди ви дережа мадни хкажда: вун ви виликан чкадал хкида ва вуна мадни, гьа виликдай хьиз, адав сукӀраяр вугуда. 14Амма са хатур ая: ваз бахтуни чин ачухайла, рикӀелай алудмир, фиръавандихъ галаз рахунра зунни рикӀел хкваш, инай зун азад ая. 15Зун жуван чилелай чуьнуьхнавайди я эхир! Гьа инани за къазаматда твадай хьтин са кӀвалахни авурди туш!»
16Фу чрадайбурун чӀехидани, мана гун хъсанди яз акуна, Юсуфаз лагьана: «Зазни ахварай зи кьилел пуд зимбил алаз акуна; 17винел алайда – адет яз фиръавандиз гьазурдай хьтин гьар жуьредин чрай фар авай, ва нуькӀверини и зимбилда авай фариз кӀуф язавай».
18«Ингье ви ахварин мана, – лагьана Юсуфа. – Пуд зимбил – им пуд югъ я. 19Пуд югъ алатда – фиръаванди вунни хкажда: вун тарагъаждикай кудда ва къушарини ви бедендиз кӀуф яда».
20Пуд йикъалай фиръаван хайи югъ тир, ва ада вичин мукьуванриз дем туькӀуьрна. Кьве кас ада и юкъуз вирибурун вилик хкажна: чехир цадайбурун ва фу чрадайбурун чӀехибур.
21Чехир цадайбурун чӀехиди – адан виликан чкадал, мад фиръавандив сукӀраяр вугудайди яз. 22Фу чрадайбурун чӀехиди лагьайтӀа – тарагъаждиз: вири гьа Юсуфа виликамаз лагьайвал. 23Анжах чехир цадайдан чӀехидан рикӀелай гьам Юсуф, гьамни адан тӀалабун алатна.
Currently Selected:
Хьунухь 40: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
