Genesis 15
15
Akisipanay Dios ed kinen Abram
1Kasumpal to yan inkagawa, walay pasingayew ed kinen Abram tan arengel ton inkuan na Katawan ed sikato, “Ag ka natatakot, Abram. Salimbengan ta kad kaatapan tan itdan ta kay baleg a tumang.”
2Balet inkuanen Abram, “Katawan a DIOS, antoy kaabigan ya iter ed siak na tumang mo, anta anggapo met so anak ko. Si Eliezer labat a taga Damasco so tumatawir ko. 3Ag mo ak initday anak, kanyan say sakey ed saray aripen ko so manawir ed saray kayaryan ko.”
4Arengel to lamet ya inkuan na Katawan, “Ag tawiren nen Eliezer ya aripen mo iray kayaryan mo; say dilin anak mo so manawir.” 5Say Katawan pinapaway to tan inkuanto, “Nengneng moy tawen tan salim a bilangen iray bitewen; ontan naani so karakel na saray kabyangay boleg mo.”
6Anisiay Abram ed Katawan, tan lapud sayan pananisia to say Katawan impasen ton matonung si Abram.
7Insan inkuan ed sikato na Katawan, “Siak so Katawan ya amataynan ed sika manlapud Ur na Babilonia, pian niiter kod sika yan dalin.”
8Balet tinepet nen Abram, “Katawan a DIOS, panoy pakaamtak a nakayaryan ko yan dalin?”
9Inmebat, “Awit ka diay sakey a baka, sakey a kanding, tan sakey a karniro, a mantaon iran amin na talora. Awit ka dia met na sakey a sibong na malapati tan sakey a palekpek.” 10Inawit nen Abram ira yan ayayep ed Dios, pinaldua to ra likud ed saramay manok, insan to ra impandarasig a nampepetekan so balang kapaldua. 11Dinapoan ira na saray buitri, balet inaabul ira nen Abram.
12Nen onseselek lay agew, akaogip na malmalet si Abram, tan balbaleg a takot so sinmabid sikato. 13Inkuan na Katawan ed sikato, “Magmaliw iran sangkaili ed sakey a bansa iray kabyangay boleg mo; aripenen da rad man tan pairapen da ran apat a lasus a taon. 14Balet dusaen koy bansan mangaripen ed sikara, tan dakel a kayamanan so awiten da no taynan da man a bansa. 15Sika, andokey so bilay mo, mareen so ipatey mo, insan ka nipompon. 16Onlabas so apatiran kailalakan kasakbayan a makapawil ira diay kabyangay boleg mo. Pansiansiaen kon panayamen ira diay Amorreo ya anggad alablabas lay inkaoges da, insan ko ra dusaen tan pataynanen.”
17Nen sinmelek lay agew tan ambilonget la, biglan walay banga a manasasewek tan kiew a mandarlang a dinmalan ed nanleetan na saramay pinalduan laman na ayayep. 18Diad saman ya agew, akisipanan so Dios ed kinen Abram. Inkuanto, “Isipan kon iter ed saray kabyangay boleg mo yan dalin, manlapud ketegan na Egipto ya anggad Ilog na Eufrates, 19pati saray dalin da ray Cineo, Cinezeo, Cadmoneo, 20Heteo, Perezeo, Rafaita, 21Amorreo, Cananeo, Gergeseo, tan Jebuseo.”
Currently Selected:
Genesis 15: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
