Genesis 23
23
Inatey si Sara tan Angaliw si Abraham na Dalin a Panangipomponan
1Nambilay si Sara na sanlasus tan duamplo tan pitoy taon. 2Inatey ed Hebron diad dalin na Canaan tan lapud saya, nanermen si Abraham.
3Tinaynan toy pasen a kawalaay bangkay nen asawa to, linmad saray Heteo, tan inkuanto, 4“Sangkaili ak dian miaayam ed sikayo; lakoan yo ak pa na dalin a pangipomponan kod asawak.”
5Inmebat ira, 6“Dengel kad sikami. Bibirbiren mi kan makapanyarin pangulo; ipompon moy asawam ed sankamaungan a lobuk mi. Maliket so anggan siopad sikami a mangiter na lobuk, pian nipompon moy asawam.”
7Inmalagey si Abraham tan tinmuek ed arap da 8tan inkuanto, “No iyabuloy yod siak ya ipompon ko diay asawak, kerew yo pad kinen Efron, a lakin anak nen Zohar, 9ta ilako tod siak so Ongib na Macpela, a walad samput na alog to. Bayaran koy intiron bili to, diad arap yo, pian nakayaryan kon para panangipomponan.”
10Wadman si Efron a manyodyorung a kaiba to ray Heteo ed pasen a pandaragupay totoo, diad puirtay siudad; inmebat a sankarengel na amin a wadman, 11“On, iter kod sika may ongib tan pati samay alog a kawalaan to. Diad arap da ray kakanayon ko, iter kod sika pian nipompon moy asawam.”
12Balet tinmuek si Abraham ed arap da 13tan inkuantod kinen Efron a sankarengel na amin, “No ontan sirin, dengel yo ak pa. Saliwen ko la sirin so intiron alog. Nia so bayar to; natan ipompon ko lad man so asawak.”
14Inmebat si Efron, 15“Mambili labat na apat a lasus a kuartan pilak iman a dalin—piga met la yad sikatan dua? Ipompon mod man so asawam.” 16Inmabuloy si Abraham tan sinimbang to may bili ya imbaga nen Efron a sankarengel na saray totoo—apat a lasus a kuartan pilak, onung na panagsimbang na saray nigosianti.
17Onya so impakakayaryan nen Abraham ed samay alog nen Efron ed Macpela, diad nibokig na Mamre. Kaiba toy ongib tan amin a kiew diman. 18Binirbir na amin da ra may Heteo ya akaimatun ed tongtongan a kayaryan la nen Abraham iman a pasen. 19Insan imponpon nen Abraham si asawa ton Sara ed saman ya ongib ed alog na Macpela a nibokig na Mamre ed dalin na Canaan. 20Kanyan samay alog tan samay ongib a wadman, a kayaryan nen saman na saray Heteo, et nagmaliw a kayaryan nen Abraham tan ginawa ton panangipomponan.
Currently Selected:
Genesis 23: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
