Genesis 46
46
Linmad Egipto si Jacob tan say Pamilya to
1Binalkut nen Jacob so amin a kayaryan to, linmad Beer-seba, tan diman angisaklang na saray bagat ed Dios nen ama ton Isaac. 2Akisalitay Dios ed sikato diad panamegley na sakey a pasingayew ed labi tan inkuanto, “Jacob, Jacob!”
“Wadya ak! Anto man?” ebat to.
3“Siak so Dios, say Dios nen amam,” inkuanto. “Ag ka natatakot ya onlad Egipto; gawaen kod man a baleg a bansa iray kabyangay boleg mo. 4Ibaan ta kayod man, tan ipawil kod sayan dalin iray kabyangay boleg mo. Walad diking moy Jose no ompatey ka.”
5Manlapud Beer-seba, nambiahi si Jacob. Saramay anak to inlogan day Jacob, saray ogogaw, tan saray kaasawaan da ed saramay kariton ya impawit na arid Egipto. 6Inawit da ray ayayep da tan amin a bengatlan akayaryan dad Canaan, tan linma rad Egipto. Inawit nen Jacob ya amin iray kabyangay boleg to: 7saray anak ton lalaki tan bibii, saray apo ton lalaki tan bibii.
8Sikara yay kabyangay pamilya nen Jacob ya akilad sikato ed Egipto: si Ruben a pangulowan ya anak to, 9tan saray lalakin anak nen Ruben: Hanoc, Fallu, Hezron, tan Carmi; 10si Simeon tan saray anak ton lalaki: Jemuel, Jamin, Ohad, Jakin, Zohar, tan Saul ya anak na biin Cananea; 11si Levi tan saray anak ton lalaki: Gerson, Coat, tan Merari; 12si Juda tan saray anak ton lalaki: Er, Onan, Sela, Fares, tan Zara (di Er tan Onan inatey irad Canaan); saray lalakin anak nen Fares et di Hezron tan Hamul; 13si Isacar tan saray anak ton lalaki: Tola, Pua, Job, tan Simron; 14si Zabulon tan saray anak ton lalaki: Sered, Elon, tan Jahleel. 15Sikara yay anak nen Jacob ed kinen Lea a nianak irad Mesopotamia. Kaiba ra met si Dina, say marikit ya anak nen Jacob. Talomplo tan talon amin iray kabyangay boleg nen Jacob ed kinen asawa ton Lea.
16Si Gad tan saray lalakin anak to: Zefon, Hagui, Suni, Ezbon, Eri, Arodi, tan Areli; 17si Aser tan saray lalakin anak to: Emna, Isva, Isvi, Beria, tan Sera ya agi ran bii. Saray lalakin anak nen Beria: Heber tan Malkiel. 18Sarayan labinanem et kabyangay boleg nen Jacob ed kinen Zilpa, samay aripen ya inter nen Laban ed kinen Lea ya anak to.
19Duaray lakin anak nen Raquel ya asawa nen Jacob: di Jose tan Benjamin. 20Diad Egipto duaray anak nen Jose, di Manases tan Efraim, ed kinen Asenat ya anak nen Potifera a pari ed Heliopolis. 21Saray lalakin anak nen Benjamin sikara di Bela, Beker, Asbel, Gera, Naaman, Ehi, Ros, Mupia, Hupim, tan Ard. 22Sarayan labinapat so kabyangay boleg nen Jacob ed kinen Raquel.
23Si Dan tan say anak ton laki a si Husim. 24Si Neftali tan saray lalakin anak to: Jazeel, Guni, Jezer, tan Silem. 25Sarayan pitoran lalaki so kabyangay boleg nen Jacob ed kinen Bilha, samay aripen ya inter nen Laban ed kinen Raquel ya anak to.
26Anemaplo tan anem ya amin iray anak tan apo nen Jacob a linmad Egipto, likud ed saray asawa na saray anak to. 27Duaray anak nen Jose ed Egipto, kanyan pitomplon amin so kabyangay pamilya nen Jacob a linmad Egipto.
Si Jacob tan say Pamilya to ed Egipto
28Pinaona nen Jacob si Juda, ta kerewen tod Jose ya abeten to rad Gosen. Kasabi ra, 29linmogan si Jose ed karwahi to, insan linmad Gosen a mangabet ed kinen ama to. Kaasingger to, nilakap to, tan abayag a nanakis. 30Inkuanen Jacob ed kinen Jose, “Sipaparaan ak lan ompatey, natan ta anengneng ta ka tan amtak a mabilay ka ni.”
31Insan inkuanen Jose ed saray agagi to tan amin a kabyangay pamilya nen ama to, “Onla ak, ta ibagak ed ari a sinmabid siak iray agagik tan amin a kabyangay pamilya na amak a manaayam irad Canaan. 32Ibagak ed sikato a pumapastol kayo tan managkomponi kayoy ayayep; ibagak met ya inawit yo ra diay karniro yo, saray baka yo, tan amin a kayaryan yo. 33No tawagen kayoy ari tan tepeten to no antoy anapan yo, 34ag yo lilingwanan ya ibagan managkomponi kayoy ayayep a nanlapud gapo, a singa saray lalaki yo. Diad ontan, panayamen to kayod dalin na Gosen.” Imbaga ya nen Jose, ta ag labay a kaamung na saray taga Egipto iray pumapastol.
Currently Selected:
Genesis 46: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
