Genesis 48
48
Binindisionan nen Jacob si Efraim tan si Manases
1Ag abayag ed samay impantongtong dan sanama, nibagad kinen Jose a mansasakit si ama to. Kanyan intagar to ray duaran lalakin anak to a di Manases tan Efraim, ta nengnengen day Jacob. 2Nen nibagad kinen Jacob a sinmabiy Jose ya ondalaw ed sikato, inanosan toy binmangon tan inmirung ed dokulan. 3Inkuanen Jacob ed kinen Jose, “Pinmayawar ed siak so Dios diad Luz ed dalin na Canaan tan binindisionan to ak. 4Inkuantod siak, ‘Parakelen kon maung so kabyangay pamilyam, pian magmaliw ya amayamay a bansa iray kabyangay boleg mo; iter kod saray kabyangay boleg mo yan dalin tan kayaryanen da ed anggad angga.’”
5Intuloy ya inkuanen Jacob, “Ibibilang kon anak iray duaran lalakin anak mo a nianak ed Egipto kasakbayan na inyakar ko dia; anak ko ra di Efraim tan Manases a singa di Ruben tan Simeon. 6No wala ni ray anak mon lalaki, ag ira nibilang ya anak ko; alaen day tawir da diad panamegley di Efraim tan Manases. 7Gagawaen ko ya, lapud kinen inam a Raquel. Kaermenan kon tuloy nen inatey si Raquel ed dalin na Canaan ya ag arawid Efrata, nen ompapawil ak a nanlapud Mesopotamia. Imponpon kod man diad gilig na dalan a mamaarap ed Efrata.” (Betlehem so tawag natan ed Efrata.)
8Nen anengneng nen Jacob iray anak nen Jose, tinepet to, “Siopa ra yan ogogaw?”
9Inmebat si Jose, “Anak ko ran inter na Dios ed siak diad Egipto.”
Inmebat si Jacob, “Iyasingger mo ra diad siak, pian nabindisionan ko ra.” 10Korarap la ray mata nen Jacob, lapud masiken la, tan ngalngali la ag makanengneng. Inyasingger nen Jose ira may ogogaw ed sikato, nilakap to ra tan inanguban to ra. 11Inkuanen Jacob ed kinen Jose, “Ag kon balut inilaloan a nanengneng ta ka ni, et natan inyabuloy ni ingen na Dios a nanengneng kon pati saray anak mo.” 12Inala nen Jose ira may ogogaw ed akwalan nen Jacob tan dinmakmomon anggad dalin so lupa to.
13Inyan nen Jose si Efraim diad nikawigi nen Jacob tan si Manases diad nikawanan. 14Balet impankorusan nen Jacob iray taklay to, tan intapew tod olo nen Efraim so kawanan a lima to anggaman a sikatoy yogtan, tan say kawigin lima to diad tapew na olo nen Manases a sikatoy pangulowan. 15Insan to binindisionan ni Jose:#48:15 JOSE: Diad pamibindision nen Jacob ed kindi Efraim tan Manases, say katwaan to si Jose so bibindisionan to.
“Sarayan lalaki bindisionan ira komun na Dios, say Dios a nilingkuran di amak ya Abraham tan amak ya Isaac!
Bindisionan ira komun na Dios ya angiwanwan ed siak ya anggad sayan agew!
16Bindisionan ira komun na anghil ya angipaliis ed siak ed antokaman a kaogsan.
Mansiansia komun ed panamegley da so ngaran ko tan say ngaran di amak ya Abraham tan amak ya Isaac.
Nawalaan ira komun na amayamay a kabyangay boleg.”
17Agoloy isip nen Jose nen anengneng ton intapew nen ama tod olo nen Efraim so kawanan a lima to; kanyan inala tod olo nen Efraim so lima nen ama to, ta iyalis tod olo nen Manases. 18Inkuantod kinen ama to, “Aliwan ontan, ama. Sikato yay pangulowan; itapew yod olo to so kawanan a lima yo.”
19Ag inmabuloy si ama to tan kuanto, “On, amtak anak ko. Magmaliw met a matalonggaring a totoo iray kabyangay boleg nen Manases. Balet magmaliw a matalonggaring ni so yogtan to nen say sikato, tan magmaliw a matalonan bansa iray kabyangay boleg to.”
20Diad saman ya agew binindisionan to met ira may ogogaw a kuanto, “Ikana na saray Israelita so kangaranan yo diad pamindision da. Ikuanda, ‘Pagmaliwen kayo komun na Dios a singa di Efraim tan Manases.’” Diad onya insaginonur nen Jacob si Manases ed kinen Efraim.
21Insan inkuanen Jacob ed kinen Jose, “Onung na sankanengneng mo, magano ak lan ompatey, balet mansiansian kaibam so Dios, tan papawilen to kad dalin na saray atateng mo. 22Diad sika, aliwan saray lalakin agagim, so pangitdan ko na Sikem, say mataban dalin a sinamsam kod saray Amorreo diad panamegley na ispadak tan panak.”
Currently Selected:
Genesis 48: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
