Genesis 6
6
Say Kaogsan na Katoowan
1Nen ondarakel la ray katoowan tan akayatan da lay intiron mundo, dakel met la ray nianak a bibii. 2Saray anak na Dios#6:2 Saray anak na Dios; odino Saray anak na saray diriyos; odino Mangatatawen a pinalsa. anengneng dan maganggana ra yan bibii, kanyan nampili ray inasawa ra. 3Insan inkuan na Katawan, “Ag ko iyabuloy a mambilay ya anggad angga iray katoowan; ompatey ira. Manlapud natan, mambilay iray ag onsoluk ed sanlasus tan duamploy taon.” 4Diad saraman ya agew, tan anggan diad saray ontombuk, wala ray alan a manaayam ed dalin ya anak ira na saramay magangganan bibii tan saramay anak na Dios. Sikaray matalonggaring a bayani tan bantug a lalaki nen saman a panaon.
5Nen anengneng na Katawan so ontan lan kaogsan na amin a totoo ed tapew na dalin, say ontan lan kinaoges lawas na kanunotan da, 6naermenan ed impamalsa tod totoo tan diad impangipasen tod sikara ed tapew na dalin. Diad ontan lan pagbabawi to, 7inkuanto, “Paandipaten kod tapew na dalin ira yan totoo a pinalsak, saray ayayep, tan saray manok, ta maermen ak ed impamalsak ed sikara.” 8Balet pakaliliketan na Katawan si Noe.
Si Noe
9-10Saya so impanbilay nen Noe. Wala ray taloran anak ton lalaki a di Sem, Ham, tan Jafet. Si Noe labat so maung a too nen panaon to. Anggapoy pakabalawan ed sikato, ta kaibiba toy Dios. 11Balet maoges ya amin iray arum a totoo, tan kinmayat so kaogsan ed amin a pasen. 12Say Dios ninmengneng ed mundo tan anengneng ton maoges, lapud maoges so pambibilay na amin a katoowan.
13Inkuan na Dios ed kinen Noe, “Tinibokel ko lad kanunotan ko a panganggaen koy bilay na amin a katoowan. Sigput ko ran deralen, ta napnoy mundo na maoges a gawgawa ra. 14Manggawa kay biong para sika; ikanam so maung a klasiy kiew, igawaan mo na saray kuarto, tan balkut mo na alkitran ed loob tan diad paway to. 15Gawam a sanlasus tan limamplon mitro so karokey to, duamplo tan liman mitro so kaawang to, tan labinliman mitro so kaatagey to. 16Igawaan moy atep,#6:16 atep; odino bintana. tan iyatagey mod saray dingding to na kapalduay mitro. Gawam a taloran grado, tan igawaan moy sakey a puirta ed diking to. 17Delapen koy intiron dalin, pian naderal so antokaman a mabilay. Ompatey ya amin iray walad tapew na dalin, 18balet misipanan ak ed sika. Loob kayod samay biong, sika tan say asawam, saray anak mo tan saray kaasawaan da. 19-20Pian mambilay ira, mangawit kad biong na sankaparis ed amin a klasiy ayayep, tan sankaparis ed amin a klasiy manok. 21Mangawit ka met na amin a klasiy kakanen a para sikayo tan sikara.” 22Sinumpal nen Noe ya amin iray ingganggan na Dios.
Currently Selected:
Genesis 6: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
