Mahendo 13

Barinaba na Saulo anavoyerwa na kuhumwa

1Ko kanisa ra Anitiyokiya, kwakala kuna akuluphiri anjine okala ni agomvi a Mulungu, na anjine ákala ni alimu. Ao ákala ni: Barinaba, Simioni ariye dzinare rinjine ndiye Mwiru, Lukiyo muchina Kurene, Saulo na Manaeni, ariye wafugwa phamwenga na mufalume Herode Anitipa. 2Ndo kwahenda ukati achifunga na achikala anamwabudu Bwana, na Roho wa Mulungu achiaamba, “Nirichirani Barinaba na Saulo, ahende kazi yodziaihira.” 3Ndo ariphomala kufunga na kuvoya, áaikira mikono achiavoyera, na achiaricha achenda vyao.

Barinaba na Saulo kuko chisiwa cha Kupuro

4Barinaba na Saulo phohumwa ni yiye Roho wa Mulungu, áteremuka hata mudzi wa Selekiya, na kuko achendapanda meli achenda hata chisiwa cha Kupuro. 5Ariphofika mudzi wa Salami, ásumurira neno ra Mulungu masinagogini, na Johana Mariko achikala ni mwavizi wao.

6Analaa mudzi wa Salami, ákwenda hata mudzi wa Pʼafo, urio wakala u pʼembe ya phiri ya chicho chisiwa. Kuko, ákwendamona Muyahudi mumwenga yekala ni mutsai, na dzinare wakala ndiye Bari-Jeso. Yiye wakala unadzamba ni mugomvi wa Mulungu. 7Bari-Jeso wakala ni musenangwa wa Serigiyo Pʼaulo, ariye wakala ndiye mubomu wa chicho chisiwa, na yiye wakala ni chimanyi muno. Ndo Serigiyo Pʼaulo waalagizira ano Barinaba na Saulo, kwa hata adze amwambire neno ra Mulungu. 8Ela yiye mutsai Bari-Jeso, ariye Chiyunani wakala wihiwa Elima, achiheza kwapinga kwa amuzize yiye mubomu wa chisiwa atsʼimukuluphire Jeso. 9Ndo Saulo ariye dzinare rinjine ndiye Pʼaulo achikala udziudzalwa ni Roho wa Mulungu, achimulola muno yiye Elima na achiamba, 10“Uwe u mwana wa Shetani, na unapinga chila ririro ni ra haki. Uwe u mulembi wa kupindukiya, na mukorofi mubomu! Undaricha rini uwe kugaluza ujeri wa Bwana na kuuhenda ulongo? 11Bee, vivi Bwana undakutiya akili kwa kukuhenda utsʼone, na uwe kʼundawona mwanga wa dzuwa kwa chiwango.”

Ndo yiye mutʼu achanza kona utʼu dza kunje na dziza phapho kare, na achanza kwenda hiku na hiku kutsakula mutʼu amugwire mukono amulongoze. 12Mubomu wa chisiwa waangalazwa muno ni widimi wa mafunzo ga Bwana, na ariphoona gago, achikuluphira.

Pʼaulo na Barinaba

13Kulaa Pʼafo, Pʼaulo na ao anzie ápanda meli achenda hata mudzi wa Pʼeriga, urio jimbo ra Pʼamufuliya. Ela kuko, Johana Mariko achendaaricha, achiuya Jerusalemu. 14Osala achenderera na charo kulaa phapho Pʼeriga hata mudzi wa Anitiyokiya phephi na jimbo ra Pʼisidiya. Tsʼiku ya Sabato yiriphofika, achendaphenya ndani ya sinagogi achisagala. 15Neno richisomwa kulaa Shariya ya Musa, na kulaa Maandiko ga agomvi a Mulungu. Ndo abomu a riratʼu sinagogi achiaamba ano Pʼaulo vivi, “Ayahudi asena, muchikala muna neno ra kwatiya moyo anzienu, aambireni.”

16Ndo phapho Pʼaulo waima achisumiza na achiamba vivi, “Nisirikisani Aiziraeli asena na mwimwi anjine mosi murio munamwabudu Mulungu! 17#Kul 1:7; Kul 12:51Siswi Aiziraeli yiye Mulungu wehu waatsagula akare ehu, na achiahenda akale anji phokala a ujenini itsʼi ya Misiri. Mulungu kuko waalavya kwa widimiwe ubomu. 18#Isab 14:34; Kʼumb 1:31Yiye waavumirira myaka mirongo mine ko nyika. 19#Kʼumb 7:1; Josh 14:1Yiye Wagahenda makabila mafungahe ga itsʼi ya Kanani gahangamizwe, na yo itsʼi yao achiapʼa o atʼue yikale yao. 20#Alam 2:16; 1 Sam 3:20Maneno gaga gosi gáhendeka myaka magana mane na mirongo mitsano.

“Ariphoanza kusagala ko itsʼi ya Kanani, Mulungu waahenda alongozwe ni alamuli hata ukati wa mugomvi wa Mulungu Samweli ariphoanza kulongoza. 21#1 Sam 8:5; 1 Sam 10:21Ela ao ávoya aikirwe mufalume wao, na Mulungu achiatsagulira Saulo mwana wa Kishi. Yiye wakala ni mutʼu wa mbari ya Benjameni, na watawala myaka mirongo mine. 22#1 Sam 13:14; 1 Sam 16:12; Zab 89:20Mulungu ariphomuusa yiye, waatsagulira Daudi achikala mufalume wao. Na Mulungu waamba vivi dzuluye, ‘Daudi mwana wa Jese, nidzimona ni mutʼu anihamiraye muno, na undachimiza gangu gosi nihenzago agahende.’ 23Mulungu waalaga Aiziraeli kukala, mutʼu wa mudzungu wa yuyu Daudi undakala Mutivyi wehu, na kwa vivyo, wahurehera Jeso. 24#Mar 1:4; Luk 3:3Na Jeso ariphokala kʼadzangwe kudza, Johana wamulongolera achihusumurira siswi Aiziraeli hosini kukala, ni seti hutye na hubatizwe. 25#Joh 1:20; Mat 3:11; Mar 1:7; Luk 3:16; Joh 1:27Johana ariphokala unamarigiza kaziye, waauza atʼu vivi, ‘Mukale munaona mino ni ani? Mimi bee tsʼimi yiye mutʼu mumuloleraye. Elako, yiye undakudza nyuma zangu, na mimi tsʼiwirya hata kukala muhendikaziwe wa kumuvula virahu.’

26“Aiziraeli asena murio mu atʼu a mudzungu wa Burahemu, na anjine mosi mumwabuduo Mulungu, mwimwi manyani kukala, Mulungu udziureha kwehu uu udzumbe wa kutivya! 27Achina Jerusalemu na abomu ao kʼaamanyire kukala Jeso ndiye Mutivyi, na kʼaagamanyire maanaye gago maneno ga agomvi a Mulungu gasomwago chila Sabato. Elako, ágachimiza vivyo gago maneno ga agomvi a Mulungu aripholamula Jeso anyongwe. 28#Mat 27:22, 23; Mar 15:13, 14; Luk 23:21-23; Joh 19:15Ao hata aripho kʼaamupatire na kosa riwiryaro anyongwe, ela ao ámuvoya Pilato vivyo amulamule kunyongwa. 29#Mat 27:57-61; Mar 15:42-47; Luk 23:50-56; Joh 19:38-42Na ariphomala kuhenda gosi gokala gadzandikwa dzuluye, yiye watserezwa kulaa pho musalabani, achendazikwa. 30Ela Mulungu wamufufula kulaa kuzimu, 31#Mahe 1:3na Jeso waalairira kwa tsʼiku nyinji aratʼu anafunzie omutuwa kulaa Galilaya hata Jerusalemu. Ao vivi, ndio mashaidige ashuhudiyirao Ayahudi. 32#Zab 2:7Mulungu waalaga akare ehu chilagane, na vivi hudzikudza phapha, kumusumurira Nguma Mbidzo 33ya kwamba, chicho chilagane choalaga akare ehu, udzihuchimizira siswi adzukulu ao, kwa kumufufula Jeso kulaa kuzimu. Gago ganagwa sawa na goandikwa Zaburi ya phiri kukala,

‘Uwe u Mwanangu;

mimi vivi rero ninasema kukala ni Abayo.’

34 # Isa 55:3 “Mulungu wamufufula Jeso kulaa kuzimu hata kʼandafa kahiri akaola, na vivyo vinagwa sawa na vyoamba Mulungu kukala,

‘Nindamunosa manoso matakatifu jeri gomulaga Daudi.’

35 # Zab 16:10 “Na chisha, Zaburi yinjine yinaamba vivi dzulu ya Jeso,

‘Kʼundamuricha Mutakatifuo aole.’

36“Daudi ariphokala u moyo, wahenda henzo ra Mulungu. Na ariphofa, wazikwa mabirani pha akaree, na mwiriwe uchola. 37Ela Jeso yiye wafufulwa ni Mulungu kulaa kuzimu, na kwa vivyo, mwiriwe kʼawolere.

38-39“Bee asena, ninamuhenza mumanye kukala, vivi munasumurirwa udzumbe dzulu ya kusamehewa dambi kuchirira yiye Jeso. Vivi chila mumwenga amukuluphiraye Jeso, unasamehewa dambi zosi na akale tsare, neno ririro rakala kʼariidima kuhendwa ni Shariya ya Musa. 40Ndo dzimanyirireni gatsʼidze gakamupata gago maneno gogombwa ni agomvi a Mulungu kukala,

41 # Hab 1:5 ‘Sirikisani mwi muphuryao neno ra Mulungu!

Angaikani, na muhangamike,

mana, mimi ninahenda utʼu uu ukati wenu,

urio mwimwi kʼamundaukuluphira

hata mutʼu akamwambira!’ ”

42Pʼaulo na Barinaba ariphokala analaa mumo sinagogini, aratʼu atʼu áamba adze kahiri tsʼiku ya Sabato yokala yindatuwiriza, kwa adze akaze kugomba dzulu ya maneno gago. 43Monano uo uriphomarigizika, Ayahudi anji, na atʼu a makabila manjine okala aphenya dini ya Chiyahudi, ágwirikana na ano Pʼaulo na Barinaba. Pʼaulo na Barinaba achigomba nao, na achiatiya moyo kukala, aenderere kuukuluphira udzo wa Mulungu.

44Tsʼiku ya Sabato yiriyotuwiriza, karibu chila mutʼu phapho mudzi uo, wakwendasirikisa udzumbe dzulu ya Bwana. 45Ela ao vilongozi a Ayahudi ariphoona riro duu ra atʼu, áphenywa ni chidzitso, na achipinga gago maneno gokala ganagombwa ni Pʼaulo, na yiye mwenye achimuhakana. 46Elako, Pʼaulo na Barinaba áaudzidza photsʼi woga achiamba, “Mwimwi mwakala mudziikwa mukale a kwanza kusikira neno ra Mulungu. Ela kwakukala, mudzirikahala na munadzona kʼamuwirya uzima uphya wa kare na kare, hʼaya bee hunamuricha hwende kwa atʼu a makabila manjine. 47#Isa 42:6; 49:6Maana, Bwana wahulagiza achihwamba vivi,

‘Mwimwi nidzimuhenda mukale mwanga kwa mataifa manjine,

kwa hata murehe wokofu wangu chila pembe ya dunia.’ ”

48Bee, atʼu a makabila manjine ariphosikira gago, áhamirwa, na achiulika uo udzumbe dzulu ya Bwana. Na aratʼu osi okala átsagulwa apate uzima uphya wa kare na kare, ákuluphira.

49Udzumbe dzulu ya Bwana wagotʼa chila phatʼu upande uo. 50Ela vilongozi a Ayahudi áasunganya alume okala anamanyikana phapho mudzi uo na achetʼu a makabila manjine okala ana vyeo na anamuvoya Mulungu, kwa aapinge ao ano Pʼaulo na Barinaba. Ndo ao áanza kwahendera mauku Pʼaulo na Barinaba, na chisha hata achihendaavuguza kulaa phapho phao chidzidzini. 51#Mat 10:14; Mar 6:11; Luk 9:5; 10:11Ndo Pʼaulo na Barinaba achikutʼa-kutʼa vumbi rokala ririro mwao maguluni kwaonyesa kukala andamanya enye, chisha achenda mudzi wa Ikoniyo. 52Ela ao anafunzi a kuko mudzi wa Anitiyokiya áudzalwa ni raha muno, na Roho wa Mulungu.

Currently Selected:

Mahendo 13: CHIDUR

Highlight

Copy