Mahendo 2

Roho wa Mulungu unaatsererera akuluphiri

1 # Alaw 23:15-21; Kʼumb 16:9-11 Ukati umwenga, tsʼiku ya tsʼikukʼuu ya Pʼenitekosite yafika, na akuluphiri osi ákala arundikana phamwenga. 2Enye phokala a phapho, phapho kare phávuma utʼu dza vuto kulaa mulunguni, na muvumo uo uchenda udzala yo nyumba yosi yokala asegere. 3Chisha, o akuluphiri achiona vitʼu dza luchemi lwa moho, luchitsamuka na kuhurira dzulu-dzulu ya chila mumwenga wao. 4Osi achiudzalwa ni Roho wa Mulungu, na achanza kugomba viryomo vinjine vyoidimiswa ni yiye Roho wa Mulungu.

5Phapho Jerusalemu, phákala phanasagala Ayahudi kulaa chila itsʼi phapha duniani, na ao ákala anamukuluphira Mulungu. 6Ndo ao ariphosikira kʼululu zizo, anji ákwenda, achendarundikana phapho. Ela achangalala muno, kwakukala, ao chila mumwenga wasikira chiryomoche chinagombwa ni o akuluphiri. 7Ndo ao áangalala na achimaka achiamba, “Aa! O atʼu hwasikirao anagomba, samba osi ni achina Galilaya? 8Ndo vidzanzadze hata vino chila mumwenga wehu unasikira chiryomoche agombacho chinagombwa ni ao? 9Phapha anjine ehu ni achina Pʼariti, anjine ni achina Medi na Elamu, anjine ni achina Mesopotamia, anjine ni achina Judea, anjine ni achina Kapadokiya, anjine ni achina Pʼonito na Asiya, 10anjine ni achina Furugiya na Pʼamufuliya, anjine ni achina Misiri na pʼande za Libiya phephi na Kurene, na anjine ni ajeni kulaa Rumi. 11Anjine ni Ayahudi chihumbo, na anjine ni atʼu ohendaphenya dini ya Chiyahudi. Na anjine o, álaa Kirete na Warabuni. Ela, heka chila mumwenga wehu unaasikira anagomba maneno mabomu ga Mulungu kwa chiryomoche mwenye!?” 12Ao áangalala na achiyugika muno hata achiuzana vivi, “Uu! Ni maneno gani gano?” 13Ela anjine achiaphurya o akuluphiri achiamba, “Atʼu aa akola!”

Pʼetero unaasumurira atʼu udzumbe wa Mulungu

14Pʼetero ariphoona o atʼu ákala anayugika, wazuka phamwenga na aratʼu ahumwa anzie kumi na mumwenga, achisumiza na achanza kwasumurira udzumbe o atʼu kwa laka ra dzulu. Yiye waamba, “Ayahudi asena na anjine mosi musagalao phapha Jerusalemu, imani nimungʼazire gaga, na bee, gasirikiseni chividzo gondamwambira. 15Atʼu aa kʼaakolere dza vivyo mwazavyo, mana, vivi bee hata ni saa tʼahu za chiramuko. 16Ndo ujeri ni kwamba, garatʼu maneno gogombwa pʼindi ni mugomvi wa Mulungu Joeli, vivi ganaanza kuchimira. 17#Joel 2:28-32Joeli waamba,

‘Bwana Mulungu unaamba kukala,

“Tsʼiku za musindikizo wa urumwengu,

nindamwaga Roho wangu dzulu ya atʼu osi.

Ndo ana enu a chiche na a chilume, andasema udzumbe wangu.

Atana enu andaona maono,

na atumia enu andaloha ndoso.

18Ahendikazi angu nao, ache kwa alume,

nindaaudzaza Roho wangu tsʼiku zizo,

na ao andasema udzumbe wangu.

19Nindahenda maneno ga kwangalaza ko mbinguni,

na phapha duniani, nindahenda dalili za kwangalaza.

Kuko kundakala na milatso,

na moho, na maingu ga mosi.

20Dzuwa rindagwirwa hata kuhende dziza,

na mwezi nao undagwirwa hata kukale dododo dza milatso,

kabila ya yo tsʼiku bomu ya Bwana Mulungu kufika.

21Ndo chila yendariiha dzina ra Bwana Mulungu,

undativywa.” ’ ”

22Pʼetero waenderera kugomba achiamba, “Bee kʼamona Aiziraeli asena, vivi ninamwambira maneno dzulu ya Jeso muchina Nazareti, na gago gasirikiseni chividzo vivyo. Mwimwi enye munamanya kukala, yiye Jeso muchina Nazareti wafunulwa kwenu ni Mulungu kukala, una widimi wa chimulungu kuchirira vivyo vilinge, mautʼu-mautʼu ga kwangalaza na dalili, virivyo Mulungu wavihenda kati yenu kuchirira yiye. 23#Mat 27:35; Mar 15:24; Luk 23:33; Joh 19:18Jeso walaviwa ni Mulungu achidza kwenu, na mwimwi namwi muchimulavya kwa atʼu ai, na phapho muchimuhenda aulagwe kwa kukotwʼa misumari musalabani, mana, vivyo ndivyo vyokala Mulungu upanga, na udzamula kare. 24#Mat 28:5, 6; Mar 16:6; Luk 24:5Ela Mulungu wamuvugula Jeso minyororo ya chifo kwa kumufufula kulaa kuzimu, mana, vyakala kʼaviidimikika kukala, chifo chenderere kumufunga. 25#Zab 16:8-11Maana, hata Daudi wagomba vivi dzuluye,

‘Ukati wosi, námwona Bwana Mulungu u mbere zangu.

Kwakukala yiye u mukono wangu wa kulume,

kʼaphana utʼu ondanitetemesa.

26Kwa vivyo moyo wangu unahererwa,

ninapiga njerejere kwa raha,

na ninalolera kukala, mwiri wangu nao undakala salama.

27Maana, roho yangu kʼundayiricha kuzimu,

hebu lufu lwa mimi Mutakatifuo role.

28Uwe udzinifunulira njira za uzimani,

na unanihenda nihamirwe muno, kwakukala, u phamwenga nami.’

29“Enehu, mimi ninamwambira na kanuni dzulu ya maneno gomugwira mukare wehu Daudi. Yiye wafa na achizikwa, na mbiraye yi phapha phehu hata rero. 30#Zab 132:11; 2 Sam 7:12, 13Ela yiye wakala ni mugomvi wa Mulungu, na kwa vivyo, wakala unachimanya cho chilagane chokala ulagwa ni Mulungu. Mulungu wakala ulapha kukala, yiye Daudi achifa, undamuhenda mumwenga wa atʼu a mudzunguwe yiye Daudi, akale mufalume dza yiye vyokala. 31Na chisha, Daudi wafunulirwa chimbere maneno gokala gandahendwa ni Mulungu. Na kwa vivyo, achigomba dzulu ya kufufulwa kwa yiye Kʼirisito pho ukati ariphoamba kukala, yiye kʼarichirwe kuzimu, na hebu lufulwe kʼarolere mbirani. 32Ndo asena, Mulungu wamufufula jeri yiye Jeso hata siswi hosi, hu mashaidi ga lairiro riro. 33Chisha, yiye Jeso wahwalwa achenda mulunguni achendasagala mukono wa kulume wa Abaye Mulungu, na achihewa Roho wa Mulungu dza vyokala ulagwa. Ndo Jeso naye udzihutserezera yiye Roho wa Mulungu. Kwa vivyo, gaga mugaonago na kugasikira, ganahendwa kwakukala, yiye Roho wa Mulungu udzihutsererera. 34#Zab 110:1Daudi kʼahwalirwe akenda dzulu mulunguni chimwiri dza Jeso. Kwa vivyo, yiye ariphoamba,

‘Bwana Mulungu wamwamba Bwana wangu,

“Sagala upande wangu wa mukono wa kulume,

hata phondakuhenda warime tsetsetse adawao,” ’

35“wakala kʼadzihadza yiye mwenye.

36“Ndo mwimwi na Aiziraeli anjine osi, nimumanye na mukubali kukala, yiye Jeso muriyemuulaga kwa kumukotʼa misumari musalabani, vivi Mulungu wamwika akale Bwana, na yiye Kʼirisito!”

37O atʼu ariphosikira gago, adzuta hata achimuuza Pʼetero na o ahumwa anzie vivi, “Hʼa bee sambi huhendedze enehu?” 38Pʼetero achiaudzidza achiaamba, “Atyani, na chila mumwenga wenu abatizwe kwa dzina ra Jeso Kʼirisito, kwa hata mupate kusamehewa madambi genu, na phapho muphokere Roho wa Mulungu dza manoso. 39Yiye Roho wa Mulungu ndiye yelagwa mwimwi na atʼu a mudzungu wenu, na atʼu osi phapha duniani, ario Bwana Mulungu wehu undaaiha kwakwe.” 40Pʼetero waenderera kwaambira manji ga kwakanya, na achiavoya achiaamba, “Mwimwi tiyani, mutsʼigwirwe ni gondachigwira chichi chivyazi chii chotsʼikuluphira!” 41Tsʼiku yiyo, atʼu atapirao helufu tʼahu ákuluphira udzumbewe, achibatizwa na ao achigwirikana na o akuluphiri.

42Ao osi ákala achidzilavya kufunzwa ni o ahumwa a Jeso, ákala achikala na ushirika, kurya phamwenga, na kuvoya phamwenga.

Akuluphiri arivyokala achisagala

43Ahumwa a Jeso áenderera kuhenda mautʼu-mautʼu ga kwangalaza na dalili nyinji, na gago gachimuhenda chila mutʼu amogophe Mulungu muno. 44#Mahe 4:32-35Akuluphiri osi áenderera kukala chitʼu chimwenga, na miyo yao nayo, ákala ahumira chivimwenga. 45Ao ákala akaguza hata miyo yao, na zo pʼesa akagavyana kutuwirizana na haja za chila mumwenga. 46Ao áenderera kuvoya phamwenga mumo Hekaluni chila tsʼiku, na ákala arya phamwenga kwao midzini na kuno anahamirwa, na ana myoyo mimwenga, 47na kumulika Mulungu. Atʼu osi ákala anaaishima ao akuluphiri, na chila tsʼiku, atʼu ákala achitivywa, na ao Bwana wakala achiaonjeza kwa riro duu ra akuluphiri.

Currently Selected:

Mahendo 2: CHIDUR

Highlight

Copy