Johana 11

Chifo cha Lazaro

1-2 # Luk 10:38, 39 # Joh 12:3 Mutʼu mumwenga aihiwaye Lazaro wakala mukongo. Yiye wakala ndiye mwanalume wa ano Maryamu na Marita, na osini ákala asagala Betania. (Maryamu yuyu ndiye chidzakoche wakudzamumwagira mafuha ga kunukʼatʼo Bwana Jeso, na achimuhakusa magulu chividzo na nyereze.) 3Ndo ao ndugu a chiche achihuma mutʼu akamwambe Jeso kukala, “Bwana, yiye Lazaro umuhenzaye, bee ni mukongo hata kʼadzimanya!”

4Ela Jeso yiye ariphokwendaambirwa gago, waamba, “Ukongo uo bee kʼaundasikira chifoni, itsʼiphokala undaonyesa ubomu wa Mulungu, kwa hata mimi Mwanangwa wa Mulungu nimanywe nina ubomu kuchirira uo ukongo.” 5Jeso wakala unaahenza ano Marita, na mwanalume wao Lazaro. 6Kwa vivyo, ariphosikira kukala, Lazaro wakala ni mukongo, wasagala kuko kokala kwa tsʼiku mbiri kahiri, 7na zizo ziriphosira, waamba anafunzie vivi, “Hindeni Judea kahiri.”

8Ela o anafunzie achimwamba, “Aa! Mwalimu, huuyedze Judea, na hata ni dzuzi yenye phokala Ayahudi átsuma kukuulaga na mawe?”

9Phapho Jeso achiudzidza achiamba, “Masaa ga mutsana ni kumi na mairi, na mutʼu achenenda na mutsana kʼakwala, mana, mwanga wa dunia unamuhenda aone tsetsetse kamare. 10Ela mutʼu achenenda na usiku ndo akwalapho kwakukala, kʼakuna mwanga wa kumwaviza kona.” 11Jeso ariphomarigiza kugomba gago, waamba anafunzie vivi, “Musena wehu Lazaro urere kuko, ela ninenda kuko kwa nikamulamuse.” 12Phapho o anafunzie achiudzidza achiamba, “Bwana, achikala urere, bee undahenda baha.” 13Ao áona kukala, Jeso wakala udzamba Lazaro wakala urere usingizi wenye tu, ela yiye wakala udzamba Lazaro udzefa. 14Ndo Jeso achiaambira lwazu-lwazu kukala, “Lazaro udzefa. 15Ela kwa dzulu yenu mwimwi, ninahamirwa vivi nirivyo tsʼikalireko kuko ukati wa kufakwe, kwa hata mwimwi vivi mwidime kukuluphira. Ndo hindeni kwakwe vivi.” 16Tʼomasi (aihiwaye Pʼatsa) achiaamba anafunzi anzie vivi, “Siswi naswi hindeni ko Judea. Chikala ni kufa, hukafeni na mwalimu wehu.”

17Jeso ariphokala unatapira Betania, waambirwa kukala, Lazaro wakala uzikwa kare hata uhenda mitsana mine mbirani. 18Kadzidzi ka Betania ka phephi na mudzi wa Jerusalemu, phatʼu phapatapho kʼilomita tʼahu. 19Na Ayahudi anji ákala akudzaazika, na kwausa uvumvu Marita na Maryamu kutuwirizana na chifo cha ndugu yao Lazaro. 20Ndo Marita ariphosikira kukala Jeso wakala unaloka, walaa mairo nyumbani achendamutsangira na ndiro, ela Maryamu yiye, achisala mumo nyumbani. 21Marita wamwamba Jeso vivi, “Bwana, kala uwe wakala u phapho, mwenehu kʼangafere! 22Ela ninamanya kukala, hata vivi chochosi chondamuvoya Mulungu, undakupʼa.” 23Jeso achimungolangola Marita achimwamba, “Nyamala dede, nduguyo undafufuka.” 24Marita achimuudzidza achimwamba, “Ninamanya kukala undafufuka, ela bee vivyo, tsʼi pho tsʼiku ya musindikizo wa urumwengu, phondakala atʼu anafufulwa?” 25Phapho Jeso achimwamba, “Mimi ndimi ufufulo, na uzima. Kwa vivyo, anikuluphiraye mimi, hata akafa nindamufufula akale na uzima vivyo, 26na ariye una uo uzima urehewao ni kunikuluphira mimi, chiroho kʼafa kamare. Vidze, unagakuluphira gago?” 27Marita achimwamba, “Ehʼe, Bwana! Mino ninakuluphira kukala, uwe ndiwe yiye Kʼirisito, Mwanangwa wa Mulungu, yekudza phapha duniani.”

28Marita unamarigiza kugomba gago, wakwendamwiha njama nduguye Maryamu, achimwamba, “Mwalimu ukudza, na unakwiha.” 29Maryamu ariphosikira gago tu achiunuka kare, achenda kwa Jeso. 30Jeso wakala kʼadzangwe kuphenya pho kadzidzini, hata wakala ucheri pharatʼu phokala Marita ukwendamuphokera. 31Aratʼu atʼu okala a mumo nyumbani phamwenga na Maryamu anamuusa uvumvu, ámutuwa ariphomona uzuka na ulaa konze maruru. Ao áona dza kwamba unenda mbirani kwa nduguye kwendarira.

32Ndo Maryamu ariphofika phokala Jeso, wamona, na achimitʼa mavindi mbereze achimwamba, “Bwana, kala uwe wakala u phapho, mwenehu kʼangafere!” 33Jeso ariphomona unarira, na ao Ayahudi okala anaye nao anarira vivyo, washononeka muno mwakwe rohoni na achiyugika. 34Chisha achiuza vivi, “Mwamuzikaphi?” O achiudzidza achiamba, “Bwana, hinde hukakonyese kozikwa.” 35Jeso achenda na kuno unabagarikwa ni matsozi. 36Ndo Ayahudi achiamba, “Jeso wakala unamuhenza Lazaro asena! Lolani vivyo amuririravyo!” 37Ela anjine ao achiamba, “Akale yuyu mutʼu yemuphoza mutʼu yekala hata uvyalwa na kʼaona, wakala kʼaidima kumuziza Lazaro atsʼife?”

Jeso unamufufula Lazaro

38Jeso achifika mbirani pha Lazaro na kuno unashononeka na kuyugika vivyo mwakwe rohoni. Mbira yenye yakala ni pʼanga ya dziwe, na yakala yifinikʼirwa na dziwe bomu pho muyangoni. 39Jeso achiamba, “Riuseni riro dziwe!” Marita nduguye yiye mufadzi Lazaro achimwamba, “Aa! Bwana, uhenda tsʼiku ne yiye hangu azikwe. Ndo riro dziwe richiuswa, kʼaphandakalika phapha.” 40Jeso achimwamba, “Samba nákwambira we kukala, uchikuluphira undawona ubomu wa Mulungu?”

41Ndo o atʼu achiriusa riro dziwe. Jeso achilola dzulu mulunguni achiamba, “Ninakulavira mumvera Baba, kwakukala, udziphokera mavoyo gangu. 42Mimi ninamanya kukala, mavoyo gangu unagaphokera tsʼiku zosi. Ela ninagomba maneno gaga tu kwa dzulu ya aa atʼu aimireo phapha, kwa hata aidime kukuluphira kukala, uwe ndiwe yenihuma.” 43Ariphomarigiza kugomba gago, Jeso wamwiha Lazaro kwa laka ra dzulu achiamba, “Lazaro! Laa konze!” 44Lazaro achilaa konze na sanzaze ufungwa vivyo, na Jeso achiaamba, “Muvuleni zo sanza mumuriche ende vyakwe.”

Vilongozi a Ayahudi anachiza kumuulaga Jeso

(Matayo 26:1-5; Mariko 14:1-2; Luka 22:1-2)

45Ndo Ayahudi anji kati ya okala akudzaausa uvumvu ano Maryamu, na adzona cho chihendo chohendwa ni Jeso, ámukuluphira. 46Ela anjine ao achenda kwa Afarisayo achendaambira dzulu ya gokala gahendwa ni Jeso. 47Ndo makuhani abomu na Afarisayo achionana dza ngambi kwa hata adzile. Ao áanza kuuzana vivi, “Hʼaya asenani! Huhendedze? Kwani vivyo mutʼu yuyu unahenda dalili nyinji za kwangalaza. 48Na huchimuricha aenderere, hʼaya chila mutʼu undamukuluphira, na phapho Arumi andakudza kare adze ahutaphe Hekalu rehu, na itsʼi yehu!”

49Phapho mumwenga wao aihiwaye Kayafa, ariye wakala ndiye kuhani mubomu mwaka uo, achiaamba, “Mwimwi bee kʼamuna mumanyaro kamare! 50Vino bee, kʼamona ni baha kwenu mutʼu mumwenga kufa kwa dzulu ya atʼu osi, kuriko itsʼi nzima kuhangamika?” 51Kayafa maneno gago kʼagagombere yiye mwenye tu, ela kwahivira wakala ndiye kuhani mubomu mwaka uo, wakala unasema chimbere kukala, Jeso undafa kwa dzulu ya Ayahudi osi. 52Na chifo cha Jeso chakala kʼachindaativya Ayahudi hichiyao, ela chakala chindaareha phamwenga anangwa a Mulungu osi otsamukana hipha na hipha mumu duniani akale amwenga.

53Ndo kwanzira tsʼiku yiyo, ao áchiza kukala, andamuulaga Jeso. 54Jeso achiyimanya yo ngewa yao. Kwa vivyo, kʼaenendere kahiri lwazu-lwazu kati ya Ayahudi, ela wauka phapho, achenda phephi na nyika, mudzi wihiwao Efuraimu, achendasagala kuko phamwenga na anafunzie.

55Tsʼikukʼuu ya Ayahudi ya Pʼasaka yiriphokala yi phephi, atʼu anji álaa makwao achenda Jerusalemu, kwa hata akadzitakase chimbere. 56O atʼu áenderera kumutsakula Jeso, na ariphorundikana phamwenga Hekaluni achiuzana vivi, “Munaonadze asena! Akale Jeso undakudza tsʼikukʼuuni?” 57Makuhani abomu na Afarisayo ákala alagiza kukala, mutʼu achimumanya Jeso aripho, aambire, kwa hata amugwire.

Currently Selected:

Johana 11: CHIDUR

Highlight

Copy