Johana 21

Jeso unaalairira anafunzie afungahe

1Gariphochira gago, Jeso waalairira kahiri ao anafunzie kuko kʼanda-kʼanda ya ziya ra Tʼiberiya,#21:1 Ziya ra Tʼiberiya ndiro ziya ra Galilaya. na vivi ndivyokala: 2Simoni Pʼetero, Tʼomasi aihiwaye Pʼatsa, Natanieli muchina Kana kuko jimbo ra Galilaya, Johana na Jakobo anangwa a Zebedayo, na anafunzi anjine airi, ákala osini a phamwenga. 3#Luk 5:5Simoni Pʼetero ndiyeanza kwamba, “Ninenda nikavuwe asena,” na ao anzie achiamba, “Hata siswi hundakutuwa.” Ndo phapho achilaa achendaphenya mashuwani, ela usiku uo wosi kʼaagwirire chitʼu.

4Phokala kunahendawewe, Jeso wakala wimire kʼanda-kʼanda ya riro ziya, ela o anafunzi kʼaamumanyire kukala ndiye. 5Ndo Jeso achiaamba, “Vidze anangu, kʼamudzangwe kugwira hata beshe mwenga?” Ao achimuudzidza achimwamba, “Ngʼo! Kʼahudzangwe kugwira hata mwenga.” 6#Luk 5:6Phapho Jeso achiaamba, “Tsuphani nyavu mukono wa kurya wa mashuwa, namwi mundagwira mabeshe.” Ndo achitsupha nyavu yao dza vyoambwa, na achigwira mabeshe manji muno hata kʼaaidimire kuyivuha na kuyitiya ndani yiyo nyavu. 7Phapho yuyatʼu mwanafunzi yekala achihenzwa ni Jeso muno achimwamba Pʼetero, “Ni Bwana!” Simoni Pʼetero ariphosikira vya kukala ni Bwana, wadzifunga zurungire (kwakukala, wakala udzirivula), na achitinira mumo madzini. 8Ela ao anafunzi anjine ásala mumo mashuwani, na achiyivuha pʼore-pʼore yo nyavu yokala yi tele mabeshe, mana, ákala kʼaakure na kuko konze ya madzi, hata phákala ni phatʼu phafikapho nyago gana.

9Aripholaa mumo madzini, áona moho wa makala ukutwʼa hata mibano ya mabeshe yinakangwa phapho, na mukahe. 10Jeso achiaamba, “Rehani mabeshe machache ga godzigagwira.”

11Ndo Simoni Pʼetero achiphenya mashuwani, na achiyivuha yiyo nyavu hata kuko kʼanda-kʼanda, na yakala yidziudzala mabeshe mabomu, mabeshe gana mwenga na mirongo mitsano na mahahu. Na hata garipho gago mabeshe gákala ni manji mumo nyavuni, ela kʼayikakatʼikire. 12Jeso achiaamba, “Nzoni mufungule.” Phapho, ao anafunzi osi ámumanya kukala ni Bwana, na kwa vivyo, kʼaphana hata mumwenga kati yao yemuuza, “Uwe u ani?” 13Jeso achiuhwala uo mukahe achiagavya, na achihwala gago mabeshe nago achiagavya vivyo.

14Lulu lwakala ni lwa hahu lwa Jeso kwalairira anafunzie pho ariphofufuka kulaa kuzimu.

Jeso na Pʼetero

15Ariphomala kufungula, Jeso wamuuza Simoni Pʼetero vivi, “Simoni, mwana wa Johana! Ukale uwe unanihenza muno mimi kuchira aa?” Pʼetero achimuudzidza achimwamba, “Ehʼe Bwana, mba hata uwe unamanya kukala, mimi ninakuhenza.” Jeso achimwamba, “Hʼaya bee risa anagonzi angu.” 16Achimuuza lwa phiri, “Simoni, mwana wa Johana! Ukale unanihenza uwe?” Pʼetero achimuudzidza achimwamba, “Ehʼe Bwana, mba hata uwe unamanya kukala, mimi ninakuhenza.” Jeso achimwamba, “Garorome magonzi gangu bee.” 17Chisha achimuuza lwa hahu, “Simoni, mwana wa Johana! Unanihenza jeri uwe mimi?” Phapho Pʼetero achishononeka kwakukala, Jeso wamuuza lwa hahu: “Unanihenza jeri uwe mimi?” Na achimwamba, “Bwana, uwe unamanya gosi. Uwe unamanya kukala, mimi ninakuhenza.” Jeso achimwamba, “Hʼaya bee risa magonzi gangu. 18Na ninakwambira jeri-jeri, uwe phokala u mutumia murika, wakala uchidzivika nguwo mwenye, na kwenda kwako uhenzako. Ela uchitumia, undakudzagolosa mikonoyo, na mutʼu akufunge mikowa na akuphirike kutʼu kotsʼikuhenza.” 19(Jeso wagomba vivyo, kusema vyokala Pʼetero undafa kwa angʼaze ubomu wa Mulungu.) Ariphomala kugomba gago achimwamba, “Hʼaya bee nituwa.”

Jeso na mwanafunzi yekala achimuhenza muno

20 # Joh 13:25 Pʼetero phokala unamutuwa yiye Jeso, wagaluka achilola nyuma, na achimona yuyatʼu mwanafunzi ariye Jeso wamuhenza muno unaatuwa. (Yuyu ndiye mwanafunzi yesagala kutuwirizana na Jeso, na achimuuza vivi, “Bwana, ni ani yendakuguza?”) 21Ndo Pʼetero ariphomona unaatuwa, wamuuza Jeso vivi, “Bwana, vidze, yuya?” 22Jeso achimuudzidza achimwamba, “Hʼaya nichikala ninamuhenza asale hata phondauya, ni gako gago? Uwe nituwa mimi tu.” 23Ndo nguma zichigotʼa kati ya akuluphiri kukala, mwanafunzi yiye kʼandafa. Ela Jeso wakala kʼagombere na Pʼetero kukala kʼandafa. Yiye waamba, “Hʼaya nichikala ninamuhenza asale hata phondauya, ni gako gago?”

24Mwanafunzi yiye bee wagaona na matsoge mwenye gago, na ndiye agashuhudiyaye na kugaandika, na hunamanya kukala ushudawe ni wa jeri.

Kusindikiza

25Kuna maneno manjine manji gohendwa ni Bwana Jeso, garigo kala gáandikwa gosi kutuwirizana, bee ninaona hata yiyo dunia yenye yingari kutsʼagotʼa kuviika vitabu virivyo vingari kwandikwa.

Currently Selected:

Johana 21: CHIDUR

Highlight

Copy