Luka 15

Tʼadi ya gonzi royaya

(Matayo 18:12-14)

1 # Luk 5:29, 30 Tsʼiku mwenga, atosi a kodi na adambi ákwendamusirikisa Jeso. 2Afarisayo na alimu a shariya achanza kunungʼunika phapho kwamba, “Muloleni yuno Jeso! Unaapiga karibu adambi, na hata unarya nao.” 3Jeso achiaudzidza kwa kwaambira tʼadi yiyi: 4“Nahwambe mumwenga wenu akale una magonzi gana mwenga, ela phalairire tsʼiku amanye mwenga tu riyaya, munaona yiye undahendadze? Yiye undagaricha dzeruni garatʼu mirongo chenda na chenda ende akaritsakule riratʼu mwenga rodziyaya hata arone. 5Achirona, nikuhamirwa muno hata akaripiga chibega akenda naro mudzini. 6Achifika mudzini, nikwaiha asenae na anzie akaamba, ‘Hosini nahuhamirweni, mana, nidzirona riratʼu gonzi rangu rodzikala riyaya.’ 7Ndo ninamwambira, vivyo bee ndivyo virivyo kuko mulunguni. Kuko nikukala na raha bomu kwa kutya kwa mudambi mumwenga, kuriko atʼu mirongo chenda na chenda adzonao anahenda ga haki hata kʼaatakiya kutya.”

Tʼadi ya noti ya magana matsano yoyaya

8Chisha Jeso waamba, “Hebu nahwambe akale muchetʼu una noti kumi za magana matsano-matsano.#15:8 Chiyunani chinaamba dirakima kumi, na dirakima mwenga ni maripho ga mutʼu yedzisinda dii kuhenda kazi. Ndo achiyaza mwenga, munaona yiye undahendadze? Muchetʼu yiye undaasha taa, aphyere nyumba na kuno unatsakula chividzo hata ayone. 9Na achiyona, nikwambira anzie na asenae kukala, ‘Hosini nahuhamirweni, mana, nidziyona yiyatʼu noti yangu yodzikala yiyaya.’ 10Ndo ninamwambira, yiyo ndiyo raha bomu yondakala mbere za malaika a mulunguni, kwa kutya kwa mudambi mumwenga.”

Tʼadi ya mutana yeyaya

11Jeso waenderera kugomba achiamba, “Kwakala mutumia mumwenga na anae airi a chilume. 12Tsʼiku mwenga, yiye muvaha wamwamba abaye vivi, ‘Baba, uratʼu mutaro wangu onipangira hata ukafa dza rero ninihwale, nipʼa mwenye vivi.’ Ndo yiye mutumia achiagavya miyoye. 13Ziriphochira tsʼiku chʼachʼe, yiye muvaha vivyo wahwala miyoye yosi yokala uhewa, achiyiguza, na achiuka na zo pʼesa achenda itsʼi ya kure, ariko wakwendazifuja. 14Ariphozimala kuzihumira tsetsetse, kwalairira nzala bomu itsʼi yiyo na yiye achanza kwangaika. 15Ndo achendauza kazi kwa muchina itsʼi yiyo mumwenga. Yiye muchina kuko achendamwandika kazi ya kurisa nguluwe kwakwe mundani. 16Ndo yiye mutana achisirima muno na nzala hata achaza kurya hata gago makanda gokala ganariwa ni o nguluwe, ela kʼakuna mutʼu yemupʼa. 17Ndo wasirima vivyo na nzala hata musindikizowe akili zichimukudzirira, na phapho achiamba, ‘Aa! Kwa baba kuna ahendikazi anji na ao niarye hata auriche, ela mino heka phano hata nitsuma kwirika na nzala? 18Bee, mimi nindauya kwa baba nikamwambe, “Baba, mimi nákukosa, na ni dambi hata kwa Mulungu. 19Vivi mimi tsʼiwirya kwihiwa mwanao kahiri. Ela ninakuvoya unihende dza mumwenga wa ahendikazio.” ’ 20Ndo hiye achanza charo cha kuuya kwa abaye. Ela yiye phokala unatapira mudzi wao, abaye wamona, na kwa utsungu wa mwana, achimukazira achendamuunula, na achimudonera.

21“Ela phapho, yiye mwana achimwamba abaye vivi, ‘Baba, mimi nákukosa, na ni dambi hata kwa Mulungu. Vivi mimi tsʼiwirya kwihiwa mwanao kahiri.’ 22Ela abaye yiye achiaamba ahendikazie vivi, ‘Kahwaleni yiyatʼu nguwo mbidzo, pʼehe ya dahabu na virahu maruru adze avale mwanangu! 23Na kafungeni yuya mwanandewa wa kunona mumutsinze niuse hati ra mwanangu! 24Maana, yuyu mwanangu wakala dza kwamba udzefa, ela yiye kumba hata u moyo, wakala uhangamika, ela vino uzumbuka.’ Ndo o ahendikazi achanza kuhikahika kuhenda gokala adzambwa, na hati richiuswa.

25“Ukati uo, yiye muvyerewe wakala u mundani. Mauyi phokala unatapira pho mudzini, wasikira ngoma zinapigwa na atʼu anaimba. Phapho achiima achisirikisa, 26na ariphomona mumwenga wa o ahendikazi ao, achimutsuphira mukono kumwiha. Ariphokudza achimuuza vivi, ‘Kudzegwani kura?’ 27Yiye muhendikazi achimwamba, ‘Muvahao uloka, na abayo udzimutsinzira yuyatʼu mwanandewa wa kunona kumuusira hati, mana, mwanawe udziuya mudzini na ni muzima kamare.’ 28Ela yiye muvyere ariphosikira gago, watsukirwa muno hata achirema hata kuphenya pho mudzini. Yiye muhendikazi achiuya achendamwambira abaye. Phapho abaye achilaa, achendamulombera aphenye, 29ela yiye achimuudzidza achimwamba, ‘Mimi nidzikuhikirahikira myaka minji, na tsʼidzangwe kukukosera kamare, na kʼudzangwe kunipʼa hata mwana mbuzi mumwenga nikausa shuhuli phamwenga na asena angu! 30Ela yuno mwanao yekwendarya miyoyo yosi na madzichetʼu phodziloka tu, udzimutsinzira yiye mwanandewa wa kunona!’ 31Abaye achimuudzidza achimwamba, ‘Mwanangu, uwe tsʼiku zosi hu hosi phapha, na chila niricho nacho ni chako. 32Ela kwahivira yuno nduguyo wakala dza kwamba udzefa, na kumba u moyo, wakala uyaya, ela vino uzumbuka, nidzona ni vidzo humuusire hati, kwa hata hosini huhamirweni phamwenga.’ ”

Currently Selected:

Luka 15: CHIDUR

Highlight

Copy