Luka 23

Jeso mbere za Pilato

(Matayo 27:1-2, 11-14; Mariko 15:1-5; Johana 18:28-38)

1Atʼu osi a yiyo ngambi ázuka achimuphirika Jeso mbere za Pilato. 2Ariphofika kuko, áanza kumulumbira Jeso kwamba kukala, “Hwamugwira mutʼu yuyu unaayaza atʼu ehu. Yiye wakala unaamba atsʼiriphe kodi kwa Kaisari, na kudzamba hangwe yiye ni mufalume aihiwaye yiye Kʼirisito.” 3Phapho Pilato achimuuza Jeso vivi, “Uwe ndiwe mufalume wa Ayahudi?” Jeso achimuudzidza achimwamba, “Vinahwalana na vivyo wambavyo.” 4Pilato achiaamba makuhani abomu na duu ra atʼu kukala, “Mutʼu yuyu ninamona kʼana kosa rorosi.” 5Ela ao achidina kwamba, “Unaasunganya atʼu yiye na mafunzoge itsʼi yosi ya Judea. Waanza Galilaya na hata vino ufika hiku nako.”

Jeso unaphirikwa kwa Herode

6Pilato ariphosikira gago wauza kumba Jeso wakala ni muchina Galilaya. 7Na ariphomanya kukala, Jeso wakala ulaa chipande chitawalwacho ni Herode, walagizira aphirikwe kwa Herode yekala ukati uo wakala u Jerusalemu.

8Herode wahamirwa muno ariphomona Jeso, mana, wakala usikira kare ngumaze, na ndo hata achikala udzanza pʼindi kutamani amone yiye mwenye. Dzulu ya gago, wakala unahenza amone Jeso achihenda dalili. 9Ndo achimuuza Jeso maswali manji kwa chiwango chire, ela Jeso yiye kʼamuudzidzire chitʼu. 10Makuhani abomu na alimu a shariya phapho achidzilavya mbere, achimulumbira muno na chitsinzira. 11Na phapho Herode phamwenga na shikarie achimuhenda Jeso chinyago na kumwifya-ifya, chisha achimuvika valo ra chitawali na achimuudza kwa Pilato. 12Phapho pʼindi Herode na Pilato ákala kʼaagwirana, ela tsʼiku yiyo ákala asena.

Jeso unalamulwa kuulagwa

(Matayo 27:15-26; Mariko 15:6-15; Johana 18:39-19:16)

13Ndo Pilato waika monano wa makuhani abomu, vilongozi na atʼu, 14na yiye achiaamba vivi, “Mutʼu yuyu mwamureha kwangu jeri, muchamba kukala wakala unaayaza atʼu. Sambi sirikisani! Neno riro niriphoritsagula mbere zenu, tsʼimonere una kosa rorosi kutuwirizana na gago malumbano genu gogalavya. 15Na chisha, tsʼi mimi hichiyangu, ela hata Herode naye kʼamonere una kosa rorosi, na vivyo ndivyo vyodzituma hata udzimuudza kwangu. Ndo sambi vi lwazu kukala, mutʼu yuyu kʼahendere chochosi chiidimacho kumuhenda alamulwe kunyongwa. 16Ndo mino vivi nindamulamula achapwe milanga, na nimuriche.”#23:16 Nakala zinjine zinaonjeza fungu ra 17 dza: Chila tsʼikukʼuu ya Pʼasaka yakala ni seti Pilato aavugulire atʼu mufungwa mumwenga.

18Ela osi achigomba kʼululu phamwenga achiamba, “Muulage yiye Jeso, sino huvugulire Baraba!” 19(Baraba wakala ufungwa jela kwa kureha muyuwano mudzini, na chisha kwakukala, wakala udziulaga.)

20Pilato wakala unahenza amuriche tsare Jeso, na vivyo vyamuhenda agombe nao kahiri, 21ela ao achigomba kʼululu achiamba, “Muulage, muulage kwa kumukotʼa misumari musalabani!” 22Pilato achiauza lwa hahu achiaamba, “Bee kwadze? Kwani wahenda ii rani yuno mutʼungwa? Heka tsʼirona riro kosare riidimaro kumuhenda aulagwe? Mino bee nindamwamba apigwe vibokʼo na chidzako nimuriche.”

23Ela ao achikaza kugomba kʼululu kwamba, Jeso ni seti aulagwe kwa kukotwʼa misumari musalabani. Ndo ádina kugomba kʼululu vivyo hata musindikizowe, 24Pilato achiona aahendere vyokala anahenza. 25Achimulavya jela yuyatʼu yekala anamuhenza, ariye wakala ufungwa kwa kureha muyuwano na kuulaga, na achimulavya Jeso kwao amuhende vyokala anahenza.

Jeso unakotwʼa misumari musalabani

(Matayo 27:32-44; Mariko 15:21-32; Johana 19:17-27)

26Shikari ámulongoza Jeso kwendamuulaga, na ariphokala anenda, áonana na mutʼu mumwenga aihiwaye Simoni muchina Kurene, yekala unaloka Jerusalemu kulaa vidzidzini. Ndo achimugwira, achimugaramisha autsukule uratʼu musalaba wa Jeso. Achimwika mbere Jeso, na Simoni achimutuwiriza na uo musalaba. 27Maduu-maduu ga atʼu gachimutuwa, na kati yao ákala ni achetʼu okala anashononeka na kumuririra Jeso. 28Ela Jeso achiagalukira achiaamba, “Mwimwi ano mayo a Jerusalemu! Mutsʼiniririre mimi, ela dziririreni mwimwi enye na ana enu. 29Maana, tsʼiku zindafika ambapho atʼu andaamba, ‘Baha aratʼu achetʼu ario kʼaavyalire kamare!’ 30#Hos 10:8; Ufun 6:16Na ndio ukati urio atʼu andakwatya kugomba na milima ayambe, ‘Hugwerereni!’ na kuvyamba virima, ‘Hufinikʼireni!’ 31Maana, chikala o muhi witsi tu unaochwa, hʼaya kafuje yiyo mifu vindakaladze?”

32Jeso wakala ulongozwa na atʼu anjine airi okala ni anyangʼanyi, ende akaulagwe phamwenga naye. 33Ariphofika phatʼu phaihiwapho, “Muma wa Chitswa,” achikotwʼa misumari misalabani. Mumwenga na musalabawe mukonowe wa kulume, na yiye munjine mukonowe wa kumotsʼo. Jeso achimwika kati-kati na musalabawe. 34#Zab 22:18Phapho Jeso achiamba, “Baba, asamehe, kwakukala, kʼaamanya riro ahendaro.” Chisha, shikari achigavyana mavaloge kwa kupiga kʼura ya kʼamari. 35#Zab 22:7Atʼu ákala aimire phapho analolera, na vilongozi nao achimuhenda chinyago kwa kwamba, “Waativya anjine mba yiye, bemba vino naadzitivye chikala yiye ndiye yiye Kʼirisito jeri, mutʼu yetsagulwa ni Mulungu!” 36#Zab 69:21Shikari nao ámuhenda chinyago vivyo. Ámwendera achendamupʼa divai ya ngwadu kwa hata anwe na 37achimwamba, “Uchikala uwe u mufalume wa Ayahudi jeri, hʼaya dzitivye mwenye.”

38Na phapho dzulu ya musalabawe phákala phadzandikwa vivi, “yuyu ni mufalume wa ayahudi.”

39Mumwenga wa aratʼu anyangʼanyi airi okotwʼa misumari musalabani wamuhakana na kumwamba, “Samba uwe ndiwe yiye Kʼirisito? Amba vino dzitivye uwe mwenye, na chisha naswi uhutivye.” 40Ela yiye munyangʼanyi munjine achimugombera yiye munziwe achimwamba, “Heka kʼumogopha Mulungu uwe? Uwe nawe udzilamulwa kuulagwa dza yiye! 41Chisha, uwe na mimi hunawirya kuhendwa vivi, kwakukala, hunariphwa kutuwirizana na garatʼu hurigogahenda. Ela yiye mutʼungwa kʼahendere ii rorosi.” 42Chisha achiamba, “Jeso, utsʼininyale ukati uchiphenya kwako Ufalumeni.” 43Phapho Jeso achimwamba, “Ninakuhakikishira kukala, rero hundakala phamwenga kuko mulunguni kwenye raha.”

Chifo cha Jeso musalabani

(Matayo 27:45-56; Mariko 15:33-41; Johana 19:28-30)

44 # Kul 26:31-33 Dzuwa rakala ri vitswani, na richanza kugwirwa ukati uo kare. Itsʼi yiyo yosi kuchikala na dziza hata saa chenda, 45na pʼaziya ya Hekalu yichahuka kati-kati. 46#Zab 31:5Ndo Jeso achirira kwa laka ra dzulu achiamba, “Baba, roho yangu nayiika mwako mikononi.” Ariphogomba gago achitosa roho.

47Phapho yuyatʼu mubomu wa shikari a viha ariphoona gohendeka, achimulika Mulungu achiamba, “Hakika mutʼu yuyu wakala unahenda ga haki.” 48Atʼu osi okala arundikana phapho kulolera chihendo chicho ariphoona gago gokala galairira, áuya kwao midzini na kuno anashononeka muno.#23:48 Chiyunani chinaamba na kuno anadzipiga vilagani, yiriyo yakala ni dalili ya shenene. 49#Luk 8:2, 3Ela asenae osi phamwenga na aratʼu achetʼu omutuwa kulaa Galilaya, áima kure achigalolera gago.

Maziko ga Jeso

(Matayo 27:57-61; Mariko 15:42-47; Johana 19:38-42)

50-51Kwakala mutʼu mumwenga aihiwaye Jesefu muchina kadzidzi kamwenga ka Ayahudi kaihiwako Arimataya. Jesefu wakala ni mutʼu mudzo na ahendaye ga haki, na wakala unalolera kudza kwa Ufalume wa Mulungu. Yiye hata aripho wakala ni mumwenga wa ngambi bomu ya Ayahudi, ela wakala kʼagahenzere gago ga Ayahudi anzie ga kumulamula Jeso anyongwe. 52Ndo yiye wakwenda kwa Pilato, achendavoya ahewe lufu lwa Jeso, na achihenzezwa. 53Achilutsereza kulaa musalabani, achiluvika sanza ya kitani, na achendaluzika ndani ya mbira yokala yitsongwa dziweni, yiriyo yakala kʼayidzangwe kuzikwa mutʼu. 54Tsʼiku yiyo yakala ni Ijumaa, na atʼu ákala adzanza kudzibambanya ause tsʼikukʼuu ya Sabato yokala yinga dza macheroye.

55Aratʼu achetʼu omutuwa Jeso kulaa Galilaya ámutuwa Jesefu, achiyona yiyatʼu mbira, na jisi Jeso arivyozikwa. 56#Kul 20:10; Kʼumb 5:14Ndo achiuya kwao midzini, achendalubambanyira mavumba na mafuha ga kunukʼatʼo lufu lwa Jeso.

Tsʼiku ya Sabato achoya dza yirivyokala yinahenzwa ni Shariya yao.

Currently Selected:

Luka 23: CHIDUR

Highlight

Copy