Matayo 10

Ahumwa a Jeso kumi na airi

(Mariko 3:13-19; Luka 6:12-16)

1Tsʼiku mwenga, Jeso waaiha aratʼu anafunzie kumi na airi, achiapʼa widimi dzulu ya pʼepʼo kwa aalavye, na aphoze makongo gosi, na uwele wa chila aina. 2Na madzina gao ao ahumwa a Jeso kumi na airi ni gaga: Wa mwanzo ni Simoni (ariye dzinare rinjine ndiye Pʼetero), Andireya nduguye yiye Pʼetero, Jakobo na Johana anangwa a Zebedayo, 3Filipu na Batolomayo, Tʼomasi na Matayo yekala mutosi wa kodi, Jakobo wa Alifayo na Tadayo, 4Simoni mutʼu wa chama cha Zelote,#10:4 Lola Luka 6:15. Chiyunani chinaamba muchina Kanani, na maanaye ni, mutʼu wa chama cha Zelote. na Juda Isikariyoti yekudzamuguza Jeso.

Jeso unaahuma ahumwae kumi na airi

(Mariko 6:7-13; Luka 9:1-6)

5Jeso ao anafunzie kumi na airi waahuma na malagizo gaga: “Mwimwi mutsʼende kwa atʼu a makabila manjine, hebu midzi ya Asamariya. 6Ela endani kwa Aiziraeli tu, ario áricha kutuwa malagizo ga Mulungu hata anga dza magonzi goyaya. 7Kuko, kazungulukeni na kusumurira kukala, ‘Ufalume wa Mulungu u phephi.’ 8Kaphozeni akongo, mufufule nyufu, muphoze hata atʼu a mahana, na mulavye pʼepʼo. Na nidzimupʼa bule uu widimi mino, kwa vivyo mwimwi namwi, mutsʼendeuvyalira. 9Tsʼitsukuleni pʼesa kuko kwenu charoni. 10#1 Akor 9:14; 1 Tʼim 5:18Mwimwi tsʼitsukuleni hata mukʼoba wa charo, valo ra kʼanda, virahu, hebu ndatʼa, mana, muhendikazi unawirya kuriswa. 11Muchendaphenya mudzi hebu kadzidzi kokosi, uzirani mutʼu akuluphirikaye phapho, na mukasagale na yiye hata phondaukira phatʼu phapho. 12Na muchenda hata muchifika kwakwe nyumbani, atʼu ondakala a mumo nyumbani alamuseni vivi, ‘Enye muno kʼamuna utʼu? Mulungu naamupʼe reri.’ 13Mudzi uo uchikala una atʼu akuluphirikao jeri, reri ya Mulungu andayipata, ela chikala kʼaakuluphirika, mundauka nayo enye. 14#Mahe 13:51Muchendaphenya mudzi hebu kadzidzi kokosi, ela enyezi a phapho areme kumupiga karibu, hebu hata kumusirikisa, hʼaya mwimwi hata ukani, na muchikala munalaa phapho, kutʼani-kutʼani vumbi rondakala ririro mwenu maguluni, kwaonyesa kukala andamanya enye. 15#Mat 11:24; Mwa 19:24-28#Luk 10:4-12Na ninamwambira jeri mino, tsʼiku ya ulamuli yichifika, Mulungu undaatiya akili vikali atʼu a midzi yiyo kuchira yiyatʼu yondahewa atʼu a Sodoma na Gomora.”

Jeso unaambira ahumwae kukala andashononeswa

(Mariko 13:9-13; Luka 21:12-17)

16 # Luk 10:3 Jeso waenderera kwapʼa malagizo ao anafunzie. Yiye waamba, “Sirikisani, mwimwi ninamuhuma vivi, ela manyani kukala, munga dza magonzi gendago kati-kati ya tsʼimba. Ndo kahendeni dzuphi dza nyoka, na kakaleni atʼu otsʼi kʼondo na mutʼu dza ngiya. 17#Mar 13:9-11; Luk 12:11, 12; 21:12-15Dzimanyirireni mwimwi, mana atʼu, andamugwira amuphirike mbere ya ngambi za atumia, na amuchape milanga mumo masinagogini. 18Mundamburutwa muphirikwe hata mbere za magavuna na afalume kwakukala munanikuluphira. Na uo ndio ondakala ukati wenu udzo wa kunishuhudiya kwa ao vilongozi, na hata kwa atʼu a makabila manjine. 19Muchigwirwa na kuphirikwa kuko, mutsʼitangetange kukala mundagombadze hebu mundagombani. Uo ukati wa malau uchifika, mwimwi mundafunulirwa ra kugomba, 20mana, maneno gondagagomba bee gandakala tsʼigo genu, hata gago gandagombwa ni yiye Roho wa Abayenu Mulungu kuchirira mwimwi.

21 # Mar 13:12; Luk 21:16 “Atʼu kuko hwendako andagalukirana hata mutʼu amuguze nduguye mwenye aulagwe, na bemutʼu naye amuguze mwanawe mwenye aulagwe. Ana nao andaagalukira avyazi ao na aaguze aulagwe, 22#Mat 24:9; Mar 13:13; Luk 21:17; Mat 24:13; Mar 13:13na atʼu osi andamumena mwimwi, kwakukala munanikuluphira. Ela yendavumirira hata musindikizo, bee ndiye yendativywa. 23Muchihenderwa mauku mudzi hinyu, ukani mwimwi mwende mudzi unjine. Maana, ninamwambira jeri mino, kʼamundayimala midzi yosi ya Iziraeli photsʼi mimi Mutʼu yelaa dzulu kudza.

24 # Luk 6:40; Joh 13:16; 15:20 “Mwanafunzi tsʼiye mubomu kuchira mwalimuwe, na muhendikazi naye tsʼiye mubomu kuchira tajiriwe. 25#Mat 9:34; 12:24; Mar 3:22; Luk 11:15Cha kuririra mwanafunzi, niakale dza mwalimuwe, na muhendikazi naye, niaririre kukala dza tajiriwe. Ndo nichikala mimi chitswa tu nábandikwa dzina ra Belizabuli, hʼaya manyani mwimwi atʼu angu mundabandikwa ga kuchira riro.”

Jeso unafunza anafunzie amogophe Mulungu tu

(Luka 12:4-9)

26 # Mar 4:22; Luk 8:17 Jeso waenderera kugomba na ao anafunzie achiaamba, “Hata aripho ao andamushononesa, ela mwimwi tsʼiaogopheni vivyo. Maana, chila chofinikʼirwa chindafunulwa, na chila chofitswa chindamanyikana. 27Ndo nimwambirago dzizani, kuchicha mwimwi gasemeni, na gago nimwambirago pʼore-pʼore, mwimwi hendanipanda dzulu ya nyumba mugasumurire. 28Mutsʼiaogophe atʼu kwakukala, ao aulaga mwiri tu, ela kʼaaidima kuulaga roho. Itsʼiphokala, mogopheni Mulungu, ariye unaidima kutsupha mwirio na rohoyo moho wa Jahanamu. 29Hwalani mufano wa vinyama vidide vya kuburuka. Vivyo kala nikuguzwa, viri vilaa shilingi mwenga tu, na ndo chisha, kʼakafa hata kamwenga photsʼipho mahenzo ga Abayenu Mulungu. 30Nichiuya upande wenu mwimwi, hata zizo nyere zenu zosi mumo mwenu vitswani, Mulungu unazimanya ni nyingaphi. 31Ndo mutsʼogophe, mana, mwimwi muna tende muno kuchira duu ra vivyo vinyama vya kuburuka!

32“Na mutʼu yeyosi ashuhudiyaye jamani kukala, yiye ni mutʼu wangu, bee hata mimi nami nindakudzashuhudiya dza vivyo mbere za Baba kuko mulunguni kukala, yiye ni wangu. 33#2 Tʼim 2:12Ela anitinaye jamani, bee hata mimi nami nindakudzamutina dza vivyo mbere za Baba kuko dzulu mulunguni.”

Jeso ndiye chanzo cha mugavikano wa atʼu

(Luka 12:51-53; 14:26-27)

34Jeso waenderera kugomba achiamba, “Tsʼoneni dza kwamba nákudzareha reri phapha duniani. Mimi tsʼidzire kudzareha reri, hata nákudzareha mugavikano. 35#Mik 7:6Maana, mino nákudza kwa nimuhende mwanalume agavikane na abaye, mwana wa chiche agavikane na ameye, mukaza mwana agavikane na mevyalaye, 36na mutʼu adawae bee andakala ni ao atʼue mwenye.

37“Mutʼu yetsʼinihenza mimi muno kuchira abaye, hebu ameye, mwanawe wa chiche, hebu wa chilume, kʼawirya kukala mwanafunzi wangu. 38#Mat 16:24; Mar 8:34; Luk 9:23Na mutʼu yetsʼihwala musalabawe mwenye na kunituwa, kʼawirya kukala mwanafunzi wangu. 39#Mat 16:25; Mar 8:35; Luk 9:24; 17:33; Joh 12:25Mutʼu aikaye mbere wa kulola maishage tu, kʼandapata uzima uphya wa kare na kare, ela yendagarichira maishage mimi, undagativya.”

Jeso unagomba dzulu ya manoso

(Mariko 9:41)

40 # Luk 10:16; Joh 13:20; Mar 9:37; Luk 9:48 Jeso waenderera kugomba achiamba, “Amupigaye karibu mwimwi, unanipiga karibu hata mimi, na anipigaye karibu mimi, unamupiga karibu hata yenihuma. 41Amuphokeraye mugomvi wa Mulungu, kwakukala, ni mugomvi wa Mulungu yedzimuphokera, undapata manoso dza ga yiye mugomvi wa Mulungu. Amuphokeraye mutʼu ahendaye ga haki, kwakukala, unahenda ga haki yedzimuphokera, bee undaphokera manoso dza ga yiye. 42Na yeyosi yendamupʼa mumwenga wa aa anafunzi angu otsʼimanyikana hata kumba ni chikombe cha madzi ga kunwa, kwakukala, ni mwanafunzi wangu, ninamwambira jeri mino kukala, mutʼu yiye kʼandakosa kupata manosoge.”

Currently Selected:

Matayo 10: CHIDUR

Highlight

Copy