Matayo 23

Jeso unaakanya alimu a shariya na Afarisayo

(Mariko 12:38-40; Luka 20:45-47)

1Jeso ariphomarigiza kugomba dzulu ya Kʼirisito ni mutʼu wa murere wa ani, wagomba na duu ra atʼu na ao anafunzie. 2Yiye waamba, “Alimu a shariya na Afarisayo ndiohewa widimi wa kuyingʼaza Shariya ya Musa. 3Kwa vivyo, gatuwirizeni jeri-jeri gago gao gosi amwambago muhende, itsʼiphokala mutsʼiaige gao ahendago. Maana, ao garatʼu agasumurirago atʼu, ao enye kʼaagatuwa. 4Ao mumo Shariyani mwa Musa áonjeza gao genye, bee chisha makomu-makomu hata kʼagatuwika, na hata ngawa kʼaagahendera chiphoziphozi atʼu akaidima kugatuwa. 5#Mat 6:1; Kʼumb 6:8; Isab 15:38Gao gosi ahendago bee, anagahenda kudzonyesa. Hwalani mufano wa vivyo vitʼu adzifungavyo viranguni na mikononi ukati achikala anavoya. Vivyo avitengeza vibomu kudzonyesa kukala, anatuwa dini yao jeri. Chisha, lolani hata mavalo gao nago vivyo garivyo na mitse mire-mire. Gago gosi anagahenda kudzonyesa. 6Na chisha, ahenza kusagala mutʼu mwa abomu shuhulini, na kusagala mbere-mbere mumo masinagogini. 7Na ahenza kulamuswa ni atʼu chiishima kuko vyeteni, na ahenza aihiwe, ‘Alimu’ ni chila mutʼu. 8Ela mwimwi, atʼu naatsʼimwihe ‘Alimu’ kamare, mana, mwalimu wenu ni mumwenga tu, na mwimwi mosi mu ndugu. 9Na chisha, mutsʼimwihe mukuluphiri munziwenu yeyosi ‘Baba’ phapha duniani, mana, Abayenu ni mumwenga tu yiye ariye mulunguni. 10Hebu mutsʼiihiwe ‘Vilongozi,’ mana, chilongozi wenu ni mimi Kʼirisito tu bahi. 11#Mat 20:26, 27; Mar 9:35; 10:43, 44; Luk 22:26Ahenzaye akale chilongozi kati yenu, ni seti akale muhendikazi wa anzie. 12#Luk 14:11; 18:14Adziunulaye undaudzwa nyuma, na adziudzaye nyuma undaunulwa.

13“Ela mundamanya enye mwimwi alimu a shariya na Afarisayo, mana, mu alumakwiri! Mwimwi munaaziza atʼu atsʼiphenye Ufalumeni kwa Mulungu. Maana, mwimwi enye kuphenya kʼamuphenya, na kʼamwaphisa ao ahenzao aphenye.#23:13 Nakala zinjine zinaonjeza fungu ra 14 dza: Mundamanya enye mwimwi alimu a shariya na Afarisayo, maana, mu alumakwiri! Mwimwi munaaiyira magungu miyo yao hata kʼamuna haya, na chidzako munaayaza manza atʼu kwa kuvoya mavoyo mare. Gago gandamuhenda Mulungu amutiye akili vikali muno.

15“Mundamanya enye mwimwi alimu a shariya na Afarisayo, mana, mu alumakwiri! Mwimwi munazunguluka chila phatʼu hata baharini kwa mupate hata ngawa mutʼu mumwenga tu atuwe dini yenu, na mumupatapho, nikumuhenda akakala mui muno hata kutiywakwe akili kukachira kuko kwenu.

16“Mundamanya enye mwimwi vilongozi otsʼiona, mufunzao atʼu kukala, ‘Mutʼu achilapha Hekalu, hata akatsʼachichimiza chilaganeche bee kʼana neno. Ela achilapha yiyo dahabu yiriyo mumo Hekaluni, niatsʼichivunze chilaganeche chochiika.’ 17Mwimwi kʼamona, na mu azuzu! Maana, Hekalu ndo takatifu, ela tsʼi dahabu. Dahabu yikala takatifu tu yilaviwapho kwa Mulungu mumo Hekaluni. 18Chisha, munaafunza atʼu kukala, ‘Mutʼu achilapha chijaja cha kochera sadaka mumo Hekaluni, bee hata akachivunza chilaganeche kʼana neno. Ela achilapha yiyo sadaka ayilavyayo phapho chijajani, niatsʼichivunze chilaganeche chochiika.’ 19Mwimwi kʼamona! Maana, chijaja cha kochera sadaka mumo Hekaluni ndicho chitakatifu, ela tsʼi sadaka. Sadaka zikala takatifu zocherwapho Mulungu phapho chijajani. 20Ndo alaphaye chijaja cha kochera sadaka, unalapha hata zizo sadaka zodzilaviwa phapho. 21Na alaphaye Hekalu, bee unalapha hata Mulungu ariye unasagala mumo Hekaluni. 22#Isa 66:1; Mat 5:34Alaphaye mulunguni, unalapha chihi cha chifalume cha Mulungu, na yiye Mulungu mwenye achisagaliraye.

23 # Alaw 27:30 “Mundamanya enye mwimwi alimu a shariya na Afarisayo, mana, mu alumakwiri! Mwimwi munamulavira Mulungu fungu ra kumi hata kwa vilungiro vya mbogani, ela munaricha kutuwa mafunzo ga halahala ga Shariya. Mafunzo ga halahala ga yiyo Shariya ni kuhenda ga haki, konerana mbazi, na kukala atʼu a kukuluphirika kwa anzienu. Bee, malagizo gaga munahenzwa mugatuwe jeri-jeri. Na hata gago manjine nago mutsʼigariche, nimwenderere kugahenda vivyo. 24Ndo mwimwi mu vilongozi otsʼiona, murio mutuwa chividzo gago malagizo madide-madide, ela munavunza malagizo ga Mulungu ga halahala.

25“Mundamanya enye mwimwi alimu a shariya na Afarisayo, mana, mu alumakwiri! Mwimwi kuku konze munadziikatʼo dza mutʼu atsukutsaye vikombe na masahani konze hicheye, ela mwenu ndani, mu tele ukora na ui. 26Mwimwi Afarisayo otsʼiona! Vikombe vyenu anzani kuvitsukutsa kuko ndani, ndo hata konze nako kundatsuka.

27 # Mahe 23:3 “Mundamanya enye mwimwi alimu a shariya na Afarisayo, mana, mu alumakwiri! Mwimwi munga dza mbira zopigwa chʼokaa, konze zinangʼala-ngʼala, ela mumo ndani mu tele misoza ya atʼu a kufa na uchafu wosi. 28Ndo dza mwimwi namwi, kuku konze munaoneka munahenda ga haki, ela mumo mwenu ndani mu tele ulumakwiri na ui.

(Luka 11:47-51)

29“Mundamanya enye mwimwi alimu a shariya na Afarisayo, mana, mu alumakwiri! Mwimwi munagajengera vikuta mabira ga agomvi a Mulungu, na kuzitiya maleleo mbira za atʼu okala achihenda ga haki. 30Na munaamba, ‘Kala siswi ukati uo wa akare ehu hwakala hudzivyalwa kare, hungari kʼahugwirikanire nao kwaulaga ao agomvi a Mulungu!’ 31Kwa vivyo, munakubali enye kukala, mu atʼu a mudzungu a ao atʼu oulaga agomvi a Mulungu. 32Akare enu ndio oanza kwaulaga agomvi a Mulungu. Hʼaya bee yimarigizeni kamare yiyo kazi yoanzwa ni akare enu! 33#Mat 3:7; 12:34; Luk 3:7Mwimwi mu chivyazi chii dza cha nyoka. Kwa vivyo, kʼamwidima kuchimbira kutiywa akili ni Mulungu kwa kutsuphwa moho wa Jahanamu. 34Ninamwambira mino, vivi ninaahuma kwenu agomvi a Mulungu, atʼu a hekima na alimu a shariya, na anjine mundaaulaga, anjine mwaulage kwa kwakotʼa misumari musalabani, anjine mundaachapa milanga masinagogini mwenu, na anjine mundaahendera mauku chila mudzi ondakwenda. 35#Mwa 4:8; 2 Mgu 24:20, 21Kwa vivyo, mwimwi mundatiywa akili kwa kuulagwa kwa atʼu osi okala anahenda ga haki phapha duniani, kwanzira Abeli ariye waulagwa na kʼana kosa, hata kuulagwa kwa Zakariya mwana wa Barakiya, ariye mwimwi mwamuulaga kati-kati ya chijaja cha kulavira makafara, na Hekalu mumo bomani. 36Ninamwambira jeri mino, mwimwi atʼu a chivyazi chichi ndimwi ondatiywa akili kwa kuulagwa kwa atʼu ao osi.

Jeso unaushononekera mudzi wa Jerusalemu

(Luka 13:31-35)

37“Atʼu a Jerusalemu! Mwimwi achina Jerusalemu, mwimwi munaaulaga agomvi a Mulungu, na kwapiga mawe aratʼu adzumbe ario Mulungu unaahuma kwenu! Ni kʼano ngaphi mino zohenza kwaudza phamwenga atʼu enu, dza kolo ra kʼukʼu riakuyakuyavyo anae mwakwe makwaphani, ela mwimwi kʼamukubalire vivyo. 38#Jer 22:5Bee, vivi Mulungu hata kʼandaulola kahiri mudzi wenu, na ni seti ukale anzo. 39#Zab 118:26Maana, ninamwambira mino kukala, kʼamundanona kahiri hata mwambe, ‘Waajaliwa ni Mwenyezi Mulungu yiye adzaye kwa dzina ra Bwana!’ ”

Currently Selected:

Matayo 23: CHIDUR

Highlight

Copy