Matayo 25

Tʼadi ya asichana kumi

1 # Luk 12:35 Jeso waenderera kugomba achiamba, “Ukati uo nichikala ninauya mimi Mutʼu yelaa dzulu, Ufalume wa Mulungu undahwalanishwa na tʼadi yiyi. Tsʼiku mwenga, asichana kumi áasha mataa gao achendamurana bwana nyambura. 2Ela atsano kati yao ákala ni azuzu, na o anjine atsano achikala ni elevu. 3Maana, aa atsano azuzu átsukula mataa gao, ela kʼaatsukulire mafuha ga kʼanda. 4Ela o anjine atsano elevu, achitsukula mataa gao na mafuha manjine ga kʼanda. 5Ndo ao asichana achendatariza hata achidzitariza, mana, bwana nyambura wachelewa kuloka. Phapho achinyekererwa ni usingizi na achilala. 6Ela kuriphofika usiku wa manane, njerejere zaanza kupigwa kukala, ‘Bwana nyambura unaloka: nzoni mudze mumurane.’ 7Phapho o asichana osi achilamuka, achanza kufanya-fanya mataa gao. 8Mataa ga aratʼu atsano azuzu gákala gadziuma mafuha, na ndo achiaamba o anziao, ‘Hulwamisireni utambi mataa gehu asena, mana, gadziuma mafuha.’ 9Ela o atsano elevu achiamba, ‘Gago hurigo nago, bee gatosha siswi bahi! Kwa vivyo, mwimwi ni baha mwende dukani mukagule genu!’ 10Ndo aratʼu asichana azuzu ariphokala acheri ko kugulani mafuha, bwana nyambura kuno nyuma achidzachira, na o asichana okala mataa gao ganaaka hata a kwete, achigwirikana naye achendaphenya riro dzumba rokala rinauswa nyambura, chisha lulo luvi luchisindikwa. 11#Luk 13:25Ndo chidzakoche, aratʼu asichana anjine nao achidza, na achipiga hodi vivi, ‘Bwana, Bwana, husundulire!’ 12Ela yiye bwana nyambura achiaamba, ‘Ninamwambira jeri mino, tsʼimumanya kamare mwimwi!’ ” 13Ndo kumarigiza Jeso achiamba, “Dzimanyirireni bee, kwakukala, kʼamumanya nindauya tsʼiku yani, hebu saa ngaphi.”

Tʼadi ya ahendikazi ahahu

(Luka 19:11-27)

14 # Luk 19:11-27 Jeso wagomba vivyo achiamba, “Ukati wangu wa kuuya, Ufalume wa Mulungu undahwalanishwa na tʼadi yiyi. Mutʼu mumwenga wakala ufikirwa ni charo, na phokala kʼadzangwe kuuka, waaiha ahendikazie achidzaapʼa pʼesaze zosi azimanyirire, 15na chila mumwenga wamupʼa kutuwirizana na vyakwe aidimavyo. Mumwenga wamupʼa miliyoni mbiri na nusu, munjine achimupʼa miliyoni mwenga, na yiye wa hahu achimupʼa laki tsʼano, ndo hiye achiuka. 16Yuyatʼu yehewa miliyoni mbiri na nusu, achanza kuzichuzira kare zizo pʼesa, na achipata faida ya miliyoni mbiri na nusu vivyo. 17Yehewa miliyoni mwenga naye, achihenda dza vivyo vya munziwe, na achipata faida ya miliyoni mwenga. 18Ela yehewa laki tsʼano yiye, wakwendazitsimbira bopʼo achizifitsa zizo pʼesa za tajiriwe.

19“Tajiri wao wakwendasagala myaka minji kokala ukwenda, ela achiuya. Na ariphouya, achihenza kumanya chila muhendikaziwe chopata kulairirana na pʼesa zokala udziarichira. 20Ndo muhendikazi yehewa miliyoni mbiri na nusu, wakudza, achilavya miliyoni mbiri na nusu za faida, na miliyoni mbiri na nusu zokala uhewa achuzire. Phapho achimwamba tajiriwe vivi, ‘Mutumia, wanipʼa miliyoni mbiri na nusu uwe, ela mino názichuzira hata zichivyala miliyoni mbiri na nusu kahiri.’ 21Tajiriwe achimwamba, ‘Vyohenda uwe ni vidzo muno, na uwe u muhendikazi mudzo na wa kukuluphirika. Na kwakukala, udzikala mwaminifu na neno dide, vivi nindakwika mwimirizi wa mabomu. Ndo hata phenya kuno niriko, udze uhamirwe dza vivyo nihamirwavyo mimi.’

22“Muhendikazi yehewa miliyoni mwenga naye, achidza achimwamba, ‘Mutumia, wanipʼa miliyoni mwenga uwe, ela mino názichuzira hata zichivyala miliyoni mwenga kahiri. Kwa vivyo, zosi miliyoni mbiri hizi.’ 23Tajiriwe achimwamba, ‘Vyohenda uwe ni vidzo muno, na uwe u muhendikazi mudzo na wa kukuluphirika. Na kwakukala, udzikala mwaminifu na neno dide, vivi nindakwika mwimirizi wa mabomu. Ndo hata phenya kuno niriko, udze uhamirwe dza vivyo nihamirwavyo mimi.’

24“Ela yehewa laki tsʼano phokudza, wamwamba, ‘Mutumia, ninakumanya uwe u musiru muno, na u mutʼu uhenzaye kudzipatira faida ya bule yotsʼiyihendera kazi. 25Kwa vivyo, gago mino gánogofyera hata pʼesazo nichendazitsimbira bopʼo nichizifitsa. Ndo sambi, pʼesazo zonipʼa hizi.’ 26Ela tajiriwe achimuudzidza achimwamba, ‘Uwe u muhendikazi mui, na mukaha! Hʼaya nawe wamanya kukala mino ni mutʼu nihenzaye kudzipatira faida ya bule photsʼiyihendera kazi, 27kwadze sambi kʼwendereziika bengi pʼesa zangu zikatsuma, hata vino vyouya nikazihwala na faidaye?’ 28Ndo phapho yiye tajiriwe achiaamba ahendikazie anjine, ‘Muphokeni yuno zizo pʼesa, mukamupʼe yepata faida ya miliyoni mbiri na nusu. 29#Mat 13:12; Mar 4:25; Luk 8:18Maana, ahumiraye chicho aricho nacho, undaonjezwa akale na vinji, ela yuyatʼu yetsʼichihumira, undaphokwa hata chicho aricho nacho. 30#Mat 8:12; 22:13; Luk 13:28Na yuyu muhendikazi yetsʼina ganjira kamutsupheni kuko konze dzizani, kuriko undadzuta na arire hata ga milatso!’ ”

Mutʼu yelaa dzulu undalamula atʼu osi

31 # Mat 16:27; Mat 19:28 Jeso waamba, “Ukati mimi Mutʼu yelaa dzulu nichidzatawala phamwenga na malaika osi a Mulungu, nindasagala phangu chihini cha chifalume, 32na atʼu a viryomo vyosi phapha duniani arehewe mbere zangu. Nami phapho nindaagavya maduu mairi dza viratʼu murisa atanyavyo magonzi na mbuzi. 33Riratʼu duu ra atʼu ahendao ga haki, nindariika mukono wangu wa kulume, na rira ra adambi, niriike mukono wangu wa kumotsʼo.

34“Nichimala kuhenda gago, mimi mufalume nindaamba ondakala a mukono wangu wa kulume, ‘Mwimwi ndimwi ojaliwa ni Baba. Kwa vivyo, phenyani kuno kwakwe Ufalumeni, urio wamwikira hangu urumwengu kʼaudzangwe kuumbwa. 35Maana, mwimwi ndimwi onipʼa leu ukati niriphokala nina nzala, ndimwi onipʼa madzi ukati niriphokala nina chʼiru, ndimwi onipiga karibu mwenu midzini hata niriphokala ni mujeni, 36ndimwi onipʼa nguwo ukati niriphokala nidzimala, ndimwi onirarisa ukati niriphokala ni mukongo, na ndimwi okala muchidza muchinilola phokala nidzifungwa.’

37“Phapho ao ahendao ga haki andaniuza mimi mufalume anaambe, ‘Bwana, ni rini sino phokona una nzala hata huchikupʼa leu, hebu phokona una chʼiru hata huchikupʼa madzi? 38Ni rini phokona u mujeni hata huchikupiga karibu kwehu midzini, hebu phokona udzimala nguwo hata huchikupʼa? 39Ni rini phokona u mukongo hata huchikurarisa, hebu phokona udzifungwa hata huchidza huchikulola?’ 40Ela mino mufalume niaambe, ‘Ninamwambira jeri, phokala muchiahendera gago ao ndugu zangu hata yiye mudide yetsʼimanyikana, bee mwakala munanihendera mimi.’

41“Chisha, mimi mufalume niagalukire ondakala a mukono wangu wa kotsʼo niambe, ‘Niukirani phano mwimwi atʼu ario Mulungu walamula kare kumutiya akili! Endani kura moho wa kare na kare, urio waikirwa Shetani na malaikae. 42Na phaukeni bee, mana, ukati niriphokala nina nzala kʼamunipʼire leu, ukati niriphokala nina chʼiru kʼamunipʼire madzi. 43Mimi nákala ni mujeni, namwi kʼamunipigire karibu kwenu midzini: nichimala nguwo, namwi kʼamunipʼire hata demu: nichikala mukongo, namwi kʼamunirarisire, na nichifungwa, namwi kʼamudzire hata kudzanilola.’

44“Phapho nao andauza ambe, ‘Bwana, ni rini sino phokona una nzala, una chʼiru, phokala u mujeni, phokala udzimala nguwo, phokala u mukongo hebu phokala udzifungwa na sino kʼahukwavizire kamare?’ 45Ela mino mufalume niaudzidze niaambe, ‘Ninamwambira jeri, mwimwi phorema kumuhendera gago hata yiye mudide yekala kʼamanyikana, bee mwakala munarema kunihendera mimi.’ 46#Dan 12:2Ndo phapho ao andasukumwa kutʼu kondatiywa akili hata kare na kare. Ela ohenda ga haki, aphenye uzimani uphya wa kare na kare.”

Currently Selected:

Matayo 25: CHIDUR

Highlight

Copy