Matayo 4

Jeso unajezwa ni Shetani

(Mariko 1:12-13; Luka 4:1-13)

1 # Abur 2:18; 4:15 Yiye Roho wa Mulungu chidzakoche wamulongoza Jeso kwenda nyika kwa akajezwe ni Shetani. 2Jeso kuko wafunga tsʼiku mirongo mine usiku na mutsana, na ariphomala tsʼiku zizo wakala unasikira nzala muno. 3Shetani mujezi wa atʼu achimutuwa achendamwamba, “Kwahivira uwe u Mwana wa Mulungu, gaambe mawe gano gakale mikahe.” 4#Kʼumb 8:3Ela Jeso achimuudzidza achimwamba, “Gáandikwa Maandikoni ga Mulungu kukala,

‘Mwanadamu kʼandaishi kwa chakurya hicheye,

ela kwa chila neno rilaaro kanwani mwa Mulungu.’ ”

5Shetani achimuhwala Jeso hata mudzi utakatifu wa Jerusalemu, na achimuphirika hata dzulu ya chitsuri cha Hekalu 6#Zab 91:11, 12na achimwamba, “Kwahivira uwe u Mwana wa Mulungu, dzitsuphe photsʼi. Mba gaandikwa hata Maandikoni ga Mulungu kukala,

‘Mulungu undakulagizira malaikae,’

“na chisha, gaandikwa kahiri kukala,

‘Ao andakuunula na mikono yao,

utsʼidze ukakwala mawe.’ ”

7 # Kʼumb 6:16 Ela yiye Jeso achimuudzidza achimwamba, “Ni gago, ela gáandikwa vivyo mumo Maandikoni ga Mulungu kukala,

‘Utsʼimuheze Bwana Mulunguo.’ ”

8Shetani achimuhwala kahiri hata dzulu ya chirima chire muno, achimonyesa itsʼi zosi za dunia na utajiri wao. 9Chisha achimwamba, “Nindakupʼa vivi vyosi chikala undamitʼa mavindi mbere zangu, uniabudu.” 10#Kʼumb 6:13Phapho Jeso achimwamba, “Enda vyako Shetani! Maana, gáandikwa Maandikoni ga Mulungu kukala,

‘Mwabudu Bwana Mulunguo,

na umuhikirehikire yiye hicheye tu.’ ”

11Phapho Shetani achimuricha achenda vyakwe, na malaika achidza, kudzamuhikirahikira Jeso.

Jeso unaanza kuhubiri jimbo ra Galilaya

(Mariko 1:14-15; Luka 4:14-15)

12 # Mat 14:3; Mar 6:17; Luk 3:19, 20 Jeso ariphosikira kukala Johana Mubatizi wafungwa, wauya Galilaya. 13#Joh 2:12Jeso kuko kʼenderesagala mudzi wa Nazareti, itsʼiphokala wakwendasagala maboma garigo Zabuloni na Nafutali, kuko mudzi wa Kaparinaumu odziphakana na ziya ra Galilaya. 14Phapho Jeso achichimiza maneno gogombwa ni mugomvi wa Mulungu Isaya gaambago kukala,

15 # Isa 9:1, 2 “Itsʼi ya Zabuloni na ya Nafutali

zirizo ngʼambo ya muho wa Jorodani, kwerekeza bahari,

kuko Galilaya kutʼu kusagalako atʼu a makabila manjine.

16Atʼu okala achisagala dzizani,

vivi adzona mwanga unji.

Atʼu okala achisagala itsʼi

yodzifinikʼirwa ni dziza ra chifo,

vivi mwanga unji udziangʼarira!”

17 # Mat 3:2 Jeso ariphofika kuko tu, achanza kusumurira neno ra Mulungu kwamba, “Atyani kwakukala, Ufalume wa Mulungu ufika phephi.”

Jeso unaaiha anafunzie a kwanza

(Mariko 1:16-20; Luka 5:1-11)

18Tsʼiku mwenga, Jeso wakala unaenenda na kʼanda-kʼanda ya ziya ra Galilaya. Ndo achiona ndugu airi a chilume, Simoni aihiwaye Pʼetero kwa dzina rinjine na nduguye Andireya. Ao ákala ni avuwi na ákala anavuwa mabeshe na chimia phapho ziyani. 19Jeso achiaamba, “Nituwani, nami mwimwi nindamuhenda mukale avuwi a atʼu.” 20Phapho kare Simoni na Andireya achiviricha vimia vyao, achimutuwa Jeso.

21Jeso achenderera kwenenda na yiyo kʼanda-kʼanda ya ziya vichache, achiaona ndugu a chilume anjine airi, anangwa a Zebedayo, Jakobo na nduguye Johana. Ao ákala a mwao mashuwani phamwenga na abayao, anafuma-fuma vimia vyao. Ndo Jeso achiaiha. 22Nao phapho kare achilaa mumo mashuwani achimuricha abayao, ao achimutuwa Jeso.

Kazi zohendwa ni Jeso

(Luka 6:17-19)

23 # Mat 9:35; Mar 1:39 Jeso waenenda chila phatʼu kuko Galilaya achiafunza atʼu mumo mwao masinagogini, achisumurira Nguma Mbidzo dzulu ya Ufalume wa Mulungu, na achiphoza makongo gosi, na uwele wa chila aina okala unaayuga ao atʼu. 24Ndo ngumaze zichigotʼa itsʼi yosi ya Siriya. Atʼu achiaphirika akongo osini kwa Jeso. Atʼu ao ophirikwa ákala ana makongo ga chila namuna. Anjine miiri yakala yinaaluma hata kʼaaidima, anjine achikala ana vitswa, anjine achikala ana vifofo, anjine achikala ni viswere, na hata anjine achikala ni atʼu a kupholoza. Ao osi áphirikwa kwakwe, naye achiaphoza. 25Maduu-maduu ga atʼu kulaa majimbo ga Galilaya, Dekapoli, mudzi wa Jerusalemu, jimbo ra Judea na ngʼambo ya muho wa Jorodani, achimutuwa.

Currently Selected:

Matayo 4: CHIDUR

Highlight

Copy