MATHAYO 19

Gûcookia mûka

(Mko. 10:1-12)

1Yiesû akûrîîkia kweyana ngerekano înu auma Gariiri aathi Njundea, rûgongo rûra rûngî rwa muuro wa Njorondani. 2Antû baingî mûno bamûthingata, na kîrî bo ooria bara baayîîtue.

3*Abarisai bamwe baathi kîrî we bakîenda kûmûgeria beegua bûra akauga. Bamwîra, “*Watho bwetû ibwîtîgîîrîîtie muntû acookia mûka kûringana na bûra akeenda?”

4Yiesû abacookeria na kîûria abaûria, “Ka bûtaathooma bûra *Maandîko Maatheru maugîîte?” Abeera, “Maandîko Maatheru maugîîte, kîambîrîriani ûra aûmbire akîûmba, ‘Aûmbire antû barî muntû mûrûme na mûka. 5Kwoogu muntû mûrûme aumaga kwa îthe na gina akagwatana na mûka wake. Na barî baîrî bagatuîka mwîrî ûmwe’#Kîambîrîria 1:27; 2:24 6T'antû baîrî mwanya kaîrî, batuîkaga muntû ûmwe. Kwoogu bara Ngai agwatithanîîtie, gûtikaagîte muntû abaathûrana.”

7Abarisai bamûûria, “Na aabu i kî n'ûntû *watho bwa Musa bwîtîgîîrîîtie muntû acookia mûka bunka aandîkîîte baarûa ya kwonania bakuumanwa?”

8Yiesû abeera, “Musa aabwîtîgîîrie bûcookagia aka beenu n'ûntû bwa ûûmo bwa biongo bienu. Îndî kîambîrîriani gûtaakari ûgu. 9Na ga nkûbwîra, muntû ûra acookagia mûka n'ûntû bwa ûntû bûngî bûtarî ûthûngîîri akagûra mûka ûngî, ûyu i kûthûngîîra eegagua akîthûngîîra.”

10Arutwa ba Yiesû bauga, “Ûkaaya kwîgua i bu mantû ma muntû na mûka makari ûgu rî, i kaaba rîmwe muntû agakara atagûreene kana atarî mûgûre.”

11Yiesû abeera, “T'antû bonthe baûmba gûciûra mantû mamu, tatiga bara Ngai eete gûciûkîrwa kwa mo, 12n'ûntû kûrî arûme nthaata kuuma gûciarwa na kûrî bo baakabirwe n'antû, na bangî beenda gûtuîka nthaata n'ûntû bwa gûtûmîkîra Ngai. Ûra akûûmba gûciûra mantû mama naciûre.”

Yiesû aathaarima twana

(Mko. 10:13-16; Ruka 18:15-17)

13Antû bamwe ibaareeteete twana kîrî Yiesû kaingo aturîîkîîra njara aturombera. Îndî arutwa baake baanjîîria gûkaania antû babu.

14Yiesû abeera, “Rekanaani na twana tûûye kîrî niû. Bûtigaatûgirie n'ûntû ûnene bwa îgûrû i bwa bara bakari ta twana tûtû.” 15Yiesû aturîîkîîra njara atuthaarima. Agûtuthaarima aathi.

Gîtonga kîaûria Yiesû bûra gîkîrûtha gîkathi mwoyooni

(Mko. 10:17-31; Ruka 18:18-30)

16Îgiita rîmwe muntû ûmwe aathi kîrî Yiesû amûûria, “Mwarimû, n'ûntû bûrîkû bwega bûra ndûtha nkathi mwoyooni wa tene na tene?”

17Yiesû amûûria, “I kî n'ûntû ûkûmbûûria bûra bwega? Ûra mwega n'ûmwe. Weegua nûkwenda mwoyo wa tene na tene athîkagîra maathana ma Ngai.”

18Muntû ûyu amûûria, “Maathana marîkû?”

Yiesû amwîra, “Mara maugîîte, ‘Ûtikaûragane,’ ‘Ûtikaathûngîîre,’ ‘Ûtikaiye,’ ‘Ûtigaatuyanîîre,’ 19‘Tîîyaga abaagu na nyûkwe,’#Kuuma 20:12-16 na ‘Enda mûtûûri waku ta bûra wîbendeete.’ ”#Mantû ma Araawî 19:18

20Mûthaka ûyu eera Yiesû, “Mamu monthe immaathîkagîra. Gûtirî bûngî?”

21Yiesû amwîra, “Weegua nûkwenda gûtuîka ûmwagîru kûrû, îthi wendie bira bionthe ûrî na bio ûgaîre nkîa mbia ira bikauma, rîru ûûye ûnthingate. Ûkarûtha ûgu ûkeegua ûrî na ûtonga îgûrû.”

22Muntû ûyu akwîgua ûgu aathi akîonanagia kîeba n'ûntû naarî na into biingî mûno.

23Yiesû eera arutwa baake, “Na mma ga nkûbwîra, n'ata kûrî inya gîtonga kûthi ûneneeni bwa îgûrû. 24Na wabu ga nkûbwîra, i ûûthû nkamîîra gûkûrûkîîra karinyaani ga cindano kîrî gîtonga kûthi ûneneeni bwa Ngai.”

25Arutwa bakwîgua ûgu baarigara mûno. Baanjîîria kûûrania, “Anga kûrî we akoonokua?”

26Yiesû abacûûba. Abeera, “Kîrî muntû bûbu bûtiûmbîka, îndî gûtirî ûntû bûrema Ngai.”

27Petûrû aûria Yiesû, “Î tiû naati tûtigîîte bionthe twakûthingata rî, gûgaakara ata?”

28Yiesû abeera, “Na mma ga nkûbwîra, rîra Mwana wa Muntû agaakarîra gîtî kîa ûnene mwagooni wa nthîgûrû înjerû, wana biû arutwa baakwa bûgaakarîra itî bia ûnene bûgiitîre îgamba mîîrîga ya Isiraeri îrî îkûmi na îîrî. 29Na muntû wonthe ûra atigîîte mûciî wake, kana aruagina, kana aaragina, kana îthe, kana gina, kana twana, kana mûnda n'ûntû bwakwa akoona wega maita îgana, na akoona mwoyo wa tene na tene. 30Baingî ba bara barî mbere bagaatuîka ba mûthia, bara barî mûthia batuîke ba mbere.”

Currently Selected:

MATHAYO 19: thk

Highlight

Copy